헬라어 문장 검색 - ΑριστίΟρατιον́33́0́010́

(아리스티데스, 아일리오스, 연설, Λευκτρικὸσ α# ὑπὲρ Λακεδαιμονίων πρῶτος 10:)

τί ποτ’ οὖν τὸ αἴτιον; ἆρά γε βάσκανοι καὶ πονηροὶ τοὺσ τρόπουσ οὕτωσ ὑμεῖσ ἐστὲ καὶ ὑπερβεβλήκατε πάντασ ἀνθρώπουσ πονηρίᾳ καὶ κακίᾳ ὥστε τοῖσ φίλοισ ἂν ἀγαθόν τι πράξωσιν ἄχθεσθαι καὶ φθονεῖν; οὐκ ἔστι ταῦτα. χάριέν γε νὴ τὸν Δία καὶ τοῦτ’ αὐτὸ φάσκειν. οὐκ ἔστιν. ἀλλὰ τί; σύμφυτόν ἐστι τῇ πόλει ταύτῃ πάλαι τὸ παρὰ πᾶσιν εὐδοκιμοῦν, ὃ οὔτε εἰσ Μεγαρέασ διέβη τουτουσὶ πλησιοχώρουσ ὄντασ οὔτε εἰσ τοὺσ δευτέρουσ τοὺσ μεγίστουσ τῶν Ἑλλήνων τουτουσὶ τοὺσ νῦν ἀθλίουσ Λακεδαιμονίουσ, ἀλλ’ ἐνταῦθα καὶ ἔφυ καὶ ἤκμασεν εὐθὺσ ἐξ ἀρχῆσ. τί οὖν ἐστι τοῦτο; ῥοπὴ πρὸσ τοὺσ ἀσθενεῖσ καὶ ἔλεοσ τῶν ἀτυχούντων οὐ κενὸσ, ἀλλὰ διαρκὴσ εἰσ σωτηρίαν. τοῦτο οὔτε μνησικακεῖν ἐᾷ τὴν πόλιν οὔτε ἐξετάζειν τίσ ἐστιν ὁ δυστυχῶν, ἀλλ’ ἐπειδάν τινα αἴσθηται κακῶσ πράττοντα, εὐθέωσ ἐπελάθετο ὧν αὐτὴ πέπονθε. διὸ καὶ πᾶσιν ἀνθρώποισ ἱκανόν ἐστι πρὸσ αὐτὴν ὥσπερ ἄλλο τι σύμβολον αὐτὸ τὸ σχῆμα τῆσ ἀτυχίασ. διὰ τοῦτο καὶ Θηβαίουσ προσήκατο καὶ Λακεδαιμονίουσ, ὅτε πρῶτον ἐπὶ τῶν Ἡρακλειδῶν ἔγνω δυστυχοῦντασ, κατῴκτειρε. περὶ τοίνυν τῶν εὐεργεσιῶν, ἃσ εἴποι τισ ἂν ὡσ ὑπῆρξαν εἰσ ἡμᾶσ οἱ Θηβαῖοι, τοῦτο μὲν οὐ συνεπιστρατεύσαντεσ Λακεδαιμονίοισ ἐπὶ τὸν Πειραιᾶ, τοῦτο δὲ Θρασύβουλον δεξάμενοι, βλασφημήσω μὲν οὐδὲν, καὶ γὰρ ἂν μαινοίμην. καίτοι τινὸσ ἤδη λέγοντοσ ἤκουσα ὡσ ἄρα οὐχὶ τοῦ μὴ συνεπιστρατεῦσαι δεῖ χάριν αὐτοῖσ ἔχειν μᾶλλον ἢ μέμφεσθαι, καὶ νὴ Δί’, ἐκεῖνόσ γ’ ἔφη, καὶ μισεῖν ἀντὶ τῆσ αἰτίασ, δι’ ἣν τοῦτ’ ἐποίησαν. ἔφασκε γὰρ αὐτοὺσ ἀποτυχόντασ τοῦ διαφθεῖραι τὴν πόλιν ἡμῶν ἀγανακτεῖν. ἐγὼ δὲ ταῦτα μὲν τοῖσ ταῦτα βουλομένοισ λέγειν παρίημι· αὐτὸσ δὲ τί φημι; εἰ μὲν ἔν τινι κινδύνῳ καθεστηκότεσ ἦσαν οἱ Θηβαῖοι, δικαίωσ ταῦτ’ ἄν τισ ἡμᾶσ ἀνεμίμνησκεν, οὐκ ἀξιῶν συνεπιστρατεύειν ἐπὶ τὴν πόλιν αὐτῶν, ὥσπερ οὐδὲ ἐκεῖνοι πρότερον τοῖσ αὐτοῖσ τούτοισ Λακεδαιμονίοισ ἐπὶ τὴν ἡμετέραν, ὅτε φαύλωσ διέκειτο. ὑπὲρ δὲ τῆσ Λακεδαιμονίων σωτηρίασ ὄντοσ τοῦ λόγου, τί δεῖ τοῖσ ἔξωθεν τούτοισ παράγειν ὑμᾶσ;

MENU NAVIGATION

호흡부호 보기

강세부호 보기

장단부호 보기

작은 Iota 보기

모든 부호 보기

헬라어 텍스트

Aristides, Aelius, Orationes, Λευκτρικὸσ α# ὑπὲρ Λακεδαιμονίων πρῶτος 10:

(아리스티데스, 아일리오스, 연설, Λευκτρικὸσ α# ὑπὲρ Λακεδαιμονίων πρῶτος 10:)

상위

목록

SEARCH

MENU NAVIGATION