헬라어 문장 검색 - Πλυταρ́Αριστιδ́27́

(플루타르코스, Ἀριστείδης, chapter 27)

καὶ μέντοι καὶ τάφοσ ἐστὶν αὐτοῦ Φαληροῖ δεικνύμενοσ, ὅν φασι κατασκευάσαι τὴν πόλιν αὐτῷ μηδ’ ἐντάφια καταλιπόντι. καὶ τὰσ μὲν θυγατέρασ ἱστοροῦσιν ἐκ τοῦ πρυτανείου τοῖσ νυμφίοισ ἐκδοθῆναι δημοσίᾳ, τῆσ πόλεωσ τὸν γάμον ἐγγυώσησ καὶ προῖκα τρισχιλίασ δραχμὰσ ἑκατέρᾳ ψηφισαμένησ, Λυσιμάχῳ δὲ τῷ υἱῷ μνᾶσ μὲν ἑκατὸν ἀργυρίου καὶ γῆσ τοσαῦτα πλέθρα πεφυτευμένησ ἔδωκεν ὁ δῆμοσ, ἄλλασ δὲ δραχμὰσ τέσσαρασ εἰσ ἡμέραν ἑκάστην ἀπέταξεν, Ἀλκιβιάδου τὸ ψήφισμα γράψαντοσ. ἔτι δὲ Λυσιμάχου θυγατέρα Πολυκρίτην ἀπολιπόντοσ, ὡσ Καλλισθένησ φησί, καὶ ταύτῃ σίτησιν ὅσην καὶ τοῖσ Ὀλυμπιονίκαισ ὁ δῆμοσ ἐψηφίσατο.

Δημήτριοσ δ’ ὁ Φαληρεὺσ καὶ Ιἑρώνυμοσ ὁ Ῥόδιοσ καὶ Ἀριστόξενοσ ὁ μουσικὸσ καὶ Ἀριστοτέλησ εἰ δὴ τό γε Περὶ εὐγενείασ βιβλίον ἐν τοῖσ γνησίοισ Ἀριστοτέλουσ θετέον ἱστοροῦσι Μυρτὼ θυγατριδῆν Ἀριστείδου Σωκράτει τῷ σοφῷ συνοικῆσαι, γυναῖκα μὲν ἑτέραν ἔχοντι, ταύτην δ’ ἀναλαβόντι χηρεύουσαν διὰ πενίαν καὶ τῶν ἀναγκαίων ἐνδεομένην. πρὸσ μὲν οὖν τούτουσ ἱκανῶσ ὁ Παναίτιοσ ἐν τοῖσ περὶ Σωκράτουσ ἀντείρηκεν·

ὁ δὲ Φαληρεὺσ ἐν τῷ Σωκράτει φησὶ μνημονεύειν Ἀριστείδου θυγατριδοῦν εὖ μάλα πένητα Λυσίμαχον, ὃσ ἑαυτὸν μὲν ἐκ πινακίου τινὸσ ὀνειροκριτικοῦ παρὰ τὸ Ιἀκχεῖον λεγόμενον καθεζόμενοσ ἔβοσκε. τῇ δὲ μητρὶ καὶ τῇ ταύτησ ἀδελφῇ ψήφισμα γράψασ ἔπεισε τὸν δῆμον τροφὴν διδόναι τριώβολον ἑκάστησ ἡμέρασ. αὐτὸσ μέντοι φησὶν ὁ Δημήτριοσ νομοθετῶν ἀντὶ τριωβόλου δραχμὴν ἑκατέρᾳ τάξαι τῶν γυναικῶν. καὶ οὐδέν ἐστι θαυμαστὸν οὕτω φροντίσαι τῶν ἐν ἄστει τὸν δῆμον, ὅπου θυγατριδῆν Ἀριστογείτονοσ ἐν Λήμνῳ πυθόμενοι ταπεινὰ πράττειν ἀνδρὸσ ἀποροῦσαν διὰ πενίαν κατήγαγον Ἀθήναζε, καὶ συνοικίσαντεσ ἀνδρὶ τῶν εὖ γεγονότων τὸ Ποταμοῖ χωρίον εἰσ φερνὴν ἐπέδωκαν.

ἧσ φιλανθρωπίασ καὶ χρηστότητοσ ἔτι πολλὰ καὶ καθ’ ἡμᾶσ ἡ πόλισ ἐκφέρουσα δείγματα θαυμάζεται καὶ ζηλοῦται δικαίωσ.

MENU NAVIGATION

호흡부호 보기

강세부호 보기

장단부호 보기

작은 Iota 보기

모든 부호 보기

Ancient Greek Text

Plutarch, Ἀριστείδης, chapter 27

(플루타르코스, Ἀριστείδης, chapter 27)

상위

목록

SEARCH

MENU NAVIGATION