Demosthenes, Speeches 21-30, Κατὰ Τιμοκράτους 261:

εἰ δὲ τοῦ πᾶσι συμφέροντοσ εἵνεκα ταῦτα νομοθετῆσαι φήσεισ, μὴ λέγε τὴν ἔκτισιν τὴν τούτων· οὐδὲν γὰρ κοινωνεῖ τῷ νόμῳ τῷδε· ἀλλ’ ὡσ ἐπιτήδειόσ ἐστιν καὶ καλῶσ ἔχων ὁ νόμοσ, τοῦτο δίδασκε. τοῦτο γάρ ἐσθ’ ὑπὲρ οὗ σὺ μὲν εἰσενεγκεῖν φῄσ, ἐγὼ δὲ γέγραμμαι τἀναντία φάσκων, κρῖναι δὲ προσήκει τουτουσί. καίτοι καὶ τοῦτ’ οὐκ ἀπορήσαιμ’ ἂν δεῖξαι, πάντα μᾶλλον ἢ κατὰ τοὺσ νόμουσ πεποιημένουσ τὴν ἔκτισιν ἐκείνουσ τὴν τῶν χρημάτων· ἀλλὰ μὴ περὶ τούτων ὑμῶν οἰσόντων τὴν ψῆφον, τί δεῖ ταῦτα λέγοντ’ ἐνοχλεῖν με νυνί;