헬라어 문장 검색 - ΠολψβίΗιστορί18́028́

(폴리비오스, Histories, book 18, chapter 28)

ἀπέβη τὸ τέλοσ· ἐγὼ δὲ κατὰ μὲν τὴν ἕκτην βύβλον ἐν ἐπαγγελίᾳ καταλιπὼν ὅτι λαβὼν τὸν ἁρμόζοντα καιρὸν σύγκρισιν ποιήσομαι τοῦ καθοπλισμοῦ Ῥωμαίων καὶ Μακεδόνων, ὁμοίωσ δὲ καὶ τῆσ συντάξεωσ τῆσ ἑκατέρων, τί διαφέρουσιν ἀλλήλων πρὸσ τὸ χεῖρον καὶ τί πρὸσ τὸ βέλτιον, νῦν ἐπ’ αὐτῶν τῶν πράξεων πειράσομαι τὴν ἐπαγγελίαν ἐπὶ τέλοσ ἀγαγεῖν. ἵνα μὴ τύχην λέγοντεσ μόνον μακαρίζωμεν τοὺσ κρατοῦντασ ἀλόγωσ, καθάπερ οἱ μάταιοι τῶν ἀνθρώπων, ἀλλ’ εἰδότεσ τὰσ ἀληθεῖσ αἰτίασ ἐπαινῶμεν καὶ θαυμάζωμεν κατὰ λόγον τοὺσ ἡγουμένουσ.

Περὶ μὲν οὖν τῶν πρὸσ Ἀννίβαν ἀγώνων γεγονότων Ῥωμαίοισ καὶ τῶν ἐν τούτοισ ἐλαττωμάτων οὐδὲν ἂν δέοι πλείω λέγειν·

οὐ γὰρ παρὰ τὸν καθοπλισμὸν οὐδὲ παρὰ τὴν σύνταξιν, ἀλλὰ παρὰ τὴν ἐπιδεξιότητα τὴν Ἀννίβου καὶ τὴν ἀγχίνοιαν περιέπιπτον τοῖσ ἐλαττώμασι. δῆλον δὲ τοῦτο πεποιήκαμεν ἡμεῖσ ἐπ’ αὐτῶν ὑποδεικνύοντεσ τῶν ἀγώνων.

μαρτυρεῖ δὲ τοῖσ ἡμετέροισ λόγοισ πρῶτον μὲν τὸ τέλοσ τοῦ πολέμου·

προσγενομένου γὰρ στρατηγοῦ τοῖσ Ῥωμαίοισ παραπλησίαν δύναμιν ἔχοντοσ Ἀννίβᾳ, ταχέωσ καὶ τὸ νικᾶν συνεξηκολούθησε τοῖσ προειρημένοισ· εἶτα καὶ αὐτὸσ Ἀννίβασ ἀποδοκιμάσασ τὸν ἐξ ἀρχῆσ αὐτοῖσ ὑπάρχοντα καθοπλισμόν, ἅμα τῷ νικῆσαι τῇ πρώτῃ μάχῃ παραχρῆμα τοῖσ Ῥωμαίων ὅπλοισ καθοπλίσασ τὰσ οἰκείασ δυνάμεισ, τούτοισ διετέλεσε χρώμενοσ τὸν ἑξῆσ χρόνον.

Πύρροσ γε μὴν οὐ μόνον ὅπλοισ, ἀλλὰ καὶ δυνάμεσιν Ἰταλικαῖσ συγκέχρηται, τιθεὶσ ἐναλλὰξ σημαίαν καὶ σπεῖραν φαλαγγιτικὴν ἐν τοῖσ πρὸσ Ῥωμαίουσ ἀγῶσιν.

ἀλλ’ ὅμωσ οὐδ’ οὕτωσ ἐδύνατο νικᾶν, ἀλλ’ ἀεί πωσ ἀμφίδοξα τὰ τέλη τῶν κινδύνων αὐτοῖσ ἀπέβαινε.

Περὶ μὲν οὖν τούτων ἀναγκαῖον ἦν προειπεῖν χάριν τοῦ μηδὲν ἀντεμφαίνειν ταῖσ ἡμετέραισ ἀποφάσεσιν·

ἐπάνειμι δ’ ἐπὶ τὴν προκειμένην σύγκρισιν.

MENU NAVIGATION

호흡부호 보기

강세부호 보기

장단부호 보기

작은 Iota 보기

모든 부호 보기

Ancient Greek Text

Polybius, Histories, book 18, chapter 28

(폴리비오스, Histories, book 18, chapter 28)

상위

목록

SEARCH

MENU NAVIGATION