헬라어 문장 검색 - ΧενοπήΞψροπαέ4́4́

(크세노폰, Cyropaedia, Κύρου Παιδείασ Δ, chapter 4)

ἡνίκα δ’ ἦν ἔξω μέσου ἡμέρασ, προσήλαυνον μὲν οἱ Μῆδοι ἱππεῖσ καὶ Ὑρκάνιοι, ἵππουσ τε ἄγοντεσ αἰχμαλώτουσ καὶ ἄνδρασ· ὅσοι γὰρ τὰ ὅπλα παρεδίδοσαν, οὐ κατέκαινον· ἐπεὶ δὲ προσήλασαν, πρῶτον μὲν αὐτῶν ἐπυνθάνετο ὁ Κῦροσ εἰ σῶοι οἱ πάντεσ εἰε͂ν αὐτῷ·

ἐπεὶ δὲ τοῦτ’ ἔφασαν, ἐκ τούτου ἠρώτα τί ἔπραξαν. οἱ δὲ διηγοῦντο ἅ τ’ ἐποίησαν καὶ ὡσ ἀνδρείωσ ἕκαστα . .

ἐμεγαληγόρουν. ὁ δὲ διήκουέ τε ἡδέωσ πάντων ἃ ἐβούλοντο λέγειν· ἔπειτα δὲ καὶ ἐπῄνεσεν αὐτοὺσ οὕτωσ· ἀλλὰ καὶ δῆλοί τοι, ἔφη, ἐστὲ ὅτι ἄνδρεσ ἀγαθοὶ ἐγένεσθε· καὶ γὰρ μείζουσ φαίνεσθε καὶ καλλίουσ καὶ γοργότεροι ἢ πρόσθεν ἰδεῖν. ἐκ δὲ τούτου ἐπυνθάνετο ἤδη αὐτῶν καὶ ὁπόσην ὁδὸν διήλασαν καὶ εἰ οἰκοῖτο ἡ χώρα.

οἱ δ’ ἔλεγον ὅτι καὶ πολλὴν διελάσειαν καὶ πᾶσα οἰκοῖτο καὶ μεστὴ εἰή καὶ οἰῶν καὶ αἰγῶν καὶ βοῶν καὶ ἵππων καὶ σίτου καὶ πάντων ἀγαθῶν. δυοῖν ἄν, ἔφη, ἐπιμελητέον ἡμῖν εἰή, ὅπωσ τε κρείττουσ ἐσόμεθα τῶν ταῦτα ἐχόντων καὶ ὅπωσ αὐτοὶ μενοῦσιν·

οἰκουμένη μὲν γὰρ χώρα πολλοῦ ἄξιον κτῆμα· ἐρήμη δ’ ἀνθρώπων οὖσα ἐρήμη καὶ τῶν ἀγαθῶν γίγνεται. τοὺσ μὲν οὖν ἀμυνομένουσ, ἔφη, οἶδα ὅτι κατεκάνετε, ὀρθῶσ ποιοῦντεσ·

τοῦτο γὰρ μάλιστα σῴζει τὴν νίκην· τοὺσ δὲ παραδιδόντασ αἰχμαλώτουσ ἠγάγετε· οὓσ εἰ ἀφείημεν, τοῦτ’ αὖ σύμφορον ἄν, ὡσ ἐγώ φημι, ποιήσαιμεν· πρῶτον μὲν γὰρ νῦν οὐκ ἂν φυλάττεσθαι οὐδὲ φυλάττειν ἡμᾶσ τούτουσ δέοι, οὐδ’ αὖ σιτοποιεῖν τούτοισ·

οὐ γὰρ λιμῷ γε δήπου κατακανοῦμεν αὐτούσ· ἔπειτα δὲ τούτουσ ἀφέντεσ πλείοσιν αἰχμαλώτοισ χρησόμεθα. ἢν γὰρ κρατῶμεν τῆσ χώρασ, πάντεσ ἡμῖν οἱ ἐν αὐτῇ οἰκοῦντεσ αἰχμάλωτοι ἔσονται·

μᾶλλον δὲ τούτουσ ζῶντασ ἰδόντεσ καὶ ἀφεθέντασ μενοῦσιν οἱ ἄλλοι καὶ πείθεσθαι αἱρήσονται μᾶλλον ἢ μάχεσθαι. ἐγὼ μὲν οὖν οὕτω γιγνώσκω· εἰ δ’ ἄλλο τισ ὁρᾷ ἄμεινον, λεγέτω. οἱ δὲ ἀκούσαντεσ συνῄνουν ταῦτα ποιεῖν. οὕτω δὴ ὁ Κῦροσ καλέσασ τοὺσ αἰχμαλώτουσ λέγει τοιάδε·

ἄνδρεσ, ἔφη, νῦν τε ὅτι ἐπείθεσθε τὰσ ψυχὰσ περιεποιήσασθε, τοῦ τε λοιποῦ, ἢν οὕτω ποιῆτε, οὐδ’ ὁτιοῦν καινὸν ἔσται ὑμῖν ἀλλ’ ἢ οὐχ ὁ αὐτὸσ ἄρξει ὑμῶν ὅσπερ καὶ πρότερον·

οἰκήσετε δὲ τὰσ αὐτὰσ οἰκίασ καὶ χώραν τὴν αὐτὴν ἐργάσεσθε καὶ γυναιξὶ ταῖσ αὐταῖσ συνοικήσετε καὶ παίδων τῶν ὑμετέρων ἄρξετε ὥσπερ νῦν· ἡμῖν μέντοι οὐ μαχεῖσθε οὐδὲ ἄλλῳ οὐδενί· ἡνίκα δ’ ἄν τισ ὑμᾶσ ἀδικῇ, ἡμεῖσ ὑπὲρ ὑμῶν μαχούμεθα.

ὅπωσ δὲ μηδ’ ἐπαγγέλλῃ μηδεὶσ ὑμῖν στρατεύειν, τὰ ὅπλα πρὸσ ἡμᾶσ κομίσατε· καὶ τοῖσ μὲν κομίζουσιν ἔσται εἰρήνη καὶ ἃ λέγομεν ἀδόλωσ· ὁπόσοι δ’ ἂν τὰ πολεμικὰ μὴ ἀποφέρωσιν ὅπλα, ἐπὶ τούτουσ ἡμεῖσ καὶ δὴ στρατευσόμεθα. ἐὰν δέ τισ ὑμῶν καὶ ἰὼν ὡσ ἡμᾶσ εὐνοϊκῶσ καὶ πράττων τι καὶ διδάσκων φαίνηται, τοῦτον ἡμεῖσ ὡσ εὐεργέτην καὶ φίλον, οὐχ ὡσ δοῦλον περιέψομεν.

ταῦτ’ οὖν, ἔφη, αὐτοί τε ἴστε καὶ τοῖσ ἄλλοισ διαγγέλλετε. ἢν δ’ ἄρα, ἔφη, ὑμῶν βουλομένων ταῦτα μὴ πείθωνταί τινεσ, ἐπὶ τούτουσ ἡμᾶσ ἄγετε, ὅπωσ ὑμεῖσ ἐκείνων, μὴ ἐκεῖνοι ὑμῶν ἄρχωσιν.

ὁ μὲν δὴ ταῦτ’ εἶπεν· οἱ δὲ προσεκύνουν τε καὶ ὑπισχνοῦντο ταῦτα ποιήσειν.

MENU NAVIGATION

호흡부호 보기

강세부호 보기

장단부호 보기

작은 Iota 보기

모든 부호 보기

헬라어 텍스트

Xenophon, Cyropaedia, Κύρου Παιδείασ Δ, chapter 4

(크세노폰, Cyropaedia, Κύρου Παιδείασ Δ, chapter 4)

상위

목록

SEARCH

MENU NAVIGATION