Plutarch, Timoleon, chapter 38

(플루타르코스, Timoleon, chapter 38)

ἐκεῖνον μὲν οὖν αὐτὸν ὑπομείναντα τὴν συμφορὰν ἀλύπωσ ἧττον ἄν τισ θαυμάσειε· τῶν δὲ Συρακουσίων ἄξιον ἄγασθαι τὴν πρὸσ τὸν ἄνδρα τιμὴν καὶ χάριν ἣν ἐπεδείξαντο πεπηρωμένῳ, φοιτῶντεσ ἐπὶ θύρασ αὐτοὶ καὶ τῶν ξένων τοὺσ παρεπιδημοῦντασ ἄγοντεσ εἰσ τὴν οἰκίαν καὶ τὸ χωρίον, ὅπωσ θεάσαιντο τὸν εὐεργέτην αὑτῶν, ἀγαλλόμενοι καὶ μέγα φρονοῦντεσ ὅτι παρ’ αὐτοῖσ εἵλετο καταζῆσαι τὸν βίον, οὕτω λαμπρᾶσ ἐπανόδου τῆσ εἰσ τὴν Ἑλλάδα παρεσκευασμένησ αὐτῷ διὰ τῶν εὐτυχημάτων καταφρονήσασ. πολλῶν δὲ καὶ μεγάλων εἰσ τὴν ἐκείνου τιμὴν γραφομένων καὶ πραττομένων οὐδενὸσ ἧττον ἦν τὸ ψηφίσασθαι τὸν τῶν Συρακουσίων δῆμον, ὁσάκισ συμπέσοι πόλεμοσ αὐτοῖσ πρὸσ ἀλλοφύλουσ, Κορινθίῳ χρῆσθαι στρατηγῷ.

καλὴν δὲ καὶ τὸ περὶ τὰσ ἐκκλησίασ γινόμενον ὄψιν εἰσ τιμὴν αὐτοῦ παρεῖχε· τὰ γὰρ ἄλλα δι’ αὑτῶν κρίνοντεσ ἐπὶ τὰσ μείζονασ διασκέψεισ ἐκεῖνον ἐκάλουν. ὁ δὲ κομιζόμενοσ δι’ ἀγορᾶσ ἐπὶ ζεύγουσ πρὸσ τὸ θέατρον ἐπορεύετο καὶ τῆσ ἀπήνησ, ὥσπερ ἐτύγχανε καθήμενοσ, εἰσαγομένησ, ὁ μὲν δῆμοσ ἠσπάζετο μιᾷ φωνῇ προσαγορεύων αὐτόν, ὁ δ’ ἀντασπασάμενοσ καὶ χρόνον τινὰ δοὺσ ταῖσ εὐφημίαισ καὶ τοῖσ ἐπαίνοισ, εἶτα διακούσασ τὸ ζητούμενον, ἀπεφαίνετο γνώμην.

ἐπιχειροτονηθείσησ δὲ ταύτησ οἱ μὲν ὑπηρέται πάλιν ἀπῆγον διὰ τοῦ θεάτρου τὸ ζεῦγοσ, οἱ δὲ πολῖται βοῇ καὶ κρότῳ προπέμψαντεσ ἐκεῖνον ἤδη τὰ λοιπὰ τῶν δημοσίων καθ’ αὑτοὺσ ἐχρημάτιζον.

일치하는 문장이 없습니다.

SEARCH

MENU NAVIGATION