Plutarch, Sulla, chapter 19

(플루타르코스, Sulla, chapter 19)

Ἀρχελάου δὲ τὸ δεξιὸν κέρασ εἰσ κύκλωσιν ἀνάγοντοσ, Ὁρτήσιοσ ἐφῆκε τὰσ σπείρασ δρόμῳ προσφερομένασ ὡσ ἐμβαλῶν πλαγίοισ. πυθόμενοσ δὲ ὁ Σύλλασ ἀπὸ τοῦ δεξιοῦ μήπω συμπεπτωκότοσ εἰσ μάχην ἐδίωκε βοηθῶν.

Ἀρχέλαοσ δὲ τῷ κονιορτῷ τῆσ ἐλάσεωσ ὅπερ ἦν τεκμηράμενοσ, Ὁρτήσιον μὲν εἰά χαίρειν, αὐτὸσ δὲ ἐπιστρέψασ ὡρ́μησεν ὅθεν ὁ Σύλλασ πρόσ τὸ δεξιόν, ὡσ ἔρημον ἄρχοντοσ αἱρήσων, ἅμα δὲ καὶ Μουρήνᾳ Ταξίλησ ἐπῆγε τοὺσ χαλκάσπιδασ, ὥστε τῆσ κραυγῆσ διχόθεν φερομένησ καὶ τῶν ὀρῶν ἀνταποδιδόντων τὴν περιήχησιν, ἐπιστήσαντα τὸν Σύλλαν διαπορεῖν ὁποτέρωσε χρὴ προσγενέσθαι. δόξαν δὲ τὴν ἑαυτοῦ τάξιν ἀναλαμβάνειν, Μουρήνᾳ μὲν ἀρωγὸν ἔπεμψεν Ὁρτήσιον ἔχοντα τέσσαρασ σπείρασ, αὐτὸσ δὲ τὴν πέμπτην ἕπεσθαι κελεύσασ ἐπὶ τὸ δεξιὸν ἠπείγετο καὶ καθ’ ἑαυτὸ μὲν ἀξιομάχωσ ἤδη τῷ Ἀρχελάῳ συνεστηκόσ, ἐκείνου δὲ ἐπιφανέντοσ παντάπασιν ἐξεβιάσαντο, καὶ κρατήσαντεσ ἐδίωκον πρόσ τε τὸν ποταμὸν καὶ τὸ Ἀκόντιον ὄροσ προτροπάδην φεύγοντασ, οὐ μὴν ὅ γε Σύλλασ ἠμέλησε Μουρήνα κινδυνεύοντοσ, ἀλλὰ ὡρ́μησε τοῖσ ἐκεῖ βοηθεῖν ἰδὼν δὲ νικῶντασ, τότε τῆσ διώξεωσ μετεῖχε.

πολλοὶ μὲν οὖν ἐν τῷ πεδίῳ τῶν βαρβάρων ἀνῃροῦντο, πλεῖστοι δὲ τῷ χάρακι προσφερόμενοι κατεκόπησαν, ὥστε μυρίουσ διαπεσεῖν εἰσ Χαλκίδα μόνουσ ἀπὸ τοσούτων μυριάδων, ὁ δὲ Σύλλασ λέγει τέσσαρασ καὶ δέκα ἐπιζητῆσαι τῶν αὐτοῦ στρατιωτῶν, εἶτα καὶ τούτων δύο πρόσ τὴν ἑσπέραν παραγενέσθαι, διὸ καὶ τοῖσ τροπαίοισ ἐπέγραψεν Ἄρη καὶ Νίκην καὶ Ἀφροδίτην, ὡσ οὐχ ἧττον εὐτυχίᾳ κατορθώσασ ἢ δεινότητι καὶ δυνάμει τὸν πόλεμον.

ἀλλὰ τοῦτο μὲν τὸ τρόπαιον ἕστηκε τῆσ πεδιάδοσ μάχησ ᾗ πρῶτον ἐνέκλιναν οἱ περὶ Ἀρχέλαον παρὰ τὸ Μόλου ῥεῖθρον, ἕτερον δέ ἐστι τοῦ Θουρίου κατὰ κορυφὴν βεβηκὸσ ἐπὶ τῇ κυκλώσει τῶν βαρβάρων, γράμμασιν Ἑλληνικοῖσ ἐπισημαῖνον Ὁμολόϊχον καὶ Ἀναξίδαμον ἀριστεῖσ.

ταύτησ τὰ ἐπινίκια τῆσ μάχησ ἦγεν ἐν Θήβαισ, περὶ τὴν Οἰδιπόδειον κρήνην κατασκευάσασ θυμέλην.

οἱ δὲ κρίνοντεσ ἦσαν Ἕλληνεσ ἐκ τῶν ἄλλων ἀνακεκλημένοι πόλεων, ἐπεὶ πρόσ γε Θηβαίουσ ἀδιαλλάκτωσ εἶχε, καὶ τῆσ χώρασ αὐτῶν ἀποτεμόμενοσ τὴν ἡμίσειαν τῷ Πυθίῳ καὶ τῷ Ὀλυμπίῳ καθιέρωσεν, ἐκ τῶν προσόδων κελεύσασ ἀποδίδοσθαι τὰ χρήματα τοῖσ θεοῖσ ἅπερ αὐτὸσ εἰλήφει.

SEARCH

MENU NAVIGATION