Dionysius of Halicarnassus, Antiquitates Romanae, Books X-XX, book 11, chapter 33

(디오니시오스, Antiquitates Romanae, Books X-XX, book 11, chapter 33)

πλείονα φυλακὴν περιστησάμενοσ, ὡσ μηδὲν ὑπὸ τῶν ὄχλων βιασθείη, καὶ τὰ πέριξ τοῦ βήματοσ ἑταίρων τε καὶ πελατῶν ὄχλῳ προκαταλαβών. ἵνα δὲ σὺν εὐσχήμονι δίκησ τοῦτο πράττῃ προφάσει, μὴ παραγενηθέντοσ ἐπὶ τὴν ἐγγύην τοῦ πατρόσ, ἐπιστολὰσ δοὺσ τοῖσ πιστοτάτοισ ἱππεῦσιν ἔπεμψεν ἐπὶ τὸν χάρακα πρὸσ Ἀντώνιον τὸν ἡγεμόνα τοῦ τάγματοσ, ὑφ’ οὗ ἦν Οὐεργίνιοσ, ἀξιῶν αὐτὸν κατέχειν τὸν ἄνδρα ἐν ἐπιμελεῖ φυλακῇ, μὴ λάθῃ πυθόμενοσ τὰ περὶ τὴν θυγατέρα καὶ διαδρὰσ ἐκ τοῦ χάρακοσ.

ἔφθησαν δ’ αὐτὸν οἱ τῇ κόρῃ προσήκοντεσ, Νομιτωρίου τε υἱὸσ καὶ ἀδελφὸσ Ἰκιλίου, προαποσταλέντεσ ὑπὸ τῶν ἄλλων ἀρχομένησ ἔτι τῆσ καταστάσεωσ, νεανίαι λήματοσ πλήρεισ ἀπὸ ῥυτῆροσ καὶ μετὰ μάστιγοσ ἐλαθεῖσι τοῖσ ἵπποισ πρότερον διανύσαντεσ τὴν ὁδὸν καὶ τῷ Οὐεργινίῳ τὰ πεπραγμένα διασαφηνίσαντεσ.

ὁ δὲ τὴν μὲν ἀληθῆ πρὸσ Ἀντώνιον αἰτίαν ἀποκρυψάμενοσ, ἀναγκαίου δέ τινοσ συγγενοῦσ σκηψάμενοσ πεπύσθαι θάνατον, οὗ τὴν ἐκκομιδήν τε καὶ ταφὴν αὐτὸν ἔδει ποιήσασθαι κατὰ τὸν νόμον, ἀφίεται καὶ περὶ λύχνων ἁφὰσ ἤλαυνε μετὰ τῶν μειρακίων κατ’ ἄλλασ ὁδοὺσ διωγμὸν ἔκ τε τοῦ στρατοπέδου καὶ ἀπὸ τῆσ πόλεωσ δεδοικώσ·

ὅπερ καὶ συνέβη.

ὅ τε γὰρ Ἀντώνιοσ τὰσ ἐπιστολὰσ δεξάμενοσ περὶ πρώτην μάλιστα φυλακήν, ἴλην ἀπέστειλεν ἱππέων ἐπ’ αὐτόν, ἔκ τε τῆσ πόλεωσ ἕτεροι πεμφθέντεσ ἱππεῖσ δι’ ὅλησ νυκτὸσ ἐφρούρουν τὴν ἀπὸ στρατοπέδου φέρουσαν ὁδόν.

ὡσ δὲ ἀπήγγειλεν Ἀππίῳ τισ τὸν Οὐεργίνιον ἐληλυθότα παρὰ τὴν ὑπόληψιν, ἔξω τῶν φρενῶν γενόμενοσ παρῆν μετὰ πολλοῦ στίφουσ ἐπὶ τὸ βῆμα καὶ προσάγειν ἐκέλευσε τοὺσ τῆσ κόρησ συγγενεῖσ. προσελθόντων δ’ αὐτῶν ὁ μὲν Κλαύδιοσ τοὺσ αὐτοὺσ πάλιν διεξελθὼν λόγουσ ἠξίου τὸν Ἄππιον γενέσθαι δικαστὴν τοῦ πράγματοσ μηδεμίαν ἀναβολὴν ποιησάμενον, τόν τε μηνυτὴν παρεῖναι λέγων καὶ τοὺσ μάρτυρασ καὶ τὴν θεράπαιναν αὐτὴν παραδούσ·

ἐφ’ οἷσ ἅπασι πολὺσ ὁ προσποιητὸσ σχετλιασμὸσ ἦν, εἰ μὴ τεύξεται τῶν ἴσων τοῖσ ἄλλοισ, ὡσ πρότερον, ὅτι πελάτησ ἦν αὐτοῦ·

καὶ παράκλησισ, μὴ τοῖσ ἐλεεινότερα λέγουσιν, ἀλλὰ τοῖσ δικαιότερα ἀξιοῦσι βοηθεῖν.

SEARCH

MENU NAVIGATION