Lysias, Speeches, Δήμου καταλύσεωσ ἀπολογία 26:

σκοπεῖν δὲ χρὴ καὶ ἐκ τῶνδε, ὦ ἄνδρεσ δικασταί. πάντεσ γὰρ ἐπίστασθε ὅτι ἐν τῇ προτέρᾳ δημοκρατίᾳ τῶν τὰ τῆσ πόλεωσ πραττόντων πολλοὶ μὲν τὰ δημόσια ἔκλεπτον, ἔνιοι δ’ ἐπὶ τοῖσ ὑμετέροισ ἐδωροδόκουν, οἱ δὲ συκοφαντοῦντεσ τοὺσ συμμάχουσ ἀφίστασαν. καὶ εἰ μὲν οἱ τριάκοντα τούτουσ μόνουσ ἐτιμωροῦντο, ἄνδρασ ἀγαθοὺσ καὶ ὑμεῖσ ἂν αὐτοὺσ ἡγεῖσθε· νῦν δέ, ὅτε ὑπὲρ τῶν ἐκείνοισ ἡμαρτημένων τὸ πλῆθοσ κακῶσ ποιεῖν ἠξίουν, ἠγανακτεῖτε, ἡγούμενοι δεινὸν εἶναι τὰ τῶν ὀλίγων ἀδικήματα πάσῃ τῇ πόλει κοινὰ γίγνεσθαι.