Diodorus Siculus, Library, book xii, chapter 13

(디오도로스 시켈로스, Library, book xii, chapter 13)

τὴν γὰρ γραμματικὴν παρὰ τὰσ ἄλλασ μαθήσεισ προέκρινεν ὁ νομοθέτησ, καὶ μάλα προσηκόντωσ· διὰ γὰρ ταύτησ τὰ πλεῖστα καὶ χρησιμώτατα τῶν πρὸσ τὸν βίον ἐπιτελεῖσθαι, ψήφουσ, ἐπιστολάσ, διαθήκασ, νόμουσ, τἄλλα τὰ τὸν βίον μάλιστα ἐπανορθοῦντα. τίσ γὰρ ἂν ἄξιον ἐγκώμιον διάθοιτο τῆσ τῶν γραμμάτων μαθήσεωσ;

διὰ γὰρ τούτων μόνων οἱ μὲν τετελευτηκότεσ τοῖσ ζῶσι διαμνημονεύονται, οἱ δὲ μακρὰν τοῖσ τόποισ διεστῶτεσ τοῖσ πλεῖστον ἀπέχουσιν ὡσ πλησίον παρεστῶσι διὰ τῶν γεγραμμένων ὁμιλοῦσι· ταῖσ τε κατὰ πόλεμον συνθήκαισ ἐν ἔθνεσιν ἢ βασιλεῦσι πρὸσ διαμονὴν τῶν ὁμολογιῶν ἡ διὰ τῶν γραμμάτων ἀσφάλεια βεβαιοτάτην ἔχει πίστιν· καθόλου δὲ τὰσ χαριεστάτασ τῶν φρονίμων ἀνδρῶν ἀποφάσεισ καὶ θεῶν χρησμούσ, ἔτι δὲ φιλοσοφίαν καὶ πᾶσαν παιδείαν μόνη τηρεῖ καὶ τοῖσ ἐπιγινομένοισ ἀεὶ παραδίδωσιν εἰσ ἅπαντα τὸν αἰῶνα. διὸ καὶ τοῦ μὲν ζῆν τὴν φύσιν αἰτίαν ὑποληπτέον, τοῦ δὲ καλῶσ ζῆν τὴν ἐκ τῶν γραμμάτων συγκειμένην παιδείαν.

καὶ τοσοῦτον ὑπερεβάλετο τοὺσ πρότερον νομοθετήσαντασ δημοσίῳ μισθῷ τοὺσ νοσοῦντασ τῶν ἰδιωτῶν ὑπὸ ἰατρῶν θεραπεύεσθαι, ὥσθ’ οἱ μὲν τὰ σώματα θεραπείασ ἠξίωσαν, ὁ δὲ τὰσ ψυχὰσ τὰσ ὑπ’ ἀπαιδευσίασ ἐνοχλουμένασ ἐθεράπευσε, κἀκείνων μὲν τῶν ἰατρῶν εὐχόμεθα μηδέποτε χρείαν ἔχειν, τοῖσ δὲ τῆσ παιδείασ διδασκάλοισ ἐπιθυμοῦμεν ἅπαντα τὸν χρόνον συνδιατρίβειν.

ἀμφότερα δὲ τὰ προειρημένα πολλοὶ τῶν ποιητῶν δι’ ἐμμέτρου ποιήματοσ μεμαρτυρήκασι·

τὴν μὲν κακομιλίαν ἐν τοῖσδε, ὅστισ δ’ ὁμιλῶν ἥδεται κακοῖσ ἀνήρ, οὐπώποτ’ ἠρώτησα, γινώσκων ὅτι τοιοῦτόσ ἐστιν οἷσπερ ἥδεται ξυνών· τὸν δὲ περὶ τῆσ μητρυιᾶσ τεθέντα νόμον ἐν τούτοισ, τὸν νομοθέτην φασὶν Χαρώνδαν ἔν τινι νομοθεσίᾳ τά τ’ ἄλλα καὶ ταυτὶ λέγειν· ὁ παισὶν αὑτοῦ μητρυιὰν ἐπεισάγων μήτ’ εὐδοκιμείτω μήτε μετεχέτω λόγου παρὰ τοῖσ πολίταισ, ὡσ ἐπείσακτον κακὸν κατὰ τῶν ἑαυτοῦ πραγμάτων πεπορισμένοσ. εἴτ’ ἐπέτυχεσ γάρ, φησί, γήμασ τὸ πρότερον, εὐημερῶν κατάπαυσον, εἴτ’ οὐκ ἐπέτυχεσ, μανικὸν τὸ πεῖραν δευτέρασ λαβεῖν πάλιν. ταῖσ γὰρ ἀληθείαισ ὁ δὶσ ἐν τοῖσ αὐτοῖσ πράγμασιν ἁμαρτάνων ἄφρων ἂν δικαίωσ νομισθείη. καὶ Φιλήμονοσ τοῦ κωμῳδιογράφου γράφοντοσ τοὺσ πολλάκισ ναυτιλλομένουσ καὶ συνειπόντοσ τῷ νόμῳ τεθαύμακ’ οὐκέτ’ εἰ πέπλευκέ τισ, ἀλλ’ εἰ πέπλευκε δίσ, τὸ παραπλήσιον ἄν τισ ἀποφαίνοιτο μὴ θαυμάζειν εἴ τισ γεγάμηκεν, ἀλλ’ εἰ δὶσ γεγάμηκε·

κρεῖττον γὰρ εἶναι δὶσ ἑαυτὸν θαλάττῃ παραβαλεῖν ἢ γυναικί. μέγισται γὰρ καὶ χαλεπώταται στάσεισ ἐν ταῖσ οἰκίαισ γίνονται διὰ μητρυιὰσ τέκνοισ πρὸσ πατέρασ, καὶ διὰ ταῦτα πολλαὶ καὶ παράνομοι πράξεισ ἐν τοῖσ θεάτροισ τραγῳδοῦνται.

일치하는 문장이 없습니다.

SEARCH

MENU NAVIGATION