Plutarch, Mulierum virtutes, Ἀργεῖαι

(플루타르코스, Mulierum virtutes, Ἀργεῖαι)

οὐδενὸσ δ’ ἧττον ἔνδοξόν ἐστι τῶν κοινῇ διαπεπραγμένων γυναιξὶν ἔργων ὁ πρὸσ Κλεομένη περὶ Ἄργουσ ἀγών, ὃν ἠγωνίσαντο, Τελεσίλλησ τῆσ ποιητρίασ προτρεψαμένησ. ταύτην δέ φασιν οἰκίασ οὖσαν ἐνδόξου τῷ δὲ σώματι νοσηματικὴν εἰσ θεοῦ πέμψαι περὶ ὑγιείασ· καὶ χρησθὲν αὐτῇ Μούσασ θεραπεύειν, πειθομένην τῷ θεῷ καὶ ἐπιθεμένην ἐν ᾠδῇ καὶ ἁρμονίᾳ τοῦ τε πάθουσ ἀπαλλαγῆναι ταχὺ καὶ θαυμάζεσθαι διὰ ποιητικὴν ὑπὸ τῶν γυναικῶν.

ἐπεὶ δὲ Κλεομένησ ὁ βασιλεὺσ τῶν Σπαρτιατῶν πολλοὺσ ἀποκτείνασ οὐ μήν, ὡσ ἔνιοι μυθολογοῦσιν, ἑπτὰ καὶ ἑβδομήκοντα καὶ ἑπτακοσίουσ πρὸσ ἑπτακισχιλίοισ ἐβάδιζε πρὸσ τὴν πόλιν, ὁρμὴ καὶ τόλμα δαιμόνιοσ παρέστη ταῖσ ἀκμαζούσαισ τῶν γυναικῶν ἀμύνεσθαι τοὺσ πολεμίουσ ὑπὲρ τῆσ πατρίδοσ. ἡγουμένησ δὲ τῆσ Τελεσίλλησ, ὅπλα λαμβάνουσι καὶ παρ’ ἔπαλξιν ἱστάμεναι κύκλῳ τὰ τείχη περιέστεψαν, ὥστε θαυμάζειν τοὺσ πολεμίουσ. τὸν μὲν οὖν Κλεομένη πολλῶν πεσόντων ἀπεκρούσαντο·

τὸν δ’ ἕτερον βασιλέα Δημάρατον, ὡσ Σωκράτησ φησίν, ἐντὸσ γενόμενον καὶ κατασχόντα τὸ Παμφυλιακὸν ἐξέωσαν, οὕτω δὲ τῆσ πόλεωσ περιγενομένησ, τὰσ μὲν πεσούσασ ἐν τῇ μάχῃ τῶν γυναικῶν ἐπὶ τῆσ ὁδοῦ τῆσ Ἀργείασ ἔθαψαν, ταῖσ δὲ σωθείσαισ ὑπόμνημα τῆσ ἀριστείασ ἔδοσαν ἱδρύσασθαι τὸν Ἐνυάλιον. τὴν δὲ μάχην οἱ μὲν ἑβδόμῃ λέγουσιν ἱσταμένου μηνόσ, οἱ δὲ νουμηνίᾳ γενέσθαι τοῦ νῦν μὲν τετάρτου, πάλαι δὲ Ἑρμαίου παρ’ Ἀργείοισ, καθ’ ἣν μέχρι νῦν τὰ Ὑβριστικὰ τελοῦσι, γυναῖκασ μὲν ἀνδρείοισ χιτῶσι καὶ χλαμύσιν, ἄνδρασ δὲ πέπλοισ γυναικῶν καὶ καλύπτραισ ἀμφιεννύντεσ. ἐπανορθούμενοι δὲ τὴν ὀλιγανδρίαν, οὐχ ὡσ Ἡρόδοτοσ ἱστορεῖ τοῖσ δούλοισ, ἀλλὰ τῶν περιοίκων ποιησάμενοι πολίτασ τοὺσ ἀρίστουσ, συνῴκισαν τὰσ γυναῖκασ·

ἐδόκουν δὲ καὶ τούτουσ ἀτιμάζειν καὶ περιορᾶν ἐν τῷ συγκαθεύδειν ὡσ χείρονασ. ὅθεν ἔθεντο νόμον τὸν κελεύοντα πώγωνα δεῖν ἐχούσασ συναναπαύεσθαι τοῖσ ἀνδράσι τὰσ γεγαμημένασ.

일치하는 문장이 없습니다.

SEARCH

MENU NAVIGATION