Hippocrates, Oeuvres Completes D'Hippocrate., ΠΕΡΙ ΑΓΜΩΝ., 8.

(히포크라테스, Oeuvres Completes D'Hippocrate., ΠΕΡΙ ΑΓΜΩΝ., 8.)

Ἢν δὲ ὁ βραχίων καταγῇ, ἢν μέν τισ ἀποτανύσασ τὴν χεῖρα ἐν τουτέῳ τῷ σχήματι διατείνῃ, ὁ μῦσ τοῦ βραχίονοσ κατατεταμένοσ ἐπιδεθήσεται‧ ἐπὴν δ’ ἐπιδεθεὶσ ξυγκάμψῃ τὸν ἀγκῶνα, ὁ μῦσ τοῦ βραχίονοσ ἄλλο σχῆμα σχήσει. Δικαιοτάτη οὖν βραχίονοσ κατάτασισ ἥδε‧ ξύλον πηχυαῖον ἢ ὀλίγῳ βραχύτερον, ὁκοῖοι οἱ στειλαιοί εἰσι τῶν σκαφίων, κρεμάσαι χρὴ, ἔνθεν καὶ ἔνθεν σειρῇ δήσαντα‧ καθίσαντα δὲ τὸν ἄνθρωπον ἐπὶ ὑψηλοῦ τινοσ, τὴν χεῖρα ὑπερκεῖσθαι, ὡσ ὑπὸ τῇ μασχάλῃ γένηται ὁ στειλαιὸσ ἔχων ξυμμέτρωσ, ὥστε μόλισ δύνασθαι καθίννυσθαι τὸν ἄνθρωπον, σμικροῦ δέοντα μετέωρον εἶναι‧ ἔπειτα θέντα τι ἄλλο ἔφεδρον, καὶ ὑποθέντα σκύτινον ὑποκεφάλαιον, ἢ ἓν ἢ πλείω ὅκωσ ξυμμέτρωσ σχοίη ὕψεοσ τοῦ πήχεοσ πλαγίου πρὸσ ὀρθὴν γωνίην. Ἄριστον μὲν σκύτοσ πλατὺ καὶ μαλθακὸν, ἢ ταινίην πλατέην ἀμφιβάλλοντα, τῶν μεγάλων τι σταθμίων ἐξαρτῆσαι, ὅ τι μετρίωσ ἕξει κατατείνειν‧ εἰ δὲ μὴ, τῶν ἀνδρῶν ὅστισ ἐῤῬωμένοσ, ἐν τούτῳ τῷ σχήματι τοῦ πήχεοσ ἐόντοσ, παρὰ τὸν ἀγκῶνα καταναγκαζέτω ἐσ τὸ κάτω. Ὁ δὲ ἰητρὸσ ὀρθὸσ μὲν ἐὼν χειριζέτω, τὸν ἕτερον πόδα ἐπὶ ὑψηλοτέρου τινὸσ ἔχων, κατορθώσασ δὲ τοῖσι θέναρσι τὸ ὀστέον‧ Ῥηϊδίωσ δὲ κατορθώσεται‧ ἀγαθὴ γὰρ ἡ κατάστασισ, ἤν τισ καλῶσ παρασκευάσηται. Ἔπειτα ἐπιδείτω, τάσ τε ἀρχὰσ βαλλόμενοσ ἐπὶ τὸ κάτηγμα, καὶ τἄλλα πάντα ὥσπερ πρότερον παρῃνέθη, χειριζέτω‧ καὶ ἐρωτήματα ταὐτὰ ἐρωτάτω‧ καὶ σημείοισι χρήσθω τοῖσιν αὐτέοισιν, εἰ μετρίωσ ἔχει, ἢ οὔ‧ καὶ διὰ τρίτησ ἐπιδείτω, καὶ ἐπὶ μᾶλλον πιεζέτω‧ καὶ ἑβδομαῖον ἢ ἐναταῖον ἐν νάρθηξι δησάτω [, ἔστ’ ἂν ὑπὲρ τριήκοντα ἡμέρασ γίνηται]. Καὶ ἢν ὑποπτεύσῃ μὴ καλῶσ κεῖσθαι τὸ ὀστέον, μεσηγὺ τουτέου τοῦ χρόνου λυσάτω, καὶ εὐτεθισάμενοσ μετεπιδησάτω. Κρατύνεται δὲ μάλιστα βραχίονοσ ὀστέον ἐν τεσσαράκοντα ἡμέρῃσιν. Ἐπὴν δὲ ταύτασ ὑπερβάλῃ, λύειν χρὴ, καὶ ἐπὶ ἧσσον πιέζειν τοῖσιν ὀθονίοισι, καὶ ἐπὶ ἐλάσσοσιν ἐπιδεῖν. Δίαιταν δὲ ἀκριβεστέρην τινὰ ἢ τὸ πρότερον διαιτᾷν, καὶ πλείω χρόνον‧ τεκμαίρεσθαι δὲ πρὸσ τοῦ οἰδήματοσ τοῦ ἐν ἄκρῃ τῇ χειρὶ, τὴν Ῥώμην ὁρέων. Προσξυνιέναι δὲ χρὴ καὶ τάδε, ὅτι ὁ βραχίων κυρτὸσ πέφυκεν ἐσ τὸ ἔξω μέροσ‧ ἐσ τοῦτο τοίνυν τὸ μέροσ διαστρέφεσθαι φιλέει, ἐπὴν μὴ καλῶσ ἰητρεύηται‧ ἀτὰρ καὶ τἄλλα πάντα ὀστέα, ἐσ ὅπερ πέφυκε διεστραμμένα, ἐσ τοῦτο καὶ ἰητρευόμενα φιλέει διαστρέφεσθαι, ἐπὴν κατεαγῇ. Χρὴ τοίνυν, ἐπὴν τοιοῦτό τι ὑποπτεύηται, ταινίῃ πλατείῃ προσεπιλαμβάνειν τὸν βραχίονα κύκλῳ περὶ τὸ στῆθοσ περιδέοντα‧ καὶ ἐπὴν ἀναπαύεσθαι μέλλῃ, μεσηγὺ τοῦ ἀγκῶνοσ καὶ τῶν πλευρέων σπλῆνά τινα πουλύπτυχον πτύξαντα ὑποτιθέναι, ἢ ἄλλο τι ὃ τουτέῳ ἐοίκεν‧ οὕτω γὰρ ἂν ἰθὺ τὸ κύρτωμα τοῦ ὀστέου γένοιτο‧ φυλάσσεσθαι μέντοι χρὴ, ὅπωσ μὴ ᾖ ἄγαν ἐσ τὸ ἔσω μέροσ.

일치하는 문장이 없습니다.

SEARCH

MENU NAVIGATION