Diodorus Siculus, Library, book xv, chapter 42

(디오도로스 시켈로스, Library, book xv, chapter 42)

ὁ δὲ τῶν Αἰγυπτίων βασιλεὺσ Νεκτάνεβισ ἐπυνθάνετο μὲν τὸ μέγεθοσ τῶν Περσικῶν δυνάμεων, ἐθάρρει δὲ μάλιστα μὲν τῇ τῆσ χώρασ ὀχυρότητι, δυσπροσίτου παντελῶσ οὔσησ τῆσ Αἰγύπτου, ἔπειτα καὶ τῷ πεφράχθαι καλῶσ πάσασ εἰσβολὰσ τάσ τε ἀπὸ γῆσ καὶ τὰσ ἀπὸ θαλάττησ. ἑπτὰ στόμασι γὰρ τοῦ Νείλου τὰσ εἰσ τὸ Αἰγύπτιον πέλαγοσ ἐκβολὰσ ποιουμένου, καθ’ ἕκαστον τῶν στομάτων πόλισ κατεσκεύαστο πύργουσ μεγάλουσ ἔχουσα καθ’ ἑκάτερον τοῦ ῥείθρου καὶ ξυλίνην γέφυραν τοῦ εἴσπλου κυριεύουσαν.

μάλιστα δὲ τὸ Πηλουσιακὸν στόμα κατεσκεύασε διὰ τὸ κεῖσθαι μὲν αὐτὸ πρῶτον πρὸσ τοὺσ ἀπὸ Συρίασ πορευομένουσ καὶ δοκεῖν διὰ τούτου μάλιστ’ ἂν ποιεῖσθαι τὴν ἔφοδον τοὺσ πολεμίουσ. τοῦτο γὰρ ἀπετάφρευσε, καὶ διετείχισε τοὺσ εἴσπλουσ κατὰ τοὺσ εὐκαιροτάτουσ τόπουσ, καὶ τῶν προσόδων τὰσ μὲν κατὰ γῆν πορευτὰσ ἐποίησε λιμνάζειν, τὰσ δὲ πλωτὰσ χώμασιν ἐνέφραττεν.

διόπερ οὐκ ἦν ῥᾳδίωσ οὔτε ταῖσ ναυσὶν εἰσπλέειν οὔτε τοῖσ ἱππεῦσι προσπελάσαι οὔτε τοῖσ πεζοῖσ προσελθεῖν. οἱ δὲ περὶ τὸν Φαρνάβαζον στρατηγοί, καταλαβόντεσ τὸ Πηλουσιακὸν στόμα θαυμαστῶσ ὠχυρωμένον καὶ στρατιωτῶν πλήθει φυλαττόμενον, τὸ μὲν διὰ τούτου βιάζεσθαι παντελῶσ ἀπεδοκίμασαν, δι’ ἑτέρου δὲ στόματοσ ἔγνωσαν ποιεῖσθαι τὸν εἴσπλουν.

διὸ πλεύσαντεσ πελάγιοι πρὸσ τὸ μὴ καθορᾶσθαι τὰσ ναῦσ ὑπὸ τῶν πολεμίων, κατέπλευσαν πρὸσ τὸ στόμα τὸ καλούμενον Μενδήσιον, ἔχον ἠιόνα παρήκουσαν ἐφ’ ἱκανὸν τόπον. εἰσ ταύτην ἀποβάντεσ μετὰ στρατιωτῶν τρισχιλίων ὅ τε Φαρνάβαζοσ καὶ ὁ Ἰφικράτησ προῆγον ἐπὶ τὸ τετειχισμένον ἐπὶ τοῦ στόματοσ πολισμάτιον. ἐκβοηθησάντων δὲ τῶν Αἰγυπτίων ἱππεῦσί τε καὶ πεζοῖσ τρισχιλίοισ, γενομένησ τε μάχησ ἰσχυρᾶσ καὶ τοῖσ Πέρσαισ πολλῶν ἐκ τῶν νεῶν προσγεγενημένων, κυκλωθέντεσ οἱ Αἰγύπτιοι, πολλοὶ μὲν ἀπέθανον, οὐκ ὀλίγοι δ’ ἐζωγρήθησαν·

οἱ δὲ περιλειφθέντεσ εἰσ τὴν πόλιν συνεδιώχθησαν. οἱ δὲ περὶ τὸν Ἰφικράτην συνεισπεσόντεσ τοῖσ φρουροῦσιν ἐντὸσ τῶν τειχῶν, καὶ κρατήσαντεσ τοῦ φρουρίου, τοῦτο μὲν κατέσκαψαν, τοὺσ δ’ ἐνοικοῦντασ ἐξηνδραποδίσαντο. μετὰ δὲ ταῦτα τοῖσ στρατηγοῖσ ἐνέπεσε στάσισ, δι’ ἣν τῆσ ἐπιβολῆσ ἐσφάλησαν.

ὁ μὲν γὰρ Ἰφικράτησ παρὰ τῶν αἰχμαλώτων πυθόμενοσ ἔρημον εἶναι τὴν Μέμφιν, ἐπικαιροτάτην οὖσαν πόλιν τῶν κατ’ Αἴγυπτον, συνεβούλευεν ἐξαυτῆσ ἀναπλεῖν ἐπὶ τὴν Μέμφιν πρὸ τοῦ παραγενέσθαι τὰσ τῶν Αἰγυπτίων δυνάμεισ· οἱ δὲ περὶ τὸν Φαρνάβαζον ᾦντο δεῖν ἀναμένειν τὴν ὅλην δύναμιν τῶν Περσῶν· ἀσφαλεστέραν γὰρ ἔσεσθαι τὴν στρατείαν ἐπὶ τὴν Μέμφιν. τοῦ δ’ Ἰφικράτουσ ἀξιοῦντοσ αὑτῷ δοθῆναι τοὺσ παρόντασ μισθοφόρουσ, καὶ μετ’ ἐκείνων ἐπαγγελλομένου κρατήσειν τῆσ πόλεωσ, τό τε θράσοσ αὐτοῦ καὶ τὴν ἀρετὴν ὑπώπτευσε, μὴ κατ’ ἰδίαν κατάσχῃ τὴν Αἴγυπτον.

διόπερ οὐ συγχωροῦντοσ τοῦ Φαρναβάζου, ὁ Ἰφικράτησ διεμαρτύρατο, λέγων ὡσ ἐὰν παρῶσι τὴν ὀξύτητα τῶν καιρῶν, ἄπρακτον ποιήσουσι τὴν ὅλην στρατιάν. στρατηγοὶ μὲν οὖν τινεσ ἐφθόνουν αὐτῷ καὶ διαβολὰσ ἀδίκουσ προσῆπτον. οἱ δ’ Αἰγύπτιοι πολλὴν ἀναστροφὴν λαβόντεσ, εἰσ μὲν τὴν Μέμφιν ἐξέπεμψαν τὴν ἱκανὴν φυλακήν, ἐπὶ δὲ τὸ πεπορθημένον πολισμάτιον πάσαισ ταῖσ δυνάμεσι παραγενόμενοι, καὶ πολλὰ πλεονεκτοῦντεσ διὰ τὴν τῶν τόπων ὀχυρότητα, συμπλοκὰσ ἐποιοῦντο τοῖσ πολεμίοισ συνεχεῖσ.

αἰεὶ δὲ μᾶλλον ἐπισχύοντεσ πολλοὺσ ἀνῄρουν τῶν Περσῶν καὶ κατεθάρρουν τῶν πολεμίων. χρονιζούσησ δὲ τῆσ περὶ τὸ πολισμάτιον τοῦτο στρατείασ, καὶ τῶν ἐτησίων ἤδη γενομένων, ὁ Νεῖλοσ πληρούμενοσ καὶ πάντα τόπον ἐπέχων τῷ πλήθει τοῦ ῥεύματοσ αἰεὶ μᾶλλον ὠχύρου τὴν Αἴγυπτον.

οἱ δὲ τῶν Περσῶν ἡγεμόνεσ, ἀντιπραττούσησ αὐτοῖσ αἰεὶ τῆσ περιστάσεωσ, ἔγνωσαν ἐκ τῆσ Αἰγύπτου τὴν ἀπαλλαγὴν ποιήσασθαι. διόπερ ἐπανιόντων αὐτῶν εἰσ τὴν Ἀσίαν, καὶ γενομένησ διαφορᾶσ τῷ Φαρναβάζῳ πρὸσ τὸν Ἰφικράτην, ὑποπτεύσασ ὁ Ἰφικράτησ μὴ συλληφθῇ καὶ τιμωρίασ τύχῃ, καθάπερ Κόνων ἔπαθεν ὁ Ἀθηναῖοσ, ἔκρινε λάθρᾳ φεύγειν ἐκ τοῦ στρατοπέδου·

διὸ καὶ παρασκευασάμενοσ πλοῖον ἔλαθε νυκτὸσ ἀπαλλαγεὶσ καὶ καταπλεύσασ εἰσ τὰσ Ἀθήνασ. ὁ δὲ Φαρνάβαζοσ πρέσβεισ ἐκπέμψασ κατηγόρησε τοῦ Ἰφικράτουσ ὡσ αἰτίου γεγονότοσ τοῦ μὴ ληφθῆναι τὴν Αἴγυπτον.

οἱ δὲ Ἀθηναῖοι τοῖσ μὲν Πέρσαισ ἀπόκρισιν ἔδωκαν, ὅτι ἐὰν εὑρ́ωσιν αὐτὸν ἠδικηκότα, κολάσουσι κατὰ τὴν ἀξίαν, αὐτοὶ δὲ μετ’ ὀλίγον χρόνον στρατηγὸν κατέστησαν τὸν Ἰφικράτην ἐπὶ τὸ ναυτικόν.

일치하는 문장이 없습니다.

SEARCH

MENU NAVIGATION