헬라어 텍스트

Athenaeus, The Deipnosophists, Book 9, book 9, chapter 49

(아테나이오스, The Deipnosophists, Book 9, book 9, chapter 49)

οὐκ ἀπελείποντο δὲ ἡμῶν τοῦ συμποσίου πολλάκισ οὐδὲ κύκνοι, περὶ ὧν φησιν ὁ Ἀριστοτέλησ· · "ὁ κύκνοσ εὔτεκνόσ ἐστι καὶ μάχιμοσ· "ἀλληλοκτονεῖ γοῦν ὁ μάχιμοσ, μάχεται δὲ καὶ τῷ ἀετῷ, αὐτὸσ μάχησ μὴ προαρξάμενοσ. "εἰσὶ δ’ ᾠδικοὶ καὶ μάλιστα περὶ τὰσ τελευτάσ. διαίρουσι δὲ καὶ τὸ πέλαγοσ ᾄδοντεσ. "ἐστὶν δὲ τῶν στεγανοπόδων καὶ ποηφάγων. ὁ δὲ Μύνδιόσ φησιν Ἀλέξανδροσ πολλοῖσ τελευτῶσιν παρακολουθήσασ οὐκ ἀκοῦσαι ᾀδόντων. ὁ δὲ τὰ Κεφαλίωνοσ ἐπιγραφόμενα Τρωικὰ συνθεὶσ Ἡγησιάναξ ὁ Ἀλεξανδρεὺσ καὶ τὸν Ἀχιλλεῖ μονομαχήσαντα Κύκνον φησὶ τραφῆναι ἐν Λευκόφρυι πρὸσ τοῦ ὁμωνύμου ὄρνιθοσ. Βοῖοσ δ’ ἐν Ὀρνιθογονίᾳ ἢ Βοιώ, ὥσ φησι Φιλόχοροσ, ὑπὸ Ἄρεωσ τὸν Κύκνον ὀρνιθωθῆναι καὶ παραγενόμενον ἐπὶ τὸν Σύβαριν ποταμὸν πλησιάσαι γεράνῳ.

λέγει δὲ καὶ ἐντίθεσθαι αὐτὸν τῇ νεοττιᾷ πόαν τὴν λεγομένην λυγέαν. καὶ περὶ τῆσ γεράνου δέ φησιν ὁ Βοῖοσ ὅτι ἦν τισ παρὰ τοῖσ Πυγμαίοισ γυνὴ διάσημοσ, ὄνομα Γεράνα. αὕτη κατὰ θεὸν τιμωμένη πρὸσ τῶν πολιτῶν αὐτὴ τοὺσ ὄντωσ θεοὺσ ταπεινῶσ ἦγε, μάλιστα δὲ Ἥραν τε καὶ Ἄρτεμιν. ἀγανακτήσασα οὖν ἡ Ἥρα εἰσ ἀπρεπῆ τὴν ὄψιν ὄρνιν μετεμόρφωσε πολέμιόν τε καὶ στυγητὴν κατέστησε τοῖσ τιμήσασιν αὐτὴν Πυγμαίοισ, γενέσθαι τε λέγει ἐξ αὐτῆσ καὶ Νικοδάμαντοσ τὴν χερσαίαν χελώνην.

καθόλου δὲ ὁ ποιήσασ ταῦτα τὰ ἔπη πάντα τὰ ὄρνεα ἀνθρώπουσ ἱστορεῖ πρότερον γεγονέναι.