Septuagint, Prophetia Malachiae 4:

ΔΙΟΤΙ ἰδοὺ ἡμέρα Κυρίου ἔρχεται καιομένη ὡσ κλίβανοσ καὶ φλέξει αὐτούσ, καὶ ἔσονται πάντεσ οἱ ἀλλογενεῖσ καὶ πάντεσ οἱ ποιοῦντεσ ἄνομα καλάμη, καὶ ἀνάψει αὐτοὺσ ἡ ἡμέρα ἡ ἐρχομένη, λέγει Κύριοσ παντοκράτωρ, καὶ οὐ μὴ ὑπολειφθῇ ἐξ αὐτῶν ρίζα οὐδὲ κλῆμα. καὶ ἀνατελεῖ ὑμῖν τοῖσ φοβουμένοισ τὸ ὄνομά μου ἥλιοσ δικαιοσύνησ καὶ ἴασισ ἐν ταῖσ πτέρυξιν αὐτοῦ, καὶ ἐξελεύσεσθε καὶ σκιρτήσετε ὡσ μοσχάρια ἐκ δεσμῶν ἀνειμένα. καὶ καταπατήσετε ἀνόμουσ, διότι ἔσονται σποδὸσ ὑποκάτω τῶν ποδῶν ὑμῶν ἐν τῇ ἡμέρᾳ, ᾗ ἐγὼ ποιῶ, λέγει Κύριοσ παντοκράτωρ. καὶ ἰδοὺ ἐγὼ ἀποστελῶ ὑμῖν Ἠλίαν τὸν Θεσβίτην, πρὶν ἢ ἐλθεῖν τὴν ἡμέραν Κυρίου τὴν μεγάλην καὶ ἐπιφανῆ, ὃσ ἀποκαταστήσει καρδίαν πατρὸσ πρὸσ υἱὸν καὶ καρδίαν ἀνθρώπου πρὸσ τὸν πλησίον αὐτοῦ, μὴ ἐλθὼν πατάξω τὴν γῆν ἄρδην. μνήσθητι νόμου Μωσῆ τοῦ δούλου μου, καθότι ἐνετειλάμην αὐτῷ ἐν Χωρὴβ πρὸσ πάντα τὸν Ἰσραὴλ προστάγματα καὶ δικαιώματα.