Diodorus Siculus, Library, book xii, chapter 81

(디오도로스 시켈로스, Library, book xii, chapter 81)

ἐπ’ ἄρχοντοσ δ’ Ἀθήνησιν Εὐφήμου ἐν Ῥώμῃ κατεστάθησαν ἀντὶ τῶν ὑπάτων χιλίαρχοι Λεύκιοσ Φούριοσ, Λεύκιοσ Κοί̈ντιοσ, Αὖλοσ Σεμπρώνιοσ. ἐπὶ δὲ τούτων Λακεδαιμόνιοι μετὰ τῶν συμμάχων στρατεύσαντεσ εἰσ τὴν Ἀργείαν Ὑσιὰσ χωρίον εἷλον, καὶ τοὺσ ἐνοικοῦντασ ἀποκτείναντεσ τὸ μὲν φρούριον κατέσκαψαν, αὐτοὶ δὲ πυθόμενοι τοὺσ Ἀργείουσ ᾠκοδομηκέναι τὰ μακρὰ τείχη μέχρι τῆσ θαλάττησ, ἐπελθόντεσ τὰ κατεσκευασμένα τείχη κατέσκαψαν, καὶ τὴν εἰσ τὴν οἰκείαν ἐπάνοδον ἐποιήσαντο. Ἀθηναῖοι δ’ ἑλόμενοι στρατηγὸν Ἀλκιβιάδην, καὶ δόντεσ αὐτῷ ναῦσ εἴκοσι, προσέταξαν συγκατασκευάσαι τοῖσ Ἀργείοισ τὰ κατὰ τὴν πολιτείαν·

ἔτι γὰρ ἦσαν ἐν ταραχαῖσ διὰ τὸ πολλοὺσ ὑπολελεῖφθαι τῶν τὴν ἀριστοκρατίαν αἱρουμένων. ὁ δ’ οὖν Ἀλκιβιάδησ καταντήσασ εἰσ τὴν τῶν Ἀργείων πόλιν, καὶ συνεδρεύσασ μετὰ τῶν τὴν δημοκρατίαν προκρινόντων, ἐπέλεξε τῶν Ἀργείων τοὺσ μάλιστα δοκοῦντασ τὰ τῶν Λακεδαιμονίων αἱρεῖσθαι·

μεταστησάμενοσ δὲ τούτουσ ἐκ τῆσ πόλεωσ, καὶ συγκατασκευάσασ βεβαίωσ τὴν δημοκρατίαν, ἀπέπλευσεν εἰσ τὰσ Ἀθήνασ. τούτου δὲ τοῦ ἔτουσ λήγοντοσ Λακεδαιμόνιοι μετὰ πολλῆσ δυνάμεωσ ἐμβαλόντεσ εἰσ τὴν Ἀργείαν, καὶ πολλὴν τῆσ χώρασ δῃώσαντεσ, τοὺσ φυγάδασ τῶν Ἀργείων κατῴκισαν εἰσ Ὀρνεάσ·

ἐπιτειχίσαντεσ δὲ τοῦτο τὸ χωρίον ἐπὶ τῆσ Ἀργείασ, καὶ φρουροὺσ τοὺσ ἱκανοὺσ ἀπολιπόντεσ, προσέταξαν κακοποιεῖν τοὺσ Ἀργείουσ. ἀπελθόντων δὲ τῶν Λακεδαιμονίων ἐκ τῆσ Ἀργείασ, Ἀθηναῖοι μὲν συμμαχίαν ἐξέπεμψαν τοῖσ Ἀργείοισ τριήρεισ τετταράκοντα, ὁπλίτασ δὲ χιλίουσ καὶ διακοσίουσ·

οἱ δ’ Ἀργεῖοι μετὰ τῶν Ἀθηναίων στρατεύσαντεσ ἐπὶ τὰσ Ὀρνεὰσ τήν τε πόλιν κατὰ κράτοσ εἷλον καὶ τῶν φρουρῶν καὶ φυγάδων οὓσ μὲν ἀπέκτειναν, οὓσ δ’ ἐξέβαλον ἐκ τῶν Ὀρνεῶν. ταῦτα μὲν οὖν ἐπράχθη κατὰ τὸ πεντεκαιδέκατον ἔτοσ τοῦ Πελοποννησιακοῦ πολέμου.

일치하는 문장이 없습니다.

SEARCH

MENU NAVIGATION