Plutarch, Artaxerxes, chapter 27

(플루타르코스, Artaxerxes, chapter 27)

ταύτην ὁ Δαρεῖοσ αἰτήσασ ἠνίασε τὸν· πατέρα· δύσζηλα γὰρ τὰ βαρβαρικὰ δεινῶσ περὶ τὸ ἀκόλαστον, ὥστε μὴ μόνον τὸν προσελθόντα καὶ θιγόντα παλλακῆσ βασιλέωσ, ἀλλὰ καὶ τὸν ἐν πορείᾳ προεξελθόντα καὶ διεξελάσαντα τὰσ ἁμάξασ ἐφ’ αἷσ κομίζονται, θανάτῳ κολάζεσθαι. καίτοι τὴν μὲν Ἄτοσσαν εἶχεν ἔρωτι ποιησάμενοσ γυναῖκα παρὰ τὸν νόμον, ἑξήκοντα δὲ καὶ τριακόσιαι παρετρέφοντο κάλλει διαφέρουσαι παλλακίδεσ, οὐ μὴν ἀλλὰ καὶ αἰτηθεὶσ ἐκείνην ἐλευθέραν ἔφησεν εἶναι καὶ λαμβάνειν ἐκέλευσε βουλομένην, ἄκουσαν δὲ μὴ βιάζεσθαι.

μεταπεμφθείσησ δὲ τῆσ Ἀσπασίασ καὶ παρ’ ἐλπίδασ τοῦ βασιλέωσ ἑλομένησ τὸν Δαρεῖον, ἔδωκε μὲν ὑπ’ ἀνάλκησ τοῦ νόμου, δοὺσ δὲ ὀλίγον ὕστερον ἀφείλετο. τῆσ γὰρ Ἀρτέμιδοσ τῆσ ἐν Ἐκβατάνοισ, ἣν Ἀναῗτιν καλοῦσιν, ἱέρειαν ἀνέδειξεν αὐτήν, ὅπωσ ἁγνὴ διάγῃ τὸν ἐπίλοιπον βίον, οἰόμενοσ οὐ χαλεπήν, ἀλλὰ καὶ μετρίαν τινὰ καὶ παιδιᾷ μεμιγμένην ταύτην λήψεσθαι δίκην παρὰ τοῦ παιδόσ.

ὁ δ’ ἤνεγκεν οὐ μετρίωσ, εἴτ’ ἔρωτι τῆσ Ἀσπασίασ περιπαθὴσ γεγονώσ, εἴτε ὑβρίσθαι καὶ κεχλευάσθαι νομίζων ὑπὸ τοῦ πατρόσ. αἰσθόμενοσ δ’ αὐτὸν οὕτωσ ἔχοντα Τηρίβαζοσ ἔτι μᾶλλον ἐξετράχυνεν, ἐν τοῖσ ἐκείνου συνιδὼν τὰ καθ’ αὑτόν, ἦν δὲ τοιαῦτα, πλειόνων οὐσῶν βασιλεῖ θυγατέρων ὡμολόγησε Φαρναβάζῳ μὲν Ἀπάμαν δώσειν γυναῖκα, Ῥοδογούνην δὲ Ὀρόντῃ, Τηριβάζῳ δὲ Ἄμηστριν.

καὶ τοῖσ μὲν ἄλλοισ ἔδωκε, Τηρίβαζον δὲ ἐψεύσατο γήμασ αὐτὸσ τὴν Ἄμηστριν, ἀντ’ ἐκείνησ δὲ τῷ Τηριβάζῳ τὴν νεωτάτην Ἄτοσσαν ἐνεγύησεν. ἐπεὶ δὲ καὶ ταύτην ἐρασθεὶσ ἔγημεν, ὡσ εἴρηται, παντάπασι δυσμενῶσ πρὸσ αὐτὸν ὁ Τηρίβαζοσ ἔσχεν, οὐδὲ ἄλλωσ στάσιμοσ ὢν τὸ ἦθοσ, ἀλλ’ ἀνώμαλοσ καὶ παράφοροσ.

διὸ καὶ νῦν μὲν εὐημερῶν ὅμοια τοῖσ πρώτοισ, νῦν δὲ προσκρούων καὶ σκορακιζόμενοσ οὐδεμίαν ἔφερεν ἐμμελῶσ μεταβολήν, ἀλλὰ καὶ τιμώμενοσ ἦν ἐπαχθὴσ ὑπὸ χαυνότητοσ, καὶ τὸ κολουόμενον οὐ ταπεινὸν οὐδὲ ἡσυχαῖον, ἀλλὰ τραχὺ καὶ ἀγέρωχον εἶχε.

일치하는 문장이 없습니다.

SEARCH

MENU NAVIGATION