Dionysius of Halicarnassus, Antiquitates Romanae, Books X-XX, book 10, chapter 52

(디오니시오스, Antiquitates Romanae, Books X-XX, book 10, chapter 52)

προστιθέμενοι τῇ γνώμῃ. μέλλοντοσ δὲ γράφεσθαι τοῦ προβουλεύματοσ ἀναστὰσ ὁ δήμαρχοσ Σίκκιοσ ὁ τῷ Ῥωμιλίῳ προσθεὶσ τὴν δίκην πολὺν ὑπὲρ τοῦ ἀνδρὸσ διῆλθε λόγον ἐπαινῶν τὴν μεταβολὴν τῆσ γνώμησ καὶ τὸ μὴ τὰ ἴδια ἔχθη κρείττονα γίνεσθαι τῶν κοινῇ χρησίμων, ἀλλ’ ἀπ’ ὀρθῆσ γνώμησ τὰ συμφέροντα ἀποδείξασθαι· ἀνθ’ ὧν, ἔφη, ταύτην αὐτῷ ἀποδίδωμι τιμὴν καὶ χάριν·

ἀφίημι τῶν ἐκτισμάτων ἐπὶ τῇ δίκῃ καὶ εἰσ τὸ λοιπὸν διαλλάττομαι· νικᾷ γὰρ ἡμᾶσ χρηστὸσ ὤν.

τὸ δ’ αὐτὸ καὶ οἱ ἄλλοι δήμαρχοι παριόντεσ ὡμολόγουν. οὐ μὴν ὅ γε Ῥωμίλιοσ ὑπέμεινε ταύτην λαβεῖν τὴν χάριν, ἀλλ’ ἐπαινέσασ τοὺσ δημάρχουσ τῆσ προθυμίασ ἀποδώσειν ἔφη τὴν καταδίκην. ἱερὰν γὰρ ἤδη τῶν θεῶν εἶναι, καὶ οὔτε δίκαια οὔτε ὅσια ποιεῖν ἀποστερῶν τοὺσ θεούσ, ἃ δίδωσιν αὐτοῖσ ὁ νόμοσ· καὶ ἐποίησεν οὕτωσ.

γραφέντοσ δὲ τοῦ προβουλεύματοσ, καὶ μετὰ ταῦτ’ ἐπικυρώσαντοσ τοῦ δήμου πρέσβεισ ἀπεδείχθησαν οἱ τοὺσ παρὰ τῶν Ἑλλήνων νόμουσ ληψόμενοι, Σπόριοσ Ποστόμιοσ καὶ Σερούιοσ Σολπίκιοσ καὶ Αὖλοσ Μάλλιοσ· ἐκ τοῦ δημοσίου καὶ ἄλλοσ κόσμοσ εἰσ ἐπίδειξιν τῆσ ἡγεμονίασ ἀποχρῶν.

καὶ τὸ ἔτοσ ἐτελεύτα.

SEARCH

MENU NAVIGATION