헬라어 문장 검색 - Πλυταρ́Ρομυλυσ́27́

(플루타르코스, chapter 27)

ἐπεὶ δὲ τοῦ πάππου Νομήτοροσ ἐν Ἄλβῃ τελευτήσαντοσ, αὐτῷ βασιλεύειν προσῆκον, εἰσ μέσον ἔθηκε τὴν πολιτείαν δημαγωγῶν, καὶ κατ’ ἐνιαυτὸν ἀπεδείκνυεν ἄρχοντα τοῖσ Ἀλβανοῖσ, ἐδίδαξε δὲ καὶ τοὺσ ἐν Ῥώμῃ δυνατοὺσ ἀβασίλευτον ζητεῖν καὶ αὐτόνομον πολιτείαν, ἀρχομένουσ ἐν μέρει καὶ ἄρχοντασ. οὐδὲ γὰρ οἱ καλούμενοι πατρίκιοι πραγμάτων μετεῖχον, ἀλλ’ ὄνομα καὶ σχῆμα περιῆν ἔντιμον αὐτοῖσ, ἔθουσ ἕνεκα μᾶλλον ἢ γνώμησ ἀθροιζομένοισ εἰσ τὸ βουλευτήριον· εἶτα σιγῇ προστάττοντοσ ἠκροῶντο, καὶ τῷ πρότεροι τὸ δεδογμένον ἐκείνῳ πυθέσθαι τῶν πολλῶν πλέον ἔχοντεσ ἀπηλλάττοντο.

καὶ τἆλλα μὲν ἦν ἐλάττονα· τῆσ δὲ γῆσ τὴν δορίκτητον αὐτὸσ ἐφ’ ἑαυτοῦ δασάμενοσ τοῖσ στρατιώταισ, καὶ τοὺσ ὁμήρουσ τοῖσ Βηίοισ ἀποδούσ, οὔτε πεισθέντων οὔτε βουλομένων ἐκείνων, ἔδοξε κομιδῇ τὴν γερουσίαν προπηλακίζειν. ὅθεν εἰσ ὑποψίαν καὶ διαβολὴν ἐνέπεσε παραλόγωσ ἀφανισθέντοσ αὐτοῦ μετ’ ὀλίγον χρόνον.

ἠφανίσθη δὲ νώναισ Ιοὐλίαισ ὡσ νῦν ὀνομάζουσιν, ὡσ δὲ τότε, Κυντιλίαισ, οὐδὲν εἰπεῖν βέβαιον οὐδ’ ὁμολογούμενον πυθέσθαι περὶ τῆσ τελευτῆσ ἀπολιπών, ἀλλ’ ἢ τὸν χρόνον, ὡσ προείρηται. δρᾶται γὰρ ἔτι νῦν ὅμοια τῷ τότε πάθει πολλὰ κατὰ τὴν ἡμέραν ἐκείνην. οὐ δεῖ δὲ θαυμάζειν τὴν ἀσάφειαν, ὅπου Σκηπίωνοσ Ἀφρικανοῦ μετὰ δεῖπνον οἴκοι τελευτήσαντοσ οὐκ ἔσχε πίστιν οὐδ’ ἔλεγχον ὁ τρόποσ τῆσ τελευτῆσ, ἀλλ’ οἱ μὲν αὐτομάτωσ ὄντα φύσει νοσώδη καμεῖν λέγουσιν, οἱ δ’ αὐτὸν ὑφ’ ἑαυτοῦ φαρμάκοισ ἀποθανεῖν, οἱ δὲ τοὺσ ἐχθροὺσ τὴν ἀναπνοὴν ἀπολαβεῖν αὐτοῦ νύκτωρ παρεισπεσόντασ.

καίτοι Σκηπίων ἔκειτο νεκρὸσ ἐμφανὴσ ἰδεῖν πᾶσι, καὶ τὸ σῶμα παρεῖχε πᾶσιν ὁρώμενον ὑποψίαν τινὰ τοῦ πάθουσ καὶ κατανόησιν·

Ῥωμύλου δ’ ἄφνω μεταλλάξαντοσ οὔτε μέροσ ὤφθη σώματοσ οὔτε λείψανον ἐσθῆτοσ. ἀλλ’ οἱ μὲν εἴκαζον ἐν τῷ ἱερῷ τοῦ Ἡφαίστου τοὺσ βουλευτὰσ ἐπαναστάντασ αὐτῷ καὶ διαφθείραντασ, νείμαντασ τὸ σῶμα καὶ μέροσ ἕκαστον ἐνθέμενον εἰσ τὸν κόλπον ἐξενεγκεῖν· ἕτεροι δ’ οἰόνται μήτ’ ἐν τῷ ἱερῷ τοῦ Ἡφαίστου μήτε μόνων τῶν βουλευτῶν παρόντων γενέσθαι τὸν ἀφανισμόν, ἀλλὰ τυχεῖν μὲν ἔξω περὶ τὸ καλούμενον αἰγὸσ [ἢ ζορκὸσ] ἕλοσ ἐκκλησίαν ἄγοντα τὸν Ῥωμύλον, ἄφνω δὲ θαυμαστὰ καὶ κρείττονα λόγου περὶ τὸν ἀέρα πάθη γενέσθαι καὶ μεταβολὰσ ἀπίστουσ·

τοῦ μὲν γὰρ ἡλίου τὸ φῶσ ἐκλιπεῖν, νύκτα δὲ κατασχεῖν οὐ πρᾳεῖαν οὐδ’ ἥσυχον, ἀλλὰ βροντάσ τε δεινὰσ καὶ πνοὰσ ἀνέμων ζάλην ἐλαυνόντων πανταχόθεν ἔχουσαν· ἐν δὲ τούτῳ τὸν μὲν πολὺν ὄχλον σκεδασθέντα φυγεῖν, τοὺσ δὲ δυνατοὺσ συστραφῆναι μετ’ ἀλλήλων·

ἐπεὶ δ’ ἔληξεν ἡ ταραχὴ καὶ τὸ φῶσ ἐξέλαμψε, καὶ τῶν πολλῶν εἰσ ταὐτὸ πάλιν συνερχομένων ζήτησισ ἦν τοῦ βασιλέωσ καὶ πόθοσ, οὐκ ἐᾶν τοὺσ δυνατοὺσ ἐξετάζειν οὐδὲ πολυπραγμονεῖν, ἀλλὰ τιμᾶν παρακελεύεσθαι πᾶσι καὶ σέβεσθαι Ῥωμύλον, ὡσ ἀνηρπασμένον εἰσ θεοὺσ καὶ θεὸν εὐμενῆ γενησόμενον αὐτοῖσ ἐκ χρηστοῦ βασιλέωσ. τοὺσ μὲν οὖν πολλοὺσ ταῦτα πειθομένουσ καὶ χαίροντασ ἀπαλλάττεσθαι, μετ’ ἐλπίδων ἀγαθῶν προσκυνοῦντασ·

εἶναι δέ τινασ οἳ τὸ πρᾶγμα πικρῶσ καὶ δυσμενῶσ ἐξελέγχοντεσ ἐτάραττον τοὺσ πατρικίουσ καὶ διέβαλλον, ὡσ ἀβέλτερα τὸν δῆμον ἀναπείθοντασ, αὐτοὺσ δὲ τοῦ βασιλέωσ αὐτόχειρασ ὄντασ.

MENU NAVIGATION

호흡부호 보기

강세부호 보기

장단부호 보기

작은 Iota 보기

모든 부호 보기

헬라어 텍스트

Plutarch, chapter 27

(플루타르코스, chapter 27)

상위

목록

SEARCH

MENU NAVIGATION