Plutarch, Quomodo adolescens poetas audire debeat, chapter, section 3

ἔτι δὲ μᾶλλον ἐπιστήσομεν αὐτὸν ἅμα τῷ προσάγειν τοῖσ ποιήμασιν ὑπογράφοντεσ τὴν ποιητικὴν ὅτι μιμητικὴ τέχνη καὶ δύναμίσ ἐστιν ἀντίστροφοσ τῇ ζῳγραφίᾳ. καὶ μὴ μόνον ἐκεῖνο τὸ θρυλούμενον ἀκηκοὼσ ἔστω, ζῳγραφίαν μὲν εἶναι φθεγγομένην τὴν ποίησιν, ποίησιν δὲ σιγῶσαν τὴν ζῳγραφίαν, ἀλλὰ πρὸσ τούτῳ διδάσκωμεν αὐτὸν ὅτι γεγραμμένην σαύραν ἢ πίθηκον ἢ Θερσίτου πρόσωπον ἰδόντεσ ἡδόμεθα καὶ θαυμάζομεν οὐχ ὡσ καλὸν ἀλλ’ ὡσ ὅμοιον.