Lysias, Speeches, Κατὰ Νικομάχουγραμματέωσ εὐθυνῶν κατηγορία 22:

πυνθάνομαι δὲ αὐτὸν λέγειν ὡσ ἀσεβῶ καταλύων τὰσ θυσίασ. ἐγὼ δ’ εἰ μὲν νόμουσ ἐτίθην περὶ τῆσ ἀναγραφῆσ, ἡγούμην ἂν ἐξεῖναι Νικομάχῳ τοιαῦτα εἰπεῖν περὶ ἐμοῦ· νῦν δὲ τοῖσ κοινοῖσ καὶ κειμένοισ ἀξιῶ τοῦτον πείθεσθαι. θαυμάζω δὲ εἰ μὴ ἐνθυμεῖται, ὅταν ἐμὲ φάσκῃ ἀσεβεῖν λέγοντα ὡσ χρὴ θύειν τὰσ θυσίασ τὰσ ἐκ τῶν κύρβεων καὶ τῶν στηλῶν κατὰ τὰσ συγγραφάσ, ὅτι καὶ τῆσ πόλεωσ κατηγορεῖ· ταῦτα γὰρ ὑμεῖσ ἐψηφίσασθε. ἔπειτα εἰ ταῦτα νομίζεισ δεινά, ἦ που σφόδρα ἐκείνουσ ἡγεῖ ἀδικεῖν, οἳ τὰ ἐκ τῶν κύρβεων μόνον ἔθυον.