Diodorus Siculus, Library, book xvi, chapter 17

(디오도로스 시켈로스, Library, book xvi, chapter 17)

τοῦ δὲ Δίωνοσ ἀποκριθέντοσ ὅτι τοῖσ Συρακοσίοισ δίκαιόν ἐστι παραδιδόναι τὴν ἀκρόπολιν ἐπί τισιν ἐξαιρέτοισ χρήμασι καὶ τιμαῖσ, ὁ μὲν Διονύσιοσ ἕτοιμοσ ἦν παραδιδόναι τὴν ἄκραν τῷ δήμῳ ὥστε τοὺσ μισθοφόρουσ καὶ τὰ χρήματα λαβόντα εἰσ τὴν Ἰταλίαν μεταστῆναι, ὁ δὲ Δίων συνεβούλευε τοῖσ Συρακοσίοισ δέχεσθαι τὰ διδόμενα. ὁ δὲ δῆμοσ ὑπὸ τῶν ἀκαίρων δημηγόρων πεισθεὶσ ἀντεῖπε, νομίζων κατὰ κράτοσ ἐκπολιορκήσειν τὸν τύραννον. μετὰ δὲ ταῦτα ὁ μὲν Διονύσιοσ τοὺσ ἀρίστουσ τῶν μισθοφόρων ἀπέλιπεν φυλάξοντασ τὴν ἄκραν, αὐτὸσ δ’ ἐνθέμενοσ τὰ χρήματα καὶ πᾶσαν τὴν βασιλικὴν κατασκευὴν ἔλαθεν ἐκπλεύσασ καὶ κατῆρεν εἰσ τὴν Ἰταλίαν.

οἱ δὲ Συρακόσιοι πρὸσ ἀλλήλουσ ἐστασίασαν, τῶν μὲν οἰομένων δεῖν τὴν στρατηγίαν καὶ τὴν τῶν ὅλων ἐξουσίαν ἐγχειρίζειν Ἡρακλείδῃ διὰ τὸ τοῦτον δοκεῖν μηδέποτ’ ἂν ἐπιθέσθαι τυραννίδι, τῶν δὲ ἀποφαινομένων τὸν Δίωνα δεῖν ἔχειν τὴν τῶν ἁπάντων ἡγεμονίαν.

πρὸσ δὲ τούτοισ πολλῶν ὀφειλομένων μισθῶν τοῖσ ἐκ Πελοποννήσου ξένοισ τοῖσ ἠλευθερωκόσι τὰσ Συρακούσσασ καὶ χρημάτων σπανιζούσησ τῆσ πόλεωσ οἱ μὲν μισθοφόροι τῶν χρημάτων ἀποστερούμενοι συνεστράφησαν, ὄντεσ πλείουσ τῶν τρισχιλίων, πάντεσ δ’ ἐπίλεκτοι ταῖσ ἀρεταῖσ καὶ διὰ τὴν ἄθλησιν τῶν πολεμικῶν ἔργων διαπεπονημένοι πολὺ τοὺσ Συρακοσίουσ ταῖσ ἀρεταῖσ ὑπερεβάλλοντο. ὁ δὲ Δίων ἀξιούμενοσ ὑπὸ τῶν μισθοφόρων συναποστῆναι καὶ παρὰ τῶν Συρακοσίων ὡσ κοινῶν ἐχθρῶν λαβεῖν τιμωρίαν τὸ μὲν πρῶτον ἀντεῖπεν, μετὰ δὲ ταῦτα συναναγκαζόμενοσ ὑπὸ τῆσ περιστάσεωσ προσεδέξατο τὴν ἡγεμονίαν τῶν ξένων καὶ μετ’ ἐκείνων ταχθεὶσ ἀνέζευξεν ἐπὶ τοὺσ Λεοντίνουσ.

οἱ δὲ Συρακόσιοι συστραφέντεσ ἐδίωκον τοὺσ μισθοφόρουσ καὶ κατὰ τὴν ὁδοιπορίαν συνάψαντεσ μάχην καὶ πολλοὺσ ἀποβαλόντεσ ἀπεχώρησαν.

ὁ δὲ Δίων λαμπρᾷ μάχῃ νικήσασ οὐδὲν ἐμνησικάκησε τοῖσ Συρακοσίοισ· ἀποστειλάντων γὰρ πρὸσ αὐτὸν κήρυκα περὶ τῆσ τῶν νεκρῶν ἀναιρέσεωσ τήν τε τῶν νεκρῶν ἀναίρεσιν ἔδωκε καὶ τοὺσ ἁλόντασ πολλοὺσ ὄντασ ἀπέλυσεν ἄνευ λύτρων. πολλοὶ γὰρ ἐν τῇ φυγῇ μέλλοντεσ φονεύεσθαι διηγόρευον ἑαυτοὺσ εἶναι τῶν τὰ Δίωνοσ φρονούντων καὶ πάντεσ διὰ ταύτην τὴν αἰτίαν ἐξέφυγον τὸν θάνατον.

일치하는 문장이 없습니다.

SEARCH

MENU NAVIGATION