Diodorus Siculus, Library, book xii, chapter 3

(디오도로스 시켈로스, Library, book xii, chapter 3)

ἐπ’ ἄρχοντοσ γὰρ Ἀθήνησιν Εὐθυδήμου Ῥωμαῖοι μὲν ὑπάτουσ κατέστησαν Λεύκιον Κοί̈ντιον Κικιννᾶτον καὶ Μάρκον Φάβιον Οὐιβουλανόν. ἐπὶ δὲ τούτων Ἀθηναῖοι διαπεπολεμηκότεσ ὑπὲρ Αἰγυπτίων πρὸσ Πέρσασ, καὶ τὰσ ναῦσ ἁπάσασ ἀπολωλεκότεσ ἐν τῇ λεγομένῃ Προσωπίτιδι νήσῳ, βραχὺν χρόνον διαλιπόντεσ ἔγνωσαν πάλιν πολεμεῖν τοῖσ Πέρσαισ ὑπὲρ τῶν κατὰ τὴν Ἀσίαν Ἑλλήνων. καταρτίσαντεσ δὲ στόλον τριήρων διακοσίων, καὶ στρατηγὸν ἑλόμενοι Κίμωνα τὸν Μιλτιάδου, προσέταξαν πλεῖν ἐπὶ Κύπρον καὶ διαπολεμεῖν τοῖσ Πέρσαισ. ὁ δὲ Κίμων ἀναλαβὼν τὸν στόλον κεκοσμημένον ἀνδρῶν τε ἀρεταῖσ καὶ χορηγίαισ δαψιλέσιν ἔπλευσεν εἰσ τὴν Κύπρον.

κατ’ ἐκείνουσ δὲ τοὺσ καιροὺσ τῶν Περσικῶν δυνάμεων ἐστρατήγουν Ἀρτάβαζοσ καὶ Μεγάβυζοσ. Ἀρτάβαζοσ μὲν τὴν ἡγεμονίαν ἔχων ἐν τῇ Κύπρῳ διέτριβεν, ἔχων τριήρεισ τριακοσίασ, Μεγάβυζοσ δὲ περὶ τὴν Κιλικίαν ἐστρατοπέδευε, πεζὰσ ἔχων δυνάμεισ, ὧν ὁ ἀριθμὸσ ἦν τριάκοντα μυριάδων. ὁ δὲ Κίμων καταπλεύσασ εἰσ τὴν Κύπρον καὶ θαλαττοκρατῶν Κίτιον μὲν καὶ Μάριον ἐξεπολιόρκησε, καὶ τοῖσ κρατηθεῖσι φιλανθρώπωσ προσηνέχθη.

μετὰ δὲ ταῦτα ἐκ Κιλικίασ καὶ Φοινίκησ προσφερομένων τριήρων τῇ νήσῳ, Κίμων ἐπαναχθεὶσ καὶ πόλεμον συγκρούσασ πολλὰσ μὲν τῶν νεῶν κατέδυσεν, ἑκατὸν δὲ σὺν αὐτοῖσ τοῖσ ἀνδράσιν εἷλε, τὰσ δὲ λοιπὰσ μέχρι τῆσ Φοινίκησ κατεδίωξεν. οἱ μὲν οὖν Πέρσαι ταῖσ ὑπολειφθείσαισ ναυσὶ κατέφυγον εἰσ τὴν γῆν, καθ’ ὃν τόπον ἦν Μεγάβυζοσ ἐστρατοπεδευκὼσ μετὰ τῆσ πεζῆσ δυνάμεωσ·

οἱ δὲ Ἀθηναῖοι προσπλεύσαντεσ καὶ τοὺσ στρατιώτασ ἐκβιβάσαντεσ συνῆψαν μάχην, καθ’ ἣν Ἀναξικράτησ μὲν ὁ ἕτεροσ τῶν στρατηγῶν λαμπρῶσ ἀγωνισάμενοσ ἡρωικῶσ κατέστρεψε τὸν βίον, οἱ δὲ ἄλλοι κρατήσαντεσ τῇ μάχῃ καὶ πολλοὺσ ἀνελόντεσ ἐπανῆλθον εἰσ τὰσ ναῦσ. μετὰ δὲ ταῦτα Ἀθηναῖοι πάλιν ἀπέπλευσαν εἰσ τὴν Κύπρον. ταῦτα μὲν οὖν ἐπράχθη κατὰ τὸ πρῶτον ἔτοσ τοῦ πολέμου. ἐπ’ ἄρχοντοσ δ’ Ἀθήνησι Πεδιέωσ Ῥωμαῖοι μὲν κατέστησαν ὑπάτουσ Μάρκον Οὐαλέριον Λακτοῦκαν καὶ Σπόριον Οὐεργίνιον Τρίκοστον.

ἐπὶ δὲ τούτων Κίμων ὁ τῶν Ἀθηναίων στρατηγὸσ θαλαττοκρατῶν ἐχειροῦτο τὰσ κατὰ τὴν Κύπρον πόλεισ. ἐν δὲ τῇ Σαλαμῖνι Περσικῆσ φρουρᾶσ οὔσησ ἀξιολόγου, καὶ βελῶν καὶ ὅπλων παντοδαπῶν, ἔτι δὲ σίτου καὶ τῆσ ἄλλησ παρασκευῆσ γεμούσησ τῆσ πόλεωσ, ἔκρινε συμφέρειν ταύτην ἐκπολιορκῆσαι. οὕτω γὰρ ὑπελάμβανε μάλιστα τῆσ τε Κύπρου πάσησ ῥᾳδίωσ κυριεύσειν καὶ τοὺσ Πέρσασ καταπλήξεσθαι, βοηθεῖν μὲν τοῖσ Σαλαμινίοισ μὴ δυναμένουσ διὰ τὸ θαλαττοκρατεῖν τοὺσ Ἀθηναίουσ, ἐγκαταλιπόντασ δὲ τοὺσ συμμάχουσ καταφρονηθήσεσθαι, καθόλου δὲ τὸν ὅλον πόλεμον κριθήσεσθαι τῆσ Κύπρου πάσησ βίᾳ χειρωθείσησ·

ὅπερ καὶ συνέβη γενέσθαι. οἱ μὲν γὰρ Ἀθηναῖοι συστησάμενοι πολιορκίαν πρὸσ τῇ Σαλαμῖνι καθ’ ἡμέραν προσβολὰσ ἐποιοῦντο, οἱ δ’ ἐν τῇ πόλει στρατιῶται, ἔχοντεσ βέλη καὶ παρασκευήν, ῥᾳδίωσ ἀπὸ τῶν τειχῶν ἠμύνοντο τοὺσ πολιορκοῦντασ.

Ἀρταξέρξησ δὲ ὁ βασιλεὺσ πυθόμενοσ τὰ περὶ τὴν Κύπρον ἐλαττώματα, καὶ βουλευσάμενοσ μετὰ τῶν φίλων περὶ τοῦ πολέμου, ἔκρινε συμφέρειν εἰρήνην συνθέσθαι πρὸσ τοὺσ Ἕλληνασ.

ἔγραψε τοίνυν τοῖσ περὶ Κύπρον ἡγεμόσι καὶ σατράπαισ, ἐφ’ οἷσ ἂν δύνωνται συλλύσασθαι πρὸσ τοὺσ Ἕλληνασ. διόπερ οἱ περὶ τὸν Ἀρτάβαζον καὶ Μεγάβυζον ἔπεμψαν εἰσ τὰσ Ἀθήνασ πρεσβευτὰσ τοὺσ διαλεξομένουσ περὶ συλλύσεωσ.

ὑπακουσάντων δὲ τῶν Ἀθηναίων καὶ πεμψάντων πρέσβεισ αὐτοκράτορασ, ὧν ἡγεῖτο Καλλίασ ὁ Ἱππονίκου, ἐγένοντο συνθῆκαι περὶ τῆσ εἰρήνησ τοῖσ Ἀθηναίοισ καὶ τοῖσ συμμάχοισ πρὸσ τοὺσ Πέρσασ, ὧν ἐστι τὰ κεφάλαια ταῦτα· αὐτονόμουσ εἶναι τὰσ κατὰ τὴν Ἀσίαν Ἑλληνίδασ πόλεισ ἁπάσασ, τοὺσ δὲ τῶν Περσῶν σατράπασ μὴ καταβαίνειν ἐπὶ θάλατταν κατωτέρω τριῶν ἡμερῶν ὁδόν, μηδὲ ναῦν μακρὰν πλεῖν ἐντὸσ Φασήλιδοσ καὶ Κυανέων· ταῦτα δὲ τοῦ βασιλέωσ καὶ τῶν στρατηγῶν ἐπιτελούντων, μὴ στρατεύειν Ἀθηναίουσ εἰσ τὴν χώραν, ἧσ βασιλεὺσ ἄρχει. συντελεσθεισῶν δὲ τῶν σπονδῶν Ἀθηναῖοι τὰσ δυνάμεισ ἀπήγαγον ἐκ τῆσ Κύπρου, λαμπρὰν μὲν νίκην νενικηκότεσ, ἐπιφανεστάτασ δὲ συνθήκασ πεποιημένοι.

συνέβη δὲ καὶ τὸν Κίμωνα περὶ τὴν Κύπρον διατρίβοντα νόσῳ τελευτῆσαι.

일치하는 문장이 없습니다.

SEARCH

MENU NAVIGATION