Appian, The Civil Wars, book 2, chapter 6 2:

(아피아노스, The Civil Wars, book 2, chapter 6 2:)

Αὐτὸσ δ’ ὁ Πομπήιοσ τῶν ἀμφ’ αὑτὸν ἤδη τελῶν τὰ μὲν ἔδωκε τοῖσ ὑπάτοισ προαπάγειν ἐσ Ἤπειρον ἐκ Βρεντεσίου, καὶ διέπλευσαν οἵδε αὐτίκα ἀσφαλῶσ ἐσ Δυρράχιον· ἣν Ἐπίδαμνόν τινεσ εἶναι νομίζουσι διὰ τοιάνδε ἄγνοιαν. βασιλεὺσ τῶν τῇδε βαρβάρων, Ἐπίδαμνοσ, πόλιν ᾤκισεν ἐπὶ θαλάσσησ καὶ ἀφ’ ἑαυτοῦ προσεῖπεν Ἐπίδαμνον. τούτου θυγατριδοῦσ Δύρραχοσ, νομιζόμενοσ εἶναι Ποσειδῶνοσ, ἐπίνειον ᾤκισε τῇ πόλει καὶ Δυρράχιον ὠνόμασε. πολεμουμένῳ δ’ ὑπὸ τῶν ἀδελφῶν τῷδε τῷ Δυρράχῳ συνεμάχησεν ὁ Ἡρακλῆσ ἐπὶ μέρει τῆσ γῆσ, ἐξ Ἐρυθείασ ἐπανιών· ὅθεν οἱ Δυρράχιοι τὸν Ἡρακλέα, ὡσ μερίτην τῆσ γῆσ, οἰκιστὴν σφῶν τίθενται, οὐκ ἀρνούμενοι μὲν οὐδὲ τὸν Δύρραχον, φιλοτιμούμενοι δ’ ὑπὲρ σφῶν ἐσ τὸν Ἡρακλέα μᾶλλον ὡσ ἐσ θεόν. φασὶ δ’ ἐν τῇ μάχῃ τῇδε Δυρράχου παῖδα Ιὄνιον ὑφ’ Ἡρακλέουσ ἐξ ἀγνοίασ ἀποθανεῖν καὶ τὸν Ἡρακλέα τὸ σῶμα θάψαντα ἐμβαλεῖν ἐσ τὸ πέλαγοσ, ἵνα ἐπώνυμον αὐτοῦ γένοιτο. χρόνῳ δὲ τῆσ τε χώρασ καὶ πόλεωσ κατασχεῖν Βρίγασ ἐκ Φρυγῶν ἐπανελθόντασ καὶ Ταυλαντίουσ ἐπ’ ἐκείνοισ, Ἰλλυρικὸν ἔθνοσ, ἐπὶ δὲ τοῖσ Ταυλαντίοισ ἕτερον γένοσ Ἱλλυριῶν Λιβυρνούσ, οἳ τὰ περίοικα νηυσὶ ταχείαισ ἐληίζοντο· καὶ Λιβυρνίδασ ἐντεῦθεν ἡγοῦνται Ῥωμαῖοι τὰσ ναῦσ τὰσ ταχείασ, ὧν ἄρα πρώτων ἐσ πεῖραν ἦλθον. οἱ δ’ ἐκ τῶν Λιβυρνῶν ἐξελαθέντεσ ἀπὸ τοῦ Δυρραχίου Κερκυραίουσ ἐπαγόμενοι θαλασσοκρατοῦντασ ἐξέβαλον τοὺσ Λιβυρνούσ· καὶ αὐτοῖσ οἱ Κερκυραῖοι σφετέρουσ ἐγκατέμιξαν οἰκήτορασ, ὄθεν Ἑλληνικὸν εἶναι δοκεῖ τὸ ἐπίνειον. τὴν δ’ ἐπίκλησιν ὡσ οὐκ αἶσιον ἐναλλάξαντεσ οἱ Κερκυραῖοι καὶ τήνδε ἀπὸ τῆσ ἄνω πόλεωσ Ἐπίδαμνον ἐκάλουν, καὶ Θουκυδίδησ οὕτωσ ὠνόμαζεν· ἐκνικᾷ δ’ ὅμωσ τὸ ὄνομα, καὶ Δυρράχιον κληίζεται.

일치하는 문장이 없습니다.

SEARCH

MENU NAVIGATION