Demosthenes, Speeches 21-30, Κατὰ Ἀφόβου Β

(데모스테네스, Speeches 21-30, Κατὰ Ἀφόβου Β)

πολλὰ καὶ μεγάλ’ ἐψευσμένου πρὸσ ὑμᾶσ Ἀφόβου, τοῦτ’ αὐτὸν ἐλέγξαι πειράσομαι πρῶτον, ἐφ’ ᾧ μάλιστ’ ἠγανάκτησα τῶν ῥηθέντων. εἶπεν γὰρ ὡσ ὁ πάπποσ ὤφειλε τῷ δημοσίῳ, καὶ διὰ ταῦθ’ ὁ πατὴρ οὐκ ἐβούλετο μισθωθῆναι τὸν οἶκον, ἵνα μὴ κινδυνεύσῃ. καὶ τὴν μὲν πρόφασιν ποιεῖται ταύτην, ὡσ δ’ ὀφείλων ἐτελεύτησεν ἐκεῖνοσ, οὐδεμίαν παρέσχετο μαρτυρίαν· ἀλλ’ ὡσ μὲν ὦφλεν, ἐνεβάλετο τηρήσασ τὴν τελευταίαν ἡμέραν, ταύτην δ’ εἰσ τὸν ὕστερον λόγον ὑπελίπετο, ὡσ διαβαλεῖν τὸ πρᾶγμ’ ἐξ αὐτῆσ δυνησόμενοσ. ἐὰν οὖν ἀναγνῷ, προσέχετ’ αὐτῇ τὸν νοῦν·

εὑρήσετε γὰρ οὐχ ὡσ ὀφείλει μεμαρτυρημένην, ἀλλ’ ὡσ ὦφλεν. τοῦτ’ οὖν ἐλέγξαι πειράσομαι πρῶτον, ἐφ’ ᾧ φρονεῖ μάλιστα· ὃ καὶ ἡμεῖσ ἀμφισβητοῦμεν. εἰ μὲν οὖν τότ’ ἐξεγένετο καὶ μὴ τῷ χρόνῳ τοῦτ’ ἐνηδρεύθημεν, παρεσχόμεθ’ ἂν μάρτυρασ ὡσ ἐξετείσθη τὰ χρήματα καὶ πάντ’ αὐτῷ διελέλυτο τὰ πρὸσ τὴν πόλιν· νῦν δὲ τεκμηρίοισ μεγάλοισ ἐπιδείξομεν ὡσ οὔτ’ ὤφειλεν οὔτ’ ἦν κίνδυνοσ οὐδεὶσ ἡμῖν φανερὰ κεκτημένοισ τὰ ὄντα. πρῶτον μὲν γὰρ Δημοχάρησ, ἔχων ἀδελφὴν τῆσ ἐμῆσ μητρόσ, θυγατέρα δὲ Γύλωνοσ, οὐκ ἀποκέκρυπται τὴν οὐσίαν, ἀλλὰ χορηγεῖ καὶ τριηραρχεῖ καὶ τὰσ ἄλλασ λῃτουργίασ λῃτουργεῖ καὶ οὐδὲν τῶν τοιούτων δέδοικεν.

ἔπειτ’ αὐτὸσ ὁ πατὴρ τήν τ’ ἄλλην οὐσίαν καὶ τέτταρα τάλαντα καὶ τρισχιλίασ φανερὰσ ἐποίησεν, ἃσ οὗτοι γραφῆναί τ’ ἐν ταῖσ διαθήκαισ καὶ λαβεῖν σφᾶσ αὐτοὺσ κατ’ ἀλλήλων καταμαρτυροῦσιν. ἔτι δὲ καὶ αὐτὸσ Ἄφοβοσ μετὰ τῶν συνεπιτρόπων τῇ πόλει τὸ πλῆθοσ τῶν καταλειφθέντων χρημάτων ἐμφανὲσ ἐποίησεν, ἡγεμόνα με τῆσ συμμορίασ καταστήσασ οὐκ ἐπὶ μικροῖσ τιμήμασιν, ἀλλ’ ἐπὶ τηλικούτοισ ὥστε κατὰ τὰσ πέντε καὶ εἴκοσι μνᾶσ πεντακοσίασ εἰσφέρειν.

καίτοι εἴ τι τούτων ἦν ἀληθέσ, οὐδὲν ἂν αὐτῶν ἐποίησεν, ἀλλὰ πάντ’ ἂν ηὐλαβήθη. νῦν δὲ καὶ Δημοχάρησ καὶ ὁ πατὴρ καὶ αὐτοὶ οὗτοι φαίνονται φανερὰ ποιοῦντεσ, καὶ οὐδένα τοιοῦτον κίνδυνον δεδιότεσ. πάντων δ’ ἀτοπώτατόν ἐστιν, λέγοντασ ὡσ ὁ πατὴρ οὐκ εἰά μισθοῦν τὸν οἶκον, τὴν μὲν διαθήκην μηδαμοῦ ταύτην ἀποφαίνειν, ἐξ ἧσ ἦν εἰδέναι τἀκριβέσ, τηλικαύτην δ’ ἀνελόντασ μαρτυρίαν οὕτωσ οἰέσθαι δεῖν εἰκῇ πιστεύεσθαι παρ’ ὑμῖν.

ἀλλ’ ἐχρῆν, ἐπειδὴ τάχιστ’ ἐτελεύτησεν ὁ πατήρ, εἰσκαλέσαντασ μάρτυρασ πολλοὺσ παρασημήνασθαι κελεῦσαι τὰσ διαθήκασ, ἵν’ εἴ τι ἐγίγνετ’ ἀμφισβητήσιμον, ἦν εἰσ τὰ γράμματα ταῦτ’ ἐπανελθεῖν καὶ τὴν ἀλήθειαν πάντων εὑρεῖν. νῦν δ’ ἕτερα μὲν παρασημήνασθαι ἠξίωσαν, ἐν οἷσ πολλὰ τῶν καταλειπομένων οὐκ ἐγέγραπτο, ὑπομνήματα δ’ ἦν·

αὐτὴν δὲ τὴν διαθήκην, δι’ ἧσ τούτων ὧν ἐσημήναντο γραμμάτων καὶ τῶν ἄλλων ἁπάντων χρημάτων ἐγίγνοντο κύριοι, καὶ τοῦ μὴ μισθοῦν τὸν οἶκον τῆσ αἰτίασ ἀπελέλυντο, ταύτην δ’ οὐκ ἐσημήναντο, οὐδ’ αὐτὴν ἀπέδοσαν. ἄξιόν γε πιστεύειν αὐτοῖσ ὅ τι ἂν περὶ τούτων λέγωσιν. ἀλλ’ ἐγὼ οὐκ οἶδ’ ὅ τι τοῦτ’ ἔστιν.

οὐκ εἰά μισθοῦν τὸν οἶκον οὐδ’ ἐμφανῆ τὰ χρήματα ποιεῖν ὁ πατήρ. πότερον ἐμοί; ἢ τῇ πόλει; φαίνεσθε γὰρ τοὐναντίον ἐκείνῃ μὲν φανερὰ ποιήσαντεσ, ἐμοὶ δὲ παντάπασιν ἀφανῆ πεποιηκότεσ, καὶ οὐδὲ ταῦτ’ ἀποφαίνοντεσ ἐξ ὧν τιμησάμενοι τὰσ εἰσφορὰσ εἰσεφέρετε. δείξατε γὰρ ταύτην τὴν οὐσίαν, τίσ ἦν καὶ ποῦ παρέδοτέ μοι καὶ τίνοσ ἐναντίον. τὰ μὲν γὰρ δύο τάλαντα καὶ τὰσ ὀγδοήκοντα μνᾶσ ἀπὸ τῶν τεττάρων ταλάντων καὶ τρισχιλίων ἐλάβετε, ὥστ’ οὐδὲ ταύτασ ὑπὲρ ἐμοῦ εἰσ τὸ δημόσιον ἐτιμήσασθε·

ὑμέτεραι γὰρ ἦσαν ἐν ἐκείνοισ τοῖσ χρόνοισ. ἀλλὰ μὴν ἔκ γε τῆσ οἰκίασ καὶ τῶν τεττάρων καὶ δέκ’ ἀνδραπόδων καὶ τῶν τριάκοντα μνῶν, ἅ μοι παρεδώκατε, τὴν εἰσφορὰν οὐχ οἱο͂́ν τε γενέσθαι τοσαύτην ὅσην ὑμεῖσ συνετάξασθε πρὸσ τὴν συμμορίαν. ἀλλ’ ἀνάγκη μεγάλη τὰ καταλειφθέντα, πολλῷ πλείον’ ὄντα τούτων, πάνθ’ ὑμᾶσ ἔχειν ἐστίν, ἃ φανερῶσ ὅτι διηρπάκατ’ ἐξελεγχόμενοι τοιαῦτα πλάττεσθαι τολμᾶτε.

καὶ τοτὲ μὲν εἰσ ἀλλήλουσ ἀναφέρετε, πάλιν δ’ εἰληφέναι κατ’ ἀλλήλων μαρτυρεῖτε. φάσκοντεσ δ’ οὐ πολλὰ λαβεῖν μεγάλων ἀναλωμάτων λόγουσ ἀπενηνόχατε. πάντεσ δὲ κοινῇ μ’ ἐπιτροπεύσαντεσ ἰδίᾳ μετὰ ταῦθ’ ἕκαστοσ μηχανᾶσθε.

καὶ τὴν μὲν διαθήκην ἠφανίκατε, ἐξ ἧσ ἦν εἰδέναι περὶ πάντων τὴν ἀλήθειαν, φαίνεσθε δ’ οὐδέποτε ταὐτὰ περὶ ἀλλήλων λέγοντεσ. λαβὲ δὴ τὰσ μαρτυρίασ καὶ ἀνάγνωθ’ αὐτοῖσ πάσασ ἐφεξῆσ, ἵνα μνησθέντεσ καὶ τῶν μεμαρτυρημένων καὶ τῶν εἰρημένων ἀκριβέστερον διαγιγνώσκωσι περὶ αὐτῶν.

Μαρτυρίαι ταῦθ’ οὗτοι πρὸσ πεντεκαιδεκαταλάντουσ οἴκουσ συνετιμήσανθ’ ὑπὲρ ἐμοῦ· μνῶν δ’ οὐδ’ ἑβδομήκοντ’ ἀξίαν μοι παραδεδώκασι τὴν οὐσίαν τρεῖσ ὄντεσ.

λέγε τὰσ ἐφεξῆσ. Μαρτυρίαι ταύτην τὴν προῖκα οἵ τ’ ἐπίτροποι καταμαρτυροῦσιν αὐτὸν λαβεῖν, ἄλλοι τε πρὸσ οὓσ ἔχειν ὡμολόγησεν. ταύτην οὔτ’ αὐτὴν οὔτε τὸν σῖτον ἀποδέδωκεν.

λαβὲ τὰσ ἄλλασ καὶ ἀναγίγνωσκε. Μαρτυρίαι δύ’ ἔτη τὸ ἐργαστήριον διοικήσασ Θηριππίδῃ μὲν ἀποδέδωκε τὴν μίσθωσιν· ἐμοὶ δέ, δυοῖν ἐτοῖν λαβὼν τὴν πρόσοδον, τριάκοντα μνᾶσ, οὔτ’ αὐτὰσ οὔτε τὸ ἔργον ἀποδέδωκεν.

λάβ’ ἑτέραν καὶ ἀνάγνωθι. Μαρτυρία ταῦτα τἀνδράποδ’ ὡσ αὑτὸν λαβὼν οὗτοσ, καὶ τἄλλα τὰ μετὰ τούτων ὑποτεθένθ’ ἡμῖν, ἀνάλωμα μὲν εἰσ αὐτὰ τοσοῦτο λελόγισται, λῆμμα δ’ ἀπ’ αὐτῶν οὐδ’ ὁτιοῦν, καὶ αὐτοὺσ δὲ τοὺσ ἀνθρώπουσ ἠφάνικεν, οἳ δώδεκα μνᾶσ ἀτελεῖσ ἑκάστου τοῦ ἐνιαυτοῦ προσέφερον. λέγ’ ἑτέραν.

Μαρτυρία τοῦτον τὸν ἐλέφαντα καὶ τὸν σίδηρον πεπρακὼσ οὐδὲ καταλειφθῆναί φησιν, ἀλλὰ καὶ τούτων τὴν τιμὴν ἀποστερεῖ με, μάλιστα τάλαντον. λέγε ταυτασί.

Μαρτυρίαι ταῦθ’ οὗτοσ τρία τάλαντα καὶ χιλίασ ἔχει χωρὶσ τῶν ἄλλων. τοῦ μὲν οὖν ἀρχαίου πέντε τάλανθ’ ἃ εἴληφεν·

σὺν δὲ τοῖσ ἔργοισ, ἂν ἐπὶ δραχμῇ τισ τιθῇ μόνον, πλέον ἢ δέκα τάλαντ’ ἔχει. λέγε τὰσ ἐφεξῆσ. Μαρτυρίαι ταῦθ’ οὗτοι γραφῆναι μὲν ἐν ταῖσ διαθήκαισ καὶ λαβεῖν σφᾶσ αὐτοὺσ κατ’ ἀλλήλων μαρτυροῦσιν. οὗτοσ δὲ καὶ μεταπεμφθῆναι φάσκων ὑπὸ τοῦ πατρόσ, καὶ ἐλθὼν εἰσ τὴν οἰκίαν, εἰσελθεῖν μὲν οὔ φησιν ὡσ τὸν μεταπεμψάμενον, οὐδ’ ὁμολογῆσαι περὶ τούτων οὐδέν, Δημοφῶντοσ δ’ ἀκοῦσαι γραμματεῖον ἀναγιγνώσκοντοσ καὶ Θηριππίδου λέγοντοσ ὡσ ἐκεῖνοσ ταῦτα διέθετο, καὶ προεισεληλυθὼσ καὶ ἅπαντα διωμολογημένοσ πρὸσ τὸν πατέρα, ὅσαπερ ἐκεῖνοσ γράψασ κατέλιπεν.

ὁ γὰρ πατήρ, ὦ ἄνδρεσ δικασταί, ὡσ ᾔσθετο τὴν νόσον οὐκ ἀποφευξόμενοσ, συγκαλέσασ τούτουσ τρεῖσ ὄντασ, καὶ συμπαρακαθισάμενοσ Δήμωνα τὸν ἀδελφόν, τὰ σώμαθ’ ἡμῶν εἰσ τὰσ χεῖρασ ἐνέθηκεν παρακαταθήκην ἐπονομάζων, τὴν μὲν ἀδελφὴν Δημοφῶντι καὶ δύο τάλαντα προῖκα διδοὺσ εὐθύσ, καὶ γυναῖκ’ αὐτῷ ταύτην ἐγγυῶν, ἐμὲ δὲ πᾶσιν κοινῇ μετὰ τῶν χρημάτων παρακατατιθέμενοσ, καὶ ἐπισκήπτων μισθῶσαί τε τὸν οἶκον καὶ συνδιασῷσαί μοι τὴν οὐσίαν, διδοὺσ ἅμα τε Θηριππίδῃ τὰσ ἑβδομήκοντα μνᾶσ, καὶ τούτῳ τήν τ’ ἐμὴν μητέρ’ ἐγγυῶν ἐπὶ ταῖσ ὀγδοήκοντα μναῖσ, κἄμ’ εἰσ τὰ τούτου γόνατα τιθείσ·

ὧν οὗτοσ ὁ πάντων ἀνθρώπων ἀνοσιώτατοσ οὐδένα λόγον ἐποιήσατο, κύριοσ τῶν ἐμῶν γενόμενοσ ἐπὶ τούτοισ, ἀλλὰ τὰ χρήματά με πάντ’ ἀπεστερηκὼσ μετὰ τῶν συνεπιτρόπων, ἐλεεῖσθαι νῦν ὑφ’ ὑμῶν ἀξιώσει, μνῶν οὐδ’ ἑβδομήκοντ’ ἄξια τρίτοσ αὐτὸσ ἀποδεδωκώσ, εἶτα καὶ τούτοισ αὐτοῖσ πάλιν ἐπιβεβουλευκώσ.

ὡσ γὰρ τὰσ δίκασ ταύτασ ἔμελλον εἰσιέναι κατ’ αὐτῶν, ἀντίδοσιν ἐπ’ ἐμὲ παρεσκεύασαν, ἵν’ εἰ μὲν ἀντιδοίην, μὴ ἐξείη μοι πρὸσ αὐτοὺσ ἀντιδικεῖν, ὡσ καὶ τῶν δικῶν τούτων τοῦ ἀντιδόντοσ γιγνομένων, εἰ δὲ μηδὲν τούτων ποιοίην, ἵν’ ἐκ βραχείασ οὐσίασ λῃτουργῶν παντάπασιν ἀναιρεθείην.

καὶ τοῦτ’ αὐτοῖσ ὑπηρέτησε Θρασύλοχοσ ὁ Ἀναγυράσιοσ· ᾧ τούτων οὐδὲν ἐνθυμηθεὶσ ἀντέδωκα μέν, ἀπέκλεισα δ’ ὡσ διαδικασίασ τευξόμενοσ· οὐ τυχὼν δὲ ταύτησ, τῶν χρόνων ὑπογύων ὄντων, ἵνα μὴ στερηθῶ τῶν δικῶν, ἀπέτεισα τὴν λῃτουργίαν ὑποθεὶσ τὴν οἰκίαν καὶ τἀμαυτοῦ πάντα, βουλόμενοσ εἰσ ὑμᾶσ εἰσελθεῖν τὰσ πρὸσ τουτουσὶ δίκασ. ἆρ’ οὐ μεγάλα μὲν ἐξ ἀρχῆσ ἠδίκημαι, μεγάλα δ’, ὅτι δίκην ζητῶ λαβεῖν, νῦν ὑπ’ αὐτῶν βλάπτομαι;

τίσ δ’ οὐκ ἂν ὑμῶν τούτῳ μὲν φθονήσειε δικαίωσ, ἡμᾶσ δ’ ἐλεήσειεν, ὁρῶν τῷ μὲν πρὸσ τῇ οὐσίᾳ τῇ παραδοθείσῃ πλεῖν ἢ δέκα ταλάντων τὴν ἐμὴν τοσαύτην οὖσαν προσγεγενημένην, ἡμᾶσ δὲ μὴ μόνον τῶν πατρῴων διημαρτηκότασ, ἀλλὰ καὶ τῶν νῦν παραδοθέντων διὰ τὴν τούτων πονηρίαν ἀπεστερημένουσ; ποῖ δ’ ἂν τραποίμεθα, εἴ τι ἄλλο ψηφίσαισθ’ ὑμεῖσ περὶ αὐτῶν; εἰσ τὰ ὑποκείμενα τοῖσ δανείσασιν; ἀλλὰ τῶν ὑποθεμένων ἐστίν. ἀλλ’ εἰσ τὰ περιόντ’ αὐτῶν; ἀλλὰ τούτου γίγνεται, τὴν ἐπωβελίαν ἐὰν ὄφλωμεν. μηδαμῶσ, ὦ ἄνδρεσ δικασταί, γένησθ’ ἡμῖν τοσούτων αἴτιοι κακῶν·

μηδὲ τὴν μητέρα κἀμὲ καὶ τὴν ἀδελφὴν ἀνάξια παθόντασ περιίδητε, οὓσ ὁ πατὴρ οὐκ ἐπὶ ταύταισ ταῖσ ἐλπίσιν κατέλιπεν, ἀλλὰ τὴν μὲν ὡσ Δημοφῶντι συνοικήσουσαν ἐπὶ δυοῖν ταλάντοιν προικί, τὴν δ’ ἐπ’ ὀγδοήκοντα μναῖσ τούτῳ τῷ σχετλιωτάτῳ πάντων ἀνθρώπων, ἐμὲ δ’ ὑμῖν διάδοχον ἀνθ’ αὑτοῦ τῶν λῃτουργιῶν ἐσόμενον. βοηθήσατ’ οὖν ἡμῖν, βοηθήσατε, καὶ τοῦ δικαίου καὶ ὑμῶν αὐτῶν ἕνεκα καὶ ἡμῶν καὶ τοῦ πατρὸσ τοῦ τετελευτηκότοσ.

σῴσατε, ἐλεήσατε, ἐπειδή μ’ οὗτοι συγγενεῖσ ὄντεσ οὐκ ἠλέησαν. εἰσ ὑμᾶσ καταπεφεύγαμεν. ἱκετεύω, ἀντιβολῶ πρὸσ παίδων, πρὸσ γυναικῶν, πρὸσ τῶν ὄντων ἀγαθῶν ὑμῖν. οὕτωσ ὄναισθε τούτων, μὴ περιίδητέ με, μηδὲ ποιήσητε τὴν μητέρα καὶ τῶν ἐπιλοίπων ἐλπίδων εἰσ τὸν βίον στερηθεῖσαν ἀνάξιον αὑτῆσ τι παθεῖν· ἣ νῦν μὲν οἰέται τυχόντα με τῶν δικαίων παρ’ ὑμῖν ὑποδέξεσθαι καὶ τὴν ἀδελφὴν ἐκδώσειν·

εἰ δ’ ὑμεῖσ ἄλλο τι γνώσεσθε, ὃ μὴ γένοιτο, τίν’ οἰέσθ’ αὐτὴν ψυχὴν ἕξειν, ὅταν ἐμὲ μὲν ἴδῃ μὴ μόνον τῶν πατρῴων ἀπεστερημένον, ἀλλὰ καὶ πρὸσ ἠτιμωμένον, περὶ δὲ τῆσ ἀδελφῆσ μηδ’ ἐλπίδ’ ἔχουσαν ὡσ τεύξεταί τινοσ τῶν προσηκόντων διὰ τὴν ἐσομένην ἀπορίαν; οὐκ ἄξιοσ, ὦ ἄνδρεσ δικασταί, οὔτ’ ἐγὼ δίκησ ἐν ὑμῖν μὴ τυχεῖν, οὔθ’ οὗτοσ τοσαῦτα χρήματ’ ἀδίκωσ κατασχεῖν.

ἐμοῦ μὲν γὰρ εἰ καὶ μήπω πεῖραν εἰλήφατε, ποῖόσ τισ ἂν εἰσ ὑμᾶσ εἰήν, ἐλπίζειν προσήκει μὴ χείρω τοῦ πατρὸσ ἔσεσθαι. τούτου δὲ πεῖραν ἔχετε, καὶ σαφῶσ ἴσθ’ ὅτι πολλὴν οὐσίαν παραλαβὼν οὐ μόνον οὐδὲν πεφιλοτίμηται πρὸσ ὑμᾶσ, ἀλλὰ καὶ τἀλλότρι’ ἀποστερῶν ἀποδέδεικται. ταῦτ’ οὖν σκοποῦντεσ καὶ τἄλλα μνησθέντεσ, ᾗ δίκαιόν ἐστι, ταύτῃ ψηφίσασθε.

πίστεισ δ’ ἔχεθ’ ἱκανὰσ ἐκ μαρτύρων, ἐκ τεκμηρίων, ἐκ τῶν εἰκότων, ἐξ ὧν οὗτοι λαβεῖν ὁμολογοῦντεσ ἁθρόα τἀμά, ταῦτ’ ἀνηλωκέναι φασὶν οὐκ ἀνηλωκότεσ, ἀλλ’ αὐτοὶ πάντ’ ἔχοντεσ. ὧν ἐνθυμουμένουσ χρὴ ποιήσασθαί τιν’ ἡμῶν πρόνοιαν, εἰδότασ ὅτι ἐγὼ μὲν τἀμαυτοῦ δι’ ὑμῶν κομισάμενοσ εἰκότωσ λῃτουργεῖν ἐθελήσω, χάριτασ ὀφείλων ὅτι μοι δικαίωσ ἀπέδοτε τὴν οὐσίαν, οὗτοσ δ’, ἐὰν αὐτὸν ποιήσητε τῶν ἐμῶν κύριον, οὐδὲν ποιήσει τοιοῦτον.

μὴ γὰρ οἰέσθ’ αὐτόν, ὑπὲρ ὧν ἤρνηται μὴ λαβεῖν, ὑπὲρ τούτων ὑμῖν λῃτουργεῖν ἐθελήσειν, ἀλλ’ ἀποκρύψεσθαι μᾶλλον, ἵνα δικαίωσ ἀποπεφευγέναι δοκῇ.

일치하는 문장이 없습니다.

SEARCH

MENU NAVIGATION