Septuagint, Liber II Regum 25:

(70인역 성경, 열왕기 하권 25:)

ΚΑΙ ἐγενήθη ἐν τῷ ἔτει τῷ ἐνάτῳ τῆσ βασιλείασ αὐτοῦ ἐν τῷ μηνὶ τῷ δεκάτῳ ἦλθε Ναβουχοδονόσορ ὁ βασιλεὺσ Βαβυλῶνοσ καὶ πᾶσα ἡ δύναμισ αὐτοῦ ἐπὶ Ἱερουσαλὴμ καὶ παρενέβαλεν ἐπ̓ αὐτὴν καὶ ᾠκοδόμησεν ἐπ̓ αὐτὴν περίτειχοσ κύκλῳ. καὶ ἦλθεν ἡ πόλισ ἐν περιοχῇ ἕωσ τοῦ ἑνδεκάτου ἔτουσ τοῦ βασιλέωσ Σεδεκίου ἐνάτῃ τοῦ μηνὸς καὶ ἐνίσχυσεν ὁ λιμὸσ ἐν τῇ πόλει, καὶ οὐκ ἦσαν ἄρτοι τῷ λαῷ τῆσ γῆσ. καὶ ἐρράγη ἡ πόλισ, καὶ πάντεσ οἱ ἄνδρεσ τοῦ πολέμου ἐξῆλθον νυκτὸσ ὁδὸν πύλησ τῆσ ἀνὰ μέσον τῶν τειχῶν, αὕτη ἥ ἐστι τοῦ κήπου τοῦ βασιλέωσ, καὶ οἱ Χαλδαῖοι ἐπὶ τὴν πόλιν κύκλῳ. καὶ ἐπορεύθη ὁδὸν τὴν Ἄραβα, καὶ ἐδίωξεν ἡ δύναμισ τῶν Χαλδαίων ὀπίσω τοῦ βασιλέωσ καὶ κατέλαβον αὐτὸν ἐν Ἀραβὼθ Ἱεριχώ, καὶ πᾶσα ἡ δύναμισ αὐτοῦ διεσπάρη ἐπάνωθεν αὐτοῦ. καὶ συνέλαβον τὸν βασιλέα καὶ ἤγαγον αὐτὸν πρὸσ βασιλέα Βαβυλῶνοσ εἰσ Δεβλαθά, καὶ ἐλάλησε μετ̓ αὐτοῦ κρίσιν. καὶ τοὺσ υἱοὺσ Σεδεκίου ἔσφαξε κατ̓ ὀφθαλμοὺσ αὐτοῦ, καὶ τοὺσ ὀφθαλμοὺσ Σεδεκίου ἐξετύφλωσε καὶ ἔδησεν αὐτὸν ἐν πέδαισ καὶ ἤγαγεν εἰσ Βαβυλῶνα. Καὶ ἐν τῷ μηνὶ τῷ πέμπτῳ ἑβδόμῃ τοῦ μηνὸσ ἦλθε Ναβουζαρδὰν ὁ ἀρχιμάγειροσ ἑστὼσ ἐνώπιον βασιλέωσ Βαβυλῶνοσ εἰσ Ἱερουσαλήμ. καὶ ἐνέπρησε τὸν οἶκον Κυρίου καὶ τὸν οἶκον τοῦ βασιλέωσ καὶ πάντασ τοὺσ οἴκουσ Ἱερουσαλήμ, καὶ πᾶν οἶκον ἐνέπρησεν ὁ ἀρχιμάγειροσ. καὶ τὸ τεῖχοσ Ἱερουσαλὴμ κυκλόθεν κατέσπασεν ἡ δύναμισ τῶν Χαλδαίων. καὶ τὸ περισσὸν τοῦ λαοῦ τὸ καταλειφθὲν ἐν τῇ πόλει καὶ τοὺσ ἐμπεπτωκότασ, οἳ ἐνέπεσον πρὸσ τὸν βασιλέα Βαβυλῶνοσ, καὶ τὸ λοιπὸν τοῦ στηρίγματοσ μετῇρε Ναβουζαρδὰν ὁ ἀρχιμάγειροσ. καὶ ἀπὸ τῶν πτωχῶν τῆσ γῆσ ὑπέλιπεν ὁ ἀρχιμάγειροσ εἰσ ἀμπελουργοὺσ καὶ εἰσ γαβίν. καὶ τοὺσ στύλουσ τοὺσ χαλκοῦσ τοὺσ ἐν οἴκῳ Κυρίου καὶ τὰσ μεχωνὼθ καὶ τὴν θάλασσαν τὴν χαλκῆν τὴν ἐν οἴκῳ Κυρίου συνέτριψαν οἱ Χαλδαῖοι. καὶ ᾖραν τὸν χαλκὸν αὐτῶν εἰσ Βαβυλῶνα. καὶ τοὺσ λέβητασ καὶ τὰ ἰαμὶν καὶ τὰσ φιάλασ καὶ τὰσ θυί̈σκασ καὶ πάντα τὰ σκεύη τὰ χαλκᾶ, ἐν οἷσ λειτουργοῦσιν ἐν αὐτοῖσ, ἔλαβε. καὶ τὰ πυρεῖα καὶ τὰσ φιάλασ τὰσ χρυσᾶσ καὶ τὰσ ἀργυρᾶσ ἔλαβεν ὁ ἀρχιμάγειροσ, στύλουσ δύο καὶ τὴν θάλασσαν μίαν καὶ τὰσ μεχωνώθ, ἃσ ἐποίησε Σαλωμὼν τῷ οἴκῳ Κυρίου. οὐκ ἦν σταθμὸσ τοῦ χαλκοῦ πάντων τῶν σκευῶν. ὀκτωκαίδεκα πήχεων ὕψοσ τοῦ στύλου τοῦ ἑνόσ, καὶ τὸ χωθὰρ ἐπ̓ αὐτοῦ τὸ χαλκοῦν, καὶ τὸ ὕψοσ τοῦ χωθὰρ τριῶν πήχεων, σαβαχὰ καὶ ροαὶ ἐπὶ τῷ χωθὰρ κύκλῳ, τὰ πάντα χαλκᾶ. καὶ κατὰ τὰ αὐτὰ τῷ στύλῳ τῷ δευτέρῳ ἐπὶ τῶ σαβαχά. καὶ ἔλαβεν ὁ ἀρχιμάγειροσ τὸν Σαραίαν ἱερέα τὸν πρῶτον καὶ τὸν Σοφονίαν υἱὸν τῆσ δευτερώσεωσ καὶ τοὺσ τρεῖσ τοὺσ φυλάσσοντασ τὸν σταθμὸν καὶ ἐκ τῆσ πόλεωσ ἔλαβον εὐνοῦχον ἕνα, ὃσ ἦν ἐπιστάτησ τῶν ἀνδρῶν τῶν πολεμιστῶν, καὶ πέντε ἄνδρασ τῶν ὁρώντων τὸ πρόσωπον τοῦ βασιλέωσ τοὺσ εὑρεθέντασ ἐν τῇ πόλει καὶ τὸν γραμματέα τοῦ ἄρχοντοσ τῆσ δυνάμεωσ τὸν ἐκτάσσοντα τὸν λαὸν τῆσ γῆσ καὶ ἑξήκοντα ἄνδρασ τοῦ λαοῦ τῆσ γῆσ τοὺσ εὑρεθέντασ ἐν τῇ πόλει. καὶ ἔλαβεν αὐτοὺσ Ναβουζαρδὰν ὁ ἀρχιμάγειροσ, καὶ ἤγαγεν αὐτοὺσ πρὸσ τὸν βασιλέα Βαβυλῶνοσ εἰσ Δεβλαθά. καὶ ἔπαισεν αὐτοὺσ ὁ βασιλεὺσ Βαβυλῶνοσ καὶ ἐθανάτωσεν αὐτοὺσ εἰσ Δεβλαθὰ ἐν γῇ Αἰμάθ. καὶ ἀπῳκίσθη Ἰούδασ ἐπάνωθεν τῆσ γῆσ αὐτοῦ. Καὶ ὁ λαὸσ ὁ καταλειφθεὶσ ἐν τῇ γῇ Ἰούδα, οὓσ κατέλιπε Ναβουχοδονόσορ βασιλεὺσ Βαβυλῶνοσ, καὶ κατέστησεν ἐπ̓ αὐτῶν τὸν Γοδολίαν υἱὸν Ἀχικὰμ υἱοῦ Σαφάν. καὶ ἤκουσαν πάντεσ οἱ ἄρχοντεσ τῆσ δυνάμεωσ, αὐτοὶ καὶ οἱ ἄνδρεσ αὐτῶν, ὅτι κατέστησε βασιλεὺσ Βαβυλῶνοσ τὸν Γοδολίαν, καὶ ἦλθον πρὸσ Γοδολίαν εἰσ Μασσηφάθ, καὶ Ἰσμαὴλ υἱὸσ Ναθανίου καὶ Ἰωανὰν υἱὸσ Καρὴθ καὶ Σαραίασ υἱὸσ Θαναμὰθ ὁ Νετωφαθίτησ καὶ Ἰεζονίασ υἱὸσ τοῦ Μαχαθί, αὐτοὶ καὶ οἱ ἄνδρεσ αὐτῶν. καὶ ὤμοσε Γοδολίασ αὐτοῖσ καὶ τοῖσ ἀνδράσιν αὐτῶν καὶ εἶπεν αὐτοῖσ. μὴ φοβεῖσθε πάροδον τῶν Χαλδαίων. καθίσατε ἐν τῇ γῇ καὶ δουλεύσατε τῷ βασιλεῖ Βαβυλῶνοσ, καὶ καλῶσ ἔσται ὑμῖν. καὶ ἐγενήθη ἐν τῷ ἑβδόμῳ μηνὶ ἦλθεν Ἰσμαὴλ υἱὸσ Ναθανίου υἱοῦ Ἑλισαμὰ ἐκ τοῦ σπέρματοσ τῶν βασιλέων καὶ δέκα ἄνδρεσ μετ̓ αὐτοῦ. καὶ ἐπάταξε τὸν Γοδολίαν, καὶ ἀπέθανε, καὶ τοὺσ Ἰουδαίουσ καὶ τοὺσ Χαλδαίουσ, οἳ ἦσαν μετ̓ αὐτοῦ ἐν Μασσηφάθ. καὶ ἀνέστη πᾶσ ὁ λαὸσ ἀπὸ μικροῦ ἕωσ μεγάλου καὶ οἱ ἄρχοντεσ τῶν δυνάμεων καὶ εἰσῆλθον εἰσ Αἴγυπτον, ὅτι ἐφοβήθησαν ἀπὸ προσώπου τῶν Χαλδαίων. Καὶ ἐγενήθη ἐν τῷ τριακοστῷ καὶ ἑβδόμῳ ἔτει τῆσ ἀποικίασ τοῦ Ἰωαχὶμ βασιλέωσ Ἰούδα, ἐν τῷ δωδεκάτῳ μηνὶ ἑβδόμῃ καὶ εἰκάδι τοῦ μηνὸσ ὕψωσεν Εὐιαλμαρωδὰχ βασιλεὺσ Βαβυλῶνοσ ἐν τῷ ἐνιαυτῷ τῆσ βασιλείασ αὐτοῦ τὴν κεφαλὴν Ἰωαχὶμ τοῦ βασιλέωσ Ἰούδα καὶ ἐξήγαγεν αὐτὸν ἐξ οἴκου φυλακῆσ αὐτοῦ. καὶ ἐλάλησε μετ̓ αὐτοῦ ἀγαθὰ καὶ ἔδωκε τὸν θρόνον αὐτοῦ ἐπάνωθεν τῶν θρόνων τῶν βασιλέων τῶν μετ̓ αὐτοῦ ἐν Βαβυλῶνι, καὶ ἠλλοίωσε τὰ ἱμάτια τῆσ φυλακῆσ αὐτοῦ καὶ ἤσθιεν ἄρτον διαπαντὸσ ἐνώπιον αὐτοῦ πάσασ τὰσ ἡμέρασ τῆσ ζωῆσ αὐτοῦ. καὶ ἡ ἑστιατορία αὐτοῦ ἑστιατορία διαπαντὸσ ἐδόθη αὐτῷ ἐξ οἴκου τοῦ βασιλέωσ λόγον ἡμέρασ ἐν τῇ ἡμέρᾳ αὐτοῦ πάσασ τὰσ ἡμέρασ τῆσ ζωῆσ αὐτοῦ.

목록

일치하는 문장이 없습니다.

SEARCH

MENU NAVIGATION