호흡부호 보기
강세부호 보기
장단부호 보기
작은 Iota 보기
모든 부호 보기
καίτοι πυνθάνομαί γ’ αὐτὸν μέλλειν λέγειν, ὡσ οὐ δίκαια ποιῶ παραβάλλων αὐτῷ τὰ τῶν προγόνων ἔργα· οὐδὲ γὰρ Φιλάμμωνα τὸν πύκτην Ὀλυμπίασι στεφανωθῆναι νικήσαντα Γλαῦκον τὸν παλαιὸν ἐκεῖνον, ἀλλὰ τοὺσ καθ’ ἑαυτὸν ἀγωνιστάσ, ὥσπερ ὑμᾶσ ἀγνοοῦντασ ὅτι τοῖσ μὲν πύκταισ ἐστὶν ὁ ἀγὼν πρὸσ ἀλλήλουσ, τοῖσ δ’ ἀξιοῦσι στεφανοῦσθαι πρὸσ αὐτὴν τὴν ἀρετήν, ἧσ καὶ ἕνεκα στεφανοῦνται. δεῖ γὰρ τὸν κήρυκα ἀψευδεῖν, ὅταν τὴν ἀνάρρησιν ἐν τῷ θεάτρῳ ποιῆται πρὸσ τοὺσ Ἕλληνασ. μὴ οὖν ἡμῖν, ὡσ Παταικίωνοσ ἄμεινον πεπολίτευσαι, διέξιθι, ἀλλ’ ἐφικόμενοσ τῆσ ἀνδραγαθίασ, οὕτω τὰσ χάριτασ τὸν δῆμον ἀπαίτει.
호흡부호 보기
강세부호 보기
장단부호 보기
작은 Iota 보기
모든 부호 보기