Athenaeus, The Deipnosophists, Book 12, book 12, chapter 53 2:

ἔφιπποσ δέ φησιν ὡσ Ἀλέξανδροσ καὶ τὰσ ἱερὰσ ἐσθῆτασ ἐφόρει ἐν τοῖσ δείπνοισ, ὁτὲ μὲν τὴν τοῦ Ἄμμωνοσ πορφυρίδα καὶ περισχιδεῖσ καὶ κέρατα καθάπερ ὁ θεόσ, ὁτὲ δὲ τὴν τῆσ Ἀρτέμιδοσ, ἣν καὶ ἐπὶ τοῦ ἁρ́ματοσ ἐφόρει πολλάκισ, ἔχων τὴν Περσικὴν στολήν, ὑποφαίνων ἄνωθεν τῶν ὤμων τό τε τόξον καὶ τὴν σιβύνην, ἐνίοτε δὲ καὶ τὴν τοῦ Ἑρμοῦ· τὰ μὲν ἄλλα σχεδὸν καὶ καθ’ ἑκάστην ἡμέραν χλαμύδα τε πορφυρᾶν καὶ χιτῶνα μεσόλευκον καὶ τὴν καυσίαν ἔχουσαν τὸ διάδημα τὸ βασιλικόν, ἐν δὲ τῇ συνουσίᾳ τά τε πέδιλα καὶ τὸν πέτασον ἐπὶ τῇ κεφαλῇ καὶ τὸ κηρύκειον ἐν τῇ χειρί, πολλάκισ δὲ καὶ λεοντῆν καὶ ῥόπαλον ὥσπερ ὁ Ἡρακλῆσ. τί οὖν θαυμαστὸν εἰ καὶ καθ’ ἡμᾶσ Κόμμοδοσ ὁ αὐτοκράτωρ ἐπὶ τῶν ὀχημάτων παρακείμενον εἶχεν τὸ Ἡράκλειον ῥόπαλον ὑπεστρωμένησ αὐτῷ λεοντῆσ καὶ Ἡρακλῆσ καλεῖσθαι ἤθελεν, Ἀλεξάνδρου τοῦ Ἀριστοτελικοῦ τοσούτοισ αὑτὸν ἀφομοιοῦντοσ θεοῖσ, ἀτὰρ καὶ τῇ Ἀρτέμιδι;