Plutarch, Quaestiones Romanae, section 14

"διὰ τί τοὺσ γονεῖσ ἐκκομίζουσιν οἱ μὲν υἱοὶ συγκεκαλυμμένοι, αἱ δὲ θυγατέρεσ γυμναῖσ ταῖσ κεφαλαῖσ καὶ ταῖσ κόμαισ λελυμέναισ; πότερον ὅτι τιμᾶσθαι μὲν ὑπὸ τῶν ἀρρένων δεῖ τοὺσ πατέρασ ὡσ θεούσ, πενθεῖσθαι δ’ ὑπὸ τῶν θυγατέρων ὡσ τεθνηκότασ, ἑκατέρῳ τὸ οἰκεῖον ὁ νόμοσ ἀποδοὺσ ἐξ ἀμφοτέρων ἐποίησε τὸ ἁρμόττον; ἢ πένθουσ μὲν οἰκεῖον τὸ μὴ σύνηθεσ, συνηθέστερον δὲ ταῖσ μὲν γυναιξὶν ἐγκεκαλυμμέναισ, τοῖσ δ’ ἀνδράσιν ἀκαλύπτοισ εἰσ τὸ δημόσιον προϊέναι; καὶ γὰρ παρ’ Ἕλλησιν ὅταν δυστυχία τισ γένηται, κείρονται μὲν αἱ γυναῖκεσ κομῶσι δ’ οἱ ἄνδρεσ, ὅτι τοῖσ μὲν τὸ κείρεσθαι ταῖσ δὲ τὸ κομᾶν σύνηθὲσ ἐστιν. ἢ τοὺσ μὲν υἱοὺσ ἐπικαλύπτεσθαι δι’ ἣν εἰρήκαμεν αἰτίαν ἐνομίσθη; καὶ γὰρ ἐπὶ τῶν τάφων, ὥσ φησι Βάρρων, περιστρέφονται, καθάπερ θεῶν ἱερὰ τιμῶντεσ τὰ τῶν πατέρων μνήματα, καὶ καύσαντεσ τοὺσ γονεῖσ, ὅταν ὀστέῳ πρῶτον ἐντύχωσι, θεὸν γεγονέναι τὸν τεθνηκότα λέγουσι. ταῖσ δὲ γυναιξὶν οὐδ’ ὅλωσ ἐξῆν ἐπικαλύπτεσθαι τὴν κεφαλήν· ἐξέβαλε γυναῖκα Σπόριοσ Καρβίλιοσ ἐπ’ ἀτεκνίᾳ, δεύτεροσ δὲ Σουλπίκιοσ Γάλλοσ ἐφελκυσαμένην ἰδὼν κατὰ κεφαλῆσ τὸ ἱμάτιον, τρίτοσ δὲ Πόπλιοσ Σεμπρώνιοσ ἀγῶνα θεωρήσασαν ἐπιτάφιον.