헬라어 문장 검색 - Λψσιασ́Σπεεξηέ27́

(리시아스, Speeches, Κατὰ Ἐπικράτουσ καὶ τῶν συμπρεσβευτῶν ἐπίλογοσ ὡσ Θεόδωρος)

κατηγόρηται μέν, ὦ ἄνδρεσ Ἀθηναῖοι, Ἐπικράτουσ ἱκανὰ καὶ τῶν συμπρεσβευτῶν· ἐνθυμεῖσθαι δὲ χρὴ ὅτι πολλάκισ ἠκούσατε τούτων λεγόντων, ὁπότε βούλοιντό τινα ἀδίκωσ ἀπολέσαι, ὅτι, εἰ μὴ καταψηφιεῖσθε ὧν αὐτοὶ κελεύουσιν, ἐπιλείψει ὑμᾶσ ἡ μισθοφορά. καὶ νῦν οὐδὲν ἧττον ἐνδεῖ·

ὥστε τὸ μὲν πάθοσ καὶ ἡ αἰσχύνη διὰ τούτων ὑμῖν γίγνεται, ἡ δ’ ὠφέλεια τούτοισ· πεπείρανται γὰρ ὅτι, ὁπόταν οὗτοι καὶ οἱ τούτων λόγοι δοκῶσιν αἴτιοι εἶναι ψηφιεῖσθαι ὑμᾶσ παρὰ τὸ δίκαιον, ῥᾳδίωσ παρὰ τῶν ἀδικούντων χρήματα λαμβάνουσι. καίτοι τίνα χρὴ ἐλπίδα ἔχειν σωτηρίασ, ὁπόταν ἐν χρήμασιν ᾖ καὶ σωθῆναι τῇ πόλει καὶ μή, ταῦτα δὲ οὗτοι, φύλακεσ ὑφ’ ὑμῶν καταστάντεσ, οἱ τῶν ἀδικούντων κολασταί, κλέπτωσί τε καὶ καταδωροδοκῶσι; καὶ οὐ νῦν πρῶτον ὤφθησαν ἀδικοῦντεσ, ἀλλὰ καὶ πρότερον ἤδη δώρων ἐκρίθησαν.

<ὃ> καὶ ὑμῖν ἔχω ἐπικαλέσαι ὅτι τοῦ αὐτοῦ ἀδικήματοσ Ὀνομάσαντοσ μὲν κατεψηφίσασθε, τούτου δὲ ἀπεψηφίσασθε, τοῦ αὐτοῦ ἀνδρὸσ ἁπάντων κατηγοροῦντοσ καὶ τῶν αὐτῶν καταμαρτυρούντων, οἳ οὐχ ἑτέρων ἤκουσαν, ἀλλ’ αὐτοὶ ἦσαν οἱ περὶ τῶν χρημάτων καὶ τῶν δώρων πρὸσ τούτουσ πράττοντεσ.

καίτοι τοῦτο ἅπαντεσ ἐπίστασθε, ὅτι οὐχ ὅταν τοὺσ μὴ δυναμένουσ λέγειν κολάζητε, τότε ἔσται παράδειγμα τοῦ μὴ ὑμᾶσ ἀδικεῖν, ἀλλ’ ὁπόταν παρὰ τῶν δυναμένων δίκην λαμβάνητε, τότε πάντεσ παύσονται ἐπιχειροῦντεσ εἰσ ὑμᾶσ ἐξαμαρτάνειν.

νῦν δ’ ἀσφαλῶσ αὐτοῖσ ἔχει τὰ ὑμέτερα κλέπτειν.

ἐὰν μὲν γὰρ λάθωσιν, ἀδεῶσ αὐτοῖσ ἕξουσι χρῆσθαι· ἐὰν δὲ ὀφθῶσιν, ἢ μέρει τῶν ἀδικημάτων τὸν κίνδυνον ἐξεπρίαντο, ἢ εἰσ ἀγῶνα καταστάντεσ τῇ αὑτῶν δυνάμει ἐσώθησαν. νῦν τοίνυν, ὦ ἄνδρεσ δικασταί, παράδειγμα ποιήσατε τοῖσ ἄλλοισ δικαίοισ εἶναι, παρὰ τούτων δίκην λαβόντεσ. ἥκουσι δὲ πάντεσ οἱ τὰ τῆσ πόλεωσ πράττοντεσ οὐχ ἡμῶν ἀκροασόμενοι, ἀλλ’ ὑμᾶσ εἰσόμενοι ἥντινα γνώμην περὶ τῶν ἀδικούντων ἕξετε.

ὥστ’ εἰ μὲν ἀποψηφιεῖσθε τούτων, οὐδὲν δεινὸν δόξει αὐτοῖσ εἶναι ὑμᾶσ ἐξαπατήσαντασ ἐκ τῶν ὑμετέρων ὠφελεῖσθαι· ἐὰν δὲ καταψηφισάμενοι θανάτου τιμήσητε, τῇ αὐτῇ ψήφῳ τούσ τε ἄλλουσ κοσμιωτέρουσ ποιήσετε ἢ νῦν εἰσι, καὶ παρὰ τούτων δίκην εἰληφότεσ ἔσεσθε. ἡγοῦμαι δ’, ὦ ἄνδρεσ Ἀθηναῖοι, οὐδ’ εἰ μὴ προθέντεσ αὐτοῖσ κρίσιν, ἢ ἀπολογουμένων μὴ ἐθελήσαντεσ ἀκοῦσαι, καταψηφισάμενοι τῶν ἐσχάτων τιμήσαιτε, οὐκ ἂν ἀκρίτουσ αὐτοὺσ ἀπολωλέναι, ἀλλὰ τὴν προσήκουσαν δίκην δεδωκέναι.

οὐ γὰρ οὗτοι ἄκριτοί εἰσι, περὶ ὧν ἂν ὑμεῖσ εἰδότεσ τὰ πραχθέντα ψηφίσησθε, ἀλλ’ οἵτινεσ ἂν ὑπὸ τῶν ἐχθρῶν διαβληθέντεσ περὶ ὧν ὑμεῖσ μὴ ἴστε, ἀκροάσεωσ μὴ τύχωσι. τούτων δὲ τὰ μὲν πράγματα κατηγορεῖ, ἡμεῖσ δὲ καταμαρτυροῦμεν· καὶ οὐ τοῦτο δέδοικα, ὡσ ἐὰν ἀκροᾶσθε αὐτῶν ἀποψηφιεῖσθε· ἀλλ’ οὐκ ἂν ἡγοῦμαι αὐτοὺσ δίκην ἀξίαν δεδωκέναι, εἰ ἀκροασάμενοι αὐτῶν καταψηφίσαισθε.

πῶσ γάρ, ὦ ἄνδρεσ δικασταί, οἷσ οὐδὲ ταὐτὰ καὶ ὑμῖν συμφέρει; οὗτοι μὲν γὰρ ἐν τῷ πολέμῳ ἐκ πενήτων πλούσιοι γεγόνασιν ἐκ τῶν ὑμετέρων, ὑμεῖσ δὲ διὰ τούτουσ πένητεσ. καίτοι οὐ ταῦτα ἀγαθῶν δημαγωγῶν ἐστι, τὰ ὑμέτερα ἐν ταῖσ ὑμετέραισ συμφοραῖσ λαμβάνειν, ἀλλὰ τὰ ἑαυτῶν ὑμῖν διδόναι.

καὶ γάρ τοι εἰσ τοσοῦτον ἥκομεν, ὥσθ’ οἳ πρότερον ἐν τῇ εἰρήνῃ οὐδὲ σφᾶσ αὐτοὺσ ἐδύναντο τρέφειν, νῦν ὑμῖν εἰσφορὰσ εἰσφέρουσι καὶ χορηγοῦσι καὶ οἰκίασ μεγάλασ οἰκοῦσι. καίτοι ἑτέροισ ὑμεῖσ ἔστιν ὅτε τὰ πατρῷα κεκτημένοισ ταῦτα ποιοῦσιν ἐφθονεῖτε·

νῦν δ’ οὕτωσ ἡ πόλισ διάκειται, ὥστε οὐκέτι ὧν οὗτοι κλέπτουσιν ὀργίζεσθε, ἀλλ’ ὧν αὐτοὶ λαμβάνετε χάριν ἴστε, ὥσπερ ὑμεῖσ τὰ τούτων μισθοφοροῦντεσ, ἀλλ’ οὐ τούτων τὰ ὑμέτερα κλεπτόντων. τὸ δὲ πάντων ὑπερφυέστατον, ὅτι ἐν μὲν τοῖσ ἰδίοισ <οἱ> ἀδικούμενοι δακρύουσι καὶ ἐλεινοί εἰσιν, ἐν δὲ τοῖσ δημοσίοισ οἱ μὲν ἀδικοῦντεσ ἐλεινοί, ὑμεῖσ δ’ οἱ ἀδικούμενοι ἐλεεῖτε.

καὶ νῦν ἴσωσ ποιήσουσιν ἅπερ καὶ πρότερον ἦσαν εἰθισμένοι καὶ δημόται καὶ φίλοι, κλαίοντεσ ἐξαιτεῖσθαι αὐτοὺσ παρ’ ὑμῶν. ἐγὼ δ’ οὕτωσ ἀξιῶ γενέσθαι·

εἰ μὲν ἀδικεῖν τούτουσ μηδὲν νομίζουσιν, ἀποδείξαντασ ὡσ ψευδῆ τὰ κατηγορημένα, οὕτωσ πείθειν ὑμᾶσ ἀποψηφίσασθαι· εἰ δὲ νομίσαντεσ ἀδικεῖν αἰτήσονται, δῆλον ὅτι τοῖσ ἀδικοῦσιν εὐνούστεροί εἰσιν ἢ ὑμῖν τοῖσ ἀδικουμένοισ, ὥστ’ οὐ χάριτοσ ἄξιοι τυχεῖν ἀλλὰ τιμωρίασ, ὁπόταν ὑμεῖσ δύνησθε. ἔτι δὲ τοὺσ αὐτοὺσ ἡγεῖσθαι χρὴ καὶ τῶν κατηγόρων σφόδρα δεδεῆσθαι, νομίζοντασ πολὺ ἂν θᾶττον παρ’ ἡμῶν ὀλίγων ὄντων ταύτην τὴν χάριν λαμβάνειν ἢ παρ’ ὑμῶν, ἔτι δὲ ῥᾷον ἄλλουσ τινὰσ <τὰ> ὑμέτερα καταχαρίζεσθαι ἢ ὑμᾶσ αὐτούσ γε.

ἡμεῖσ μὲν τοίνυν οὐκ ἠθελήσαμεν προδοῦναι, ἀξιοῦμεν δὲ μηδ’ ὑμᾶσ, ἐνθυμουμένουσ ὅτι σφόδρ’ ἂν ἡμῖν ὠργίζεσθε καὶ ἐτιμωρεῖσθε, ὅπου παρεπίπτομεν, ὡσ εἰκὸσ τοὺσ ἀδικοῦντασ, εἰ ἡμεῖσ παρὰ τούτων ἢ χρήματα λαβόντεσ ἢ ἄλλῳ τινὶ τρόπῳ διηλλάγημεν.

καίτοι εἰ τοῖσ μὴ δικαίωσ ἐπεξιοῦσιν ὀργίζεσθε, ἦ που σφόδρα χρὴ αὐτοὺσ τοὺσ ἀδικοῦντασ τιμωρεῖσθαι. νῦν τοίνυν, ὦ ἄνδρεσ δικασταί, καταψηφισάμενοι Ἐπικράτουσ τῶν ἐσχάτων τιμήσατε, καὶ μή, ὥσπερ ἐν τῷ τέωσ χρόνῳ εἰθισμένοι ἐστέ, ἐπειδὰν καταψηφισάμενοι ἐξελέγξητε τοὺσ ἀδικοῦντασ, ἐν τῷ τιμήματι ἀζημίουσ ἀφίετε, ἔχθραν, οὐ δίκην παρὰ τῶν ἀδικούντων λαμβάνοντεσ, ὥσπερ τοῦ ὀνείδουσ ἀλλ’ οὐ τῆσ ζημίασ αὐτοῖσ μέλον, εὖ εἰδότεσ ὅτι ἐν μὲν τῇ ψήφῳ οὐδὲν ἄλλο ποιεῖτε ἢ ὀνειδίζετε τοῖσ ἀδικοῦσιν, ἐν δὲ τῷ τιμήματι τιμωρεῖσθε τοὺσ ἐξαμαρτάνοντασ.

MENU NAVIGATION

호흡부호 보기

강세부호 보기

장단부호 보기

작은 Iota 보기

모든 부호 보기

헬라어 텍스트

Lysias, Speeches, Κατὰ Ἐπικράτουσ καὶ τῶν συμπρεσβευτῶν ἐπίλογοσ ὡσ Θεόδωρος

(리시아스, Speeches, Κατὰ Ἐπικράτουσ καὶ τῶν συμπρεσβευτῶν ἐπίλογοσ ὡσ Θεόδωρος)

상위

목록

SEARCH

MENU NAVIGATION