헬라어 텍스트

Polybius, Histories, book 3, chapter 43

(폴리비오스, Histories, book 3, chapter 43)

ὁ δ’ Ἀννίβασ ἑτοίμουσ ἔχων τοὺσ στρατιώτασ ἐπεῖχε τῇ διαβάσει, τοὺσ μὲν λέμβουσ πεπληρωκὼσ τῶν πελτοφόρων ἱππέων, τὰ δὲ μονόξυλα τῶν εὐκινητοτάτων πεζῶν. εἶχον δὲ τὴν μὲν ἐξ ὑπερδεξίου καὶ παρὰ τὸ ῥεῦμα τάξιν οἱ λέμβοι, τὴν δ’ ὑπὸ τούτουσ τὰ λεπτὰ τῶν πορθμείων, ἵνα τὸ πολὺ τῆσ τοῦ ῥεύματοσ βίασ ἀποδεχομένων τῶν λέμβων ἀσφαλεστέρα γίνοιτο τοῖσ μονοξύλοισ ἡ παρακομιδὴ διὰ τοῦ πόρου.

κατὰ δὲ τὰσ πρύμνασ τῶν λέμβων ἐφέλκειν διενοοῦντο τοὺσ ἵππουσ νέοντασ, τρεῖσ ἅμα καὶ τέτταρασ τοῖσ ἀγωγεῦσιν ἑνὸσ ἀνδρὸσ ἐξ ἑκατέρου τοῦ μέρουσ τῆσ πρύμνησ οἰακίζοντοσ, ὥστε πλῆθοσ ἱκανὸν ἵππων συνδιακομίζεσθαι κατὰ τὴν πρώτην εὐθέωσ διάβασιν.

οἱ δὲ βάρβαροι θεωροῦντεσ τὴν ἐπιβολὴν τῶν ὑπεναντίων ἀτάκτωσ ἐκ τοῦ χάρακοσ ἐξεχέοντο καὶ σποράδην, πεπεισμένοι κωλύειν εὐχερῶσ τὴν ἀπόβασιν τῶν Καρχηδονίων.

Ἀννίβασ δ’ ἅμα τῷ συνιδεῖν ἐν τῷ πέραν ἐγγίζοντασ ἤδη τοὺσ παρ’ αὑτοῦ στρατιώτασ, σημηνάντων ἐκείνων τὴν παρουσίαν τῷ καπνῷ κατὰ τὸ συντεταγμένον, ἐμβαίνειν ἅπασιν ἅμα παρήγγελλε καὶ βιάζεσθαι πρὸσ τὸ ῥεῦμα τοῖσ ἐπὶ τῶν πορθμείων τεταγμένοισ.

τῶν δὲ στρατοπέδων ἀμφοτέρων ἐξ ἑκατέρου τοῦ μέρουσ παρὰ τὰ χείλη τοῦ ποταμοῦ παρεστώτων, καὶ τῶν μὲν ἰδίων συναγωνιώντων καὶ παρακολουθούντων μετὰ κραυγῆσ, τῶν δὲ κατὰ πρόσωπον βαρβάρων παιανιζόντων καὶ προκαλουμένων τὸν κίνδυνον, ἦν τὸ γινόμενον ἐκπληκτικὸν καὶ παραστατικὸν ἀγωνίασ.

ἐν ᾧ καιρῷ τῶν βαρβάρων ἀπολελοιπότων τὰσ σκηνὰσ ἐπιπεσόντεσ ἄφνω καὶ παραδόξωσ οἱ πέραν Καρχηδόνιοι, τινὲσ μὲν αὐτῶν ἐνεπίμπρασαν τὴν στρατοπεδείαν, οἱ δὲ πλείουσ ὡρ́μησαν ἐπὶ τοὺσ τὴν διάβασιν τηροῦντασ.

οἱ δὲ βάρβαροι, παραλόγου τοῦ πράγματοσ φανέντοσ αὐτοῖσ, οἱ μὲν ἐπὶ τὰσ σκηνὰσ ἐφέροντο βοηθήσοντεσ, οἱ δ’ ἠμύνοντο καὶ διεμάχοντο πρὸσ τοὺσ ἐπιτιθεμένουσ.

Ἀννίβασ δέ, κατὰ τὴν πρόθεσιν αὐτῷ συντρεχόντων τῶν πραγμάτων, εὐθέωσ τοὺσ πρώτουσ ἀποβαίνοντασ συνίστα καὶ παρεκάλει καὶ συνεπλέκετο τοῖσ βαρβάροισ.

οἱ δὲ Κελτοὶ καὶ διὰ τὴν ἀταξίαν καὶ διὰ τὸ παράδοξον τοῦ συμβαίνοντοσ ταχέωσ τραπέντεσ ὡρ́μησαν πρὸσ φυγήν.