Dionysius of Halicarnassus, Antiquitates Romanae, Books X-XX, book 10, chapter 11

(디오니시오스, Antiquitates Romanae, Books X-XX, book 10, chapter 11)

ἐν τοσούτῳ δὴ κινδύνῳ σαλεύοντεσ ἱκέται γινόμεθα ὑμῶν, ὦ πατέρεσ, ἐπισκήπτοντεσ θεούσ τε καὶ δαίμονασ, οἷσ κοινῇ θύομεν, καὶ πολέμων ὑπομιμνήσκοντεσ, οὓσ πολλοὺσ καὶ μεγάλουσ σὺν ὑμῖν ἠράμεθα, μὴ περιιδεῖν ὠμὰ καὶ ἀνόσια ὑπὸ τῶν ἐχθρῶν παθόντασ ἡμᾶσ, ἀλλ’ ἐπαμῦναί τε καὶ συναγανακτῆσαι τιμωρίασ ἡμῖν συνεισπράξαντασ παρὰ τῶν ταῦτα βουλευσαμένων τὰσ προσηκούσασ, μάλιστα μὲν παρὰ πάντων, εἰ δὲ μή γε, παρὰ τῶν ἀρξάντων τῆσ ἀθεμίτου συνωμοσίασ. πρῶτον δὲ πάντων ἀξιοῦμεν ὑμᾶσ, ὦ βουλή, ψηφίσασθαι πρᾶγμα, ὅπερ ἐστὶ δικαιότατον, τὴν ὑπὲρ τῶν μηνυομένων ζήτησιν ὑφ’ ἡμῶν τῶν δημάρχων γίνεσθαι.

ἀκριβεστάτασ ἀνάγκη γίνεσθαι ζητήσεισ, ἃσ ἂν οἱ κινδυνεύοντεσ ὑπὲρ αὑτῶν ποιήσωνται.

εἰ δέ τινεσ ὑμῶν εἰσιν οἱοῖ μηδὲ καθ’ ἓν εὐγνωμονεῖν, ἀλλὰ πρὸσ ἅπαντασ τοὺσ ὑπὲρ τοῦ δήμου λέγοντασ ἀντιτάττεσθαι, ἡδέωσ ἂν πυθοίμην παρ’ αὐτῶν, ἐπὶ τῷ δυσχεραίνουσι τῶν ἀξιουμένων καὶ τί μέλλουσιν ὑμᾶσ πείθειν·

πότερα μηδεμίαν ποιεῖσθαι ζήτησιν, ἀλλ’ ὑπεριδεῖν ἔργον οὕτω μέγα καὶ μιαρὸν ἐπὶ τῷ δήμῳ συνιστάμενον; καὶ τίσ ἂν τοὺσ ταῦτα λέγοντασ ὑγιαίνειν φήσειεν, ἀλλ’ οὐχὶ συνδιεφθάρθαι καὶ κοινωνεῖν τῆσ συνωμοσίασ, ἔπειτα ὑπὲρ αὑτῶν δεδιότασ, ἵνα μὴ γένωνται καταφανεῖσ, ἀποσπεύδειν τὴν τῆσ ἀληθείασ ἐξέτασιν; οἷσ οὐκ ἂν δικαίωσ προσέχοιτε δήπου τὸν νοῦν. ἢ τῆσ διαγνώσεωσ τῶν μηνυομένων οὐχ ἡμᾶσ εἶναι κυρίουσ ἀξιώσουσιν, ἀλλὰ τὴν βουλὴν καὶ τοὺσ ὑπάτουσ;

τί οὖν τὸ κωλύον ἔσται τὸ αὐτὸ τοῦτο καὶ τοὺσ προεστηκότασ τοῦ δήμου λέγειν, ἐάν τινεσ ἐκ τῶν δημοτικῶν ἐπὶ τοῖσ ὑπάτοισ καὶ τῇ βουλῇ συστάντεσ πράττωσι τὴν τοῦ συνεδρίου κατάλυσιν, ὅτι τὴν περὶ τῶν δημοτῶν ἐξέτασιν αὐτοὺσ δίκαιόν ἐστι ποιεῖσθαι τοὺσ ἀνειληφότασ τὴν τοῦ δήμου φυλακήν; τί οὖν ἐκ τούτου συμβήσεται;

μηδεμίαν πώποτε γενέσθαι ζήτησιν περὶ μηθενὸσ πράγματοσ ἀπορρήτου. ἀλλ’ οὔθ’ ἡμεῖσ ἂν ταῦτ’ ἀξιώσαιμεν·

ὕποπτοσ γὰρ ἡ φιλοτιμία· ὑμεῖσ τ’ οὐκ ἂν ὀρθῶσ ποιοῖτε τοῖσ τὰ ὅμοια ἀξιοῦσι καθ’ ἡμῶν προσέχοντεσ τὸν νοῦν, ἀλλὰ κοινοὺσ ἡγούμενοι τῆσ πόλεωσ ἐχθρούσ. οὐδενὸσ μέντοιγε, ὦ βουλή, τοῖσ πράγμασιν ὡσ τάχουσ δεῖ. ὁ γὰρ κίνδυνοσ ὀξύσ, καὶ ἡ μέλλησισ τῆσ ἀσφαλείασ ἀώροσ ἐν οὐ μέλλουσι δεινοῖσ. ὥστ’ ἀφέντεσ τὸ φιλονεικεῖν καὶ λόγουσ διεξιέναι μακροὺσ ψηφίσασθε ὅ τι ἂν δοκῇ κοινῇ συμφέρειν ἤδη.

SEARCH

MENU NAVIGATION