Plutarch, Mulierum virtutes, Χῖαι

Χῖοι Λευκωνίαν ἐπῴκισαν ἐκ τοιαύτησ αἰτίασ. ἐγάμει τισ ἐν Χίῳ τῶν δοκούντων γνωρίμων εἶναι ἀγομένησ δὲ τῆσ νύμφησ ἐπὶ ζεύγουσ, ὁ βασιλεὺσ Ἵπποκλοσ, ἐπιτήδειοσ ὢν τῷ γαμοῦντι καὶ παρὼν ὥσπερ οἱ λοιποί, μέθησ οὔσησ καὶ γέλωτοσ, ἀνεπήδησεν ἐπὶ τὸ ζεῦγοσ, οὐδὲν ὑβριστικὸν πράξων, ἀλλ’ ἔθει κοινῷ καὶ παιδιᾷ χρώμενοσ· οἱ δὲ φίλοι τοῦ γαμοῦντοσ ἀπέκτειναν αὐτόν. μηνιμάτων δὲ τοῖσ Χίοισ προφαινομένων καὶ τοῦ θεοῦ κελεύσαντοσ τοὺσ Ἵπποκλον ἀνελόντασ ἀνελεῖν, ἅπαντεσ ἔφασαν Ἵπποκλον ἀνῃρηκέναι.