Apollodorus, Library and Epitome, book 3, chapter 12 6:

(아폴로도로스, Library and Epitome, book 3, chapter 12 6:)

Ἕκτωρ μὲν οὖν Ἀνδρομάχην τὴν Ηἐτίωνοσ γαμεῖ, Ἀλέξανδροσ δὲ Οἰνώνην τὴν Κεβρῆνοσ τοῦ ποταμοῦ θυγατέρα. αὕτη παρὰ Ῥέασ τὴν μαντικὴν μαθοῦσα προέλεγεν Ἀλεξάνδρῳ μὴ πλεῖν ἐπὶ Ἑλένην. μὴ πείθουσα δὲ εἶπεν, ἐὰν τρωθῇ, παραγενέσθαι πρὸσ αὐτήν· μόνην γὰρ θεραπεῦσαι δύνασθαι. τὸν δὲ Ἑλένην ἐκ Σπάρτησ ἁρπάσαι, πολεμουμένησ δὲ Τροίασ τοξευθέντα ὑπὸ Φιλοκτήτου τόξοισ Ἡρακλείοισ πρὸσ Οἰνώνην ἐπανελθεῖν εἰσ Ἴδην. ἡ δὲ μνησικακοῦσα θεραπεύσειν οὐκ ἔφη. Ἀλέξανδροσ μὲν οὖν εἰσ Τροίαν κομιζόμενοσ ἐτελεύτα, Οἰνώνη δὲ μετανοήσασα τὰ πρὸσ θεραπείαν φάρμακα ἔφερε, καὶ καταλαβοῦσα αὐτὸν νεκρὸν ἑαυτὴν ἀνήρτησεν. ὁ δὲ Ἀσωπὸσ ποταμὸσ Ὠκεανοῦ καὶ Τηθύοσ, ὡσ δὲ Ἀκουσίλαοσ λέγει, Πηροῦσ καὶ Ποσειδῶνοσ, ὡσ δέ τινεσ, Διὸσ καὶ Εὐρυνόμησ. τούτῳ Μετώπη γημαμένη Λάδωνοσ δὲ τοῦ ποταμοῦ θυγάτηρ αὕτη δύο μὲν παῖδασ ἐγέννησεν, Ἰσμηνὸν καὶ Πελάγοντα, εἴκοσι δὲ θυγατέρασ, ὧν μὲν μίαν Αἴγιναν ἡρ́πασε Ζεύσ. ταύτην Ἀσωπὸσ ζητῶν ἧκεν εἰσ Κόρινθον, καὶ μανθάνει παρὰ Σισύφου τὸν ἡρπακότα εἶναι Δία. Ζεὺσ δὲ Ἀσωπὸν μὲν κεραυνώσασ διώκοντα πάλιν ἐπὶ τὰ οἰκεῖα ἀπέπεμψε ῥεῖθρα διὰ τοῦτο μέχρι καὶ νῦν ἐκ τῶν τούτου ῥείθρων ἄνθρακεσ φέρονται, Αἴγιναν δὲ κομίσασ εἰσ τὴν τότε Οἰνώνην λεγομένην νῆσον, νῦν δὲ Αἴγιναν ἀπ’ ἐκείνησ κληθεῖσαν, μίγνυται, καὶ τεκνοῖ παῖδα ἐξ αὐτῆσ Αἰακόν. τούτῳ Ζεὺσ ὄντι μόνῳ ἐν τῇ νήσῳ τοὺσ μύρμηκασ ἀνθρώπουσ ἐποίησε. γαμεῖ δὲ Αἰακὸσ Ἐνδηίδα τὴν Σκείρωνοσ, ἐξ ἧσ αὐτῷ παῖδεσ ἐγένοντο Πηλεύσ τε καὶ Τελαμών. Φερεκύδησ δέ φησι Τελαμῶνα φίλον, οὐκ ἀδελφὸν Πηλέωσ εἶναι, ἀλλ’ Ἀκταίου παῖδα καὶ Γλαύκησ τῆσ Κυχρέωσ. μίγνυται δὲ αὖθισ Αἰακὸσ Ψαμάθῃ τῇ Νηρέωσ εἰσ φώκην ἠλλαγμένῃ διὰ τὸ μὴ βούλεσθαι συνελθεῖν, καὶ τεκνοῖ παῖδα Φῶκον. ἦν δὲ εὐσεβέστατοσ πάντων Αἰακόσ. διὸ καὶ τὴν Ἑλλάδα κατεχούσησ ἀφορίασ διὰ Πέλοπα, ὅτι Στυμφάλῳ τῷ βασιλεῖ τῶν Ἀρκάδων πολεμῶν καὶ τὴν Ἀρκαδίαν ἑλεῖν μὴ δυνάμενοσ, προσποιησάμενοσ φιλίαν ἔκτεινεν αὐτὸν καὶ διέσπειρε μελίσασ, χρησμοὶ θεῶν ἔλεγον ἀπαλλαγήσεσθαι τῶν ἐνεστώτων κακῶν τὴν Ἑλλάδα, ἐὰν Αἰακὸσ ὑπὲρ αὐτῆσ εὐχὰσ ποιήσηται ποιησαμένου δὲ εὐχὰσ Αἰακοῦ τῆσ ἀκαρπίασ ἡ Ἑλλὰσ ἀπαλλάττεται. τιμᾶται δὲ καὶ παρὰ Πλούτωνι τελευτήσασ Αἰακόσ, καὶ τὰσ κλεῖσ τοῦ Αἵδου φυλάττει. διαφέροντοσ δὲ ἐν τοῖσ ἀγῶσι Φώκου, τοὺσ ἀδελφοὺσ Πηλέα καὶ Τελαμῶνα ἐπιβουλεῦσαι· καὶ λαχὼν κλήρῳ Τελαμὼν συγγυμναζόμενον αὐτὸν βαλὼν δίσκῳ κατὰ τῆσ κεφαλῆσ κτείνει, καὶ κομίσασ μετὰ Πηλέωσ κρύπτει κατά τινοσ ὕλησ. φωραθέντοσ δὲ τοῦ φόνου φυγάδεσ ἀπὸ Αἰγίνησ ὑπὸ Αἰακοῦ ἐλαύνονται.

일치하는 문장이 없습니다.

SEARCH

MENU NAVIGATION