Dionysius of Halicarnassus, Antiquitates Romanae, Books X-XX, book 10, chapter 56

(디오니시오스, Antiquitates Romanae, Books X-XX, book 10, chapter 56)

τοῦτο τὸ δόγμα λαβόντεσ οἱ δήμαρχοι προῆλθον εἰσ τὴν ἐκκλησίαν καὶ ἀναγνόντεσ ἐν τῷ δήμῳ πολλοὺσ ἐπαίνουσ τῆσ βουλῆσ καὶ τοῦ προθέντοσ τὴν γνώμην Ἀππίου διεξῆλθον. ἐπεὶ δὲ κατέλαβεν ὁ τῶν ἀρχαιρεσίων καιρόσ, ἐκκλησίαν συναγαγόντεσ οἱ δήμαρχοι τούσ τ’ ἀποδειχθέντασ ὑπάτουσ ἥκειν ἠξίουν ἐμπεδώσοντασ τῷ δήμῳ τὰσ ὑποσχέσεισ, κἀκεῖνοι παρελθόντεσ ἐξωμόσαντο τὰσ ὑπατείασ. τούτουσ ὁ δῆμοσ ἐπαινῶν τε καὶ θαυμάζων διετέλει, καὶ ἐπειδὴ τοὺσ νομοθέτασ ψηφοφορεῖν ἔδει πρώτουσ εἵλετο τῶν ἄλλων·

καὶ ἀπεδείχθησαν ἐν ἀρχαιρεσίαισ ὑπὸ τῆσ λοχίτιδοσ ἐκκλησίασ Ἄππιοσ μὲν Κλαύδιοσ καὶ Τίτοσ Γενύκιοσ, οὓσ ἔδει εἰσ τοὐπιὸν ἄρχειν ἔτοσ, Πόπλιοσ δὲ Σήστιοσ ὁ τὸν ἐνιαυτὸν ἐκεῖνον ὑπατεύων, τρεῖσ δὲ οἱ κομίσαντεσ παρὰ τῶν Ἑλλήνων τοὺσ νόμουσ, Σπόριοσ Ποστόμιοσ καὶ Σερούιοσ Σολπίκιοσ καὶ Αὖλοσ Μάλλιοσ, εἷσ δὲ τῶν ὑπατευσάντων τὸν παρελθόντα ἐνιαυτὸν Τίτοσ Ῥωμίλιοσ, ὁ τὴν ἐν τῷ δήμῳ δίκην Σικκίου κατηγορήσαντοσ ἁλούσ, ἐπειδὴ γνώμησ ἐδόκει ἄρξαι δημοτικῆσ· ἐκ δὲ τῶν ἄλλων βουλευτῶν Γάιοσ Ιοὔλιοσ καὶ Τίτοσ Οὐετούριοσ καὶ Πόπλιοσ Ὁράτιοσ, ἅπαντεσ ὑπατικοί·

αἱ δὲ τῶν δημάρχων τε καὶ ἀγορανόμων καὶ ταμιῶν καὶ εἴ τινεσ ἦσαν ἄλλαι πάτριοι Ῥωμαίοισ ἀρχαὶ κατελύθησαν.

SEARCH

MENU NAVIGATION