Herodotus, The Histories, book 6, chapter 136

(헤로도토스, The Histories, book 6, chapter 136)

παρίοισι μὲν δὴ ταῦτα ἡ Πυθίη ἔχρησε· Ἀθηναῖοι δὲ ἐκ Πάρου Μιλτιάδεα ἀπονοστήσαντα ἔσχον ἐν στόμασι οἵ τε ἄλλοι καὶ μάλιστα Ξάνθιπποσ ὁ Ἀρίφρονοσ, ὃσ θανάτου ὑπαγαγὼν ὑπὸ τὸν δῆμον Μιλτιάδεα ἐδίωκε τῆσ Ἀθηναίων ἀπάτησ εἵνεκεν. Μιλτιάδησ δὲ αὐτὸσ μὲν παρεὼν οὐκ ἀπελογέετο·

ἦν γὰρ ἀδύνατοσ ὥστε σηπομένου τοῦ μηροῦ· προκειμένου δὲ αὐτοῦ ἐν κλίνῃ ὑπεραπελογέοντο οἱ φίλοι, τῆσ μάχησ τε τῆσ ἐν Μαραθῶνι γενομένησ πολλὰ ἐπιμεμνημένοι καὶ τὴν Λήμνου αἱρ́εσιν, ὡσ ἑλὼν Λῆμνόν τε καὶ τισάμενοσ τοὺσ Πελασγοὺσ παρέδωκε Ἀθηναίοισι. προσγενομένου δὲ τοῦ δήμου αὐτῷ κατὰ τὴν ἀπόλυσιν τοῦ θανάτου, ζημιώσαντοσ δὲ κατὰ τὴν ἀδικίην πεντήκοντα ταλάντοισι, Μιλτιάδησ μὲν μετὰ ταῦτα σφακελίσαντόσ τε τοῦ μηροῦ καὶ σαπέντοσ τελευτᾷ, τὰ δὲ πεντήκοντα τάλαντα ἐξέτισε ὁ παῖσ αὐτοῦ Κίμων.

상위

The Histories

목록

일치하는 문장이 없습니다.

SEARCH

MENU NAVIGATION