Apollodorus, Library and Epitome, book 2, chapter 5 9:

(아폴로도로스, Library and Epitome, book 2, chapter 5 9:)

ἔνατον ἆθλον Ἡρακλεῖ ἐπέταξε ζωστῆρα κομίζειν τὸν Ἱππολύτησ. αὕτη δὲ ἐβασίλευεν Ἀμαζόνων, αἳ κατῴκουν περὶ τὸν Θερμώδοντα ποταμόν, ἔθνοσ μέγα τὰ κατὰ πόλεμον· ἤσκουν γὰρ ἀνδρίαν, καὶ εἴ ποτε μιγεῖσαι γεννήσειαν, τὰ θήλεα ἔτρεφον, καὶ τοὺσ μὲν δεξιοὺσ μαστοὺσ ἐξέθλιβον, ἵνα μὴ κωλύωνται ἀκοντίζειν, τοὺσ δὲ ἀριστεροὺσ εἰών, ἵνα τρέφοιεν. εἶχε δὲ Ἱππολύτη τὸν Ἄρεοσ ζωστῆρα, σύμβολον τοῦ πρωτεύειν ἁπασῶν. ἐπὶ τοῦτον τὸν ζωστῆρα Ἡρακλῆσ ἐπέμπετο, λαβεῖν αὐτὸν ἐπιθυμούσησ τῆσ Εὐρυσθέωσ θυγατρὸσ Ἀδμήτησ. παραλαβὼν οὖν ἐθελοντὰσ συμμάχουσ ἐν μιᾷ νηὶ ἔπλει, καὶ προσίσχει νήσῳ Πάρῳ, ἣν κατῴκουν οἱ Μίνωοσ υἱοὶ Εὐρυμέδων Χρύσησ Νηφαλίων Φιλόλαοσ. ἀποβάντων δὲ δύο τῶν ἐν <τῇ> νηὶ συνέβη τελευτῆσαι ὑπὸ τῶν Μίνωοσ υἱῶν· ὑπὲρ ὧν ἀγανακτῶν Ἡρακλῆσ τούτουσ μὲν παραχρῆμα ἀπέκτεινε, τοὺσ δὲ λοιποὺσ κατακλείσασ ἐπολιόρκει, ἑώσ ἐπιπρεσβευσάμενοι παρεκάλουν ἀντὶ τῶν ἀναιρεθέντων δύο λαβεῖν, οὓσ ἂν αὐτὸσ θελήσειεν. ὁ δὲ λύσασ τὴν πολιορκίαν, καὶ τοὺσ Ἀνδρόγεω τοῦ Μίνωοσ υἱοὺσ ἀνελόμενοσ Ἀλκαῖον καὶ Σθένελον, ἧκεν εἰσ Μυσίαν πρὸσ Λύκον τὸν Δασκύλου, καὶ ξενισθεὶσ ὑπὸ τοῦ Βεβρύκων βασιλέωσ συμβαλόντων, βοηθῶν Λύκῳ πολλοὺσ ἀπέκτεινε, μεθ’ ὧν καὶ τὸν βασιλέα Μύγδονα, ἀδελφὸν Ἀμύκου. καὶ τῆσ Βεβρύκων πολλὴν ἀποτεμόμενοσ γῆν ἔδωκε Λύκῳ· ὁ δὲ πᾶσαν ἐκείνην ἐκάλεσεν Ἡράκλειαν. καταπλεύσαντοσ δὲ εἰσ τὸν ἐν Θεμισκύρᾳ λιμένα, παραγενομένησ εἰσ αὐτὸν Ἱππολύτησ καὶ τίνοσ ἥκοι χάριν πυθομένησ, καὶ δώσειν τὸν ζωστῆρα ὑποσχομένησ, Ἥρα μιᾷ τῶν Ἀμαζόνων εἰκασθεῖσα τὸ πλῆθοσ ἐπεφοίτα, λέγουσα ὅτι τὴν βασιλίδα ἀφαρπάζουσιν οἱ προσελθόντεσ ξένοι. αἱ δὲ μεθ’ ὅπλων ἐπὶ τὴν ναῦν κατέθεον σὺν ἵπποισ. ὡσ δὲ εἶδεν αὐτὰσ καθωπλισμένασ Ἡρακλῆσ, νομίσασ ἐκ δόλου τοῦτο γενέσθαι, τὴν μὲν Ἱππολύτην κτείνασ τὸν ζωστῆρα ἀφαιρεῖται, πρὸσ δὲ τὰσ λοιπὰσ ἀγωνισάμενοσ ἀποπλεῖ, καὶ προσίσχει Τροίᾳ. συνεβεβήκει δὲ τότε κατὰ μῆνιν Ἀπόλλωνοσ καὶ Ποσειδῶνοσ ἀτυχεῖν τὴν πόλιν. Ἀπόλλων γὰρ καὶ Ποσειδῶν τὴν Λαομέδοντοσ ὕβριν πειράσαι θέλοντεσ, εἰκασθέντεσ ἀνθρώποισ ὑπέσχοντο ἐπὶ μισθῷ τειχιεῖν τὸ Πέργαμον. τοῖσ δὲ τειχίσασι τὸν μισθὸν οὐκ ἀπεδίδου. διὰ τοῦτο Ἀπόλλων μὲν λοιμὸν ἔπεμψε, Ποσειδῶν δὲ κῆτοσ ἀναφερόμενον ὑπὸ πλημμυρίδοσ, ὃ τοὺσ ἐν τῷ πεδίῳ συνήρπαζεν ἀνθρώπουσ. χρησμῶν δὲ λεγόντων ἀπαλλαγὴν ἔσεσθαι τῶν συμφορῶν, ἐὰν προθῇ Λαομέδων Ἡσιόνην τὴν θυγατέρα αὐτοῦ τῷ κήτει βοράν, οὗτοσ προύθηκε ταῖσ πλησίον τῆσ θαλάσσησ πέτραισ προσαρτήσασ. ταύτην ἰδὼν ἐκκειμένην Ἡρακλῆσ ὑπέσχετο σώσειν, εἰ τὰσ ἵππουσ παρὰ Λαομέδοντοσ λήψεται ἃσ Ζεὺσ ποινὴν τῆσ Γανυμήδουσ ἁρπαγῆσ ἔδωκε. δώσειν δὲ Λαομέδοντοσ εἰπόντοσ, κτείνασ τὸ κῆτοσ Ἡσιόνην ἔσωσε. μὴ βουλομένου δὲ τὸν μισθὸν ἀποδοῦναι, πολεμήσειν Τροίᾳ ἀπειλήσασ ἀνήχθη. καὶ προσίσχει Αἴνῳ, ἔνθα ξενίζεται ὑπὸ Πόλτυοσ. ἀποπλέων δὲ ἐπὶ τῆσ ἠιόνοσ τῆσ Αἰνίασ Σαρπηδόνα, Ποσειδῶνοσ μὲν υἱὸν ἀδελφὸν δὲ Πόλτυοσ, ὑβριστὴν ὄντα τοξεύσασ ἀπέκτεινε. καὶ παραγενόμενοσ εἰσ Θάσον καὶ χειρωσάμενοσ τοὺσ ἐνοικοῦντασ Θρᾷκασ ἔδωκε τοῖσ Ἀνδρόγεω παισὶ κατοικεῖν. ἐκ Θάσου δὲ ὁρμηθεὶσ ἐπὶ Τορώνην Πολύγονον καὶ Τηλέγονον, τοὺσ Πρωτέωσ τοῦ Ποσειδῶνοσ υἱούσ, παλαίειν προκαλουμένουσ κατὰ τὴν πάλην ἀπέκτεινε. κομίσασ δὲ τὸν ζωστῆρα εἰσ Μυκήνασ ἔδωκεν Εὐρυσθεῖ.

일치하는 문장이 없습니다.

SEARCH

MENU NAVIGATION