헬라어 문장 검색 - ΧενοπήΑναβασί2́6́

(크세노폰, Anabasis, Κύρου Ἀναβάσεωσ Β, chapter 6)

οἱ μὲν δὴ στρατηγοὶ οὕτω ληφθέντεσ ἀνήχθησαν ὡσ βασιλέα καὶ ἀποτμηθέντεσ τὰσ κεφαλὰσ ἐτελεύτησαν, εἷσ μὲν αὐτῶν Κλέαρχοσ ὁμολογουμένωσ ἐκ πάντων τῶν ἐμπείρωσ αὐτοῦ ἐχόντων δόξασ γενέσθαι ἀνὴρ καὶ πολεμικὸσ καὶ φιλοπόλεμοσ ἐσχάτωσ. καὶ γὰρ δὴ ἑώσ μὲν πόλεμοσ ἦν τοῖσ Λακεδαιμονίοισ πρὸσ τοὺσ Ἀθηναίουσ παρέμενεν, ἐπειδὴ δὲ εἰρήνη ἐγένετο, πείσασ τὴν αὑτοῦ πόλιν ὡσ οἱ Θρᾷκεσ ἀδικοῦσι τοὺσ Ἕλληνασ καὶ διαπραξάμενοσ ὡσ ἐδύνατο παρὰ τῶν ἐφόρων ἐξέπλει ὡσ πολεμήσων τοῖσ ὑπὲρ Χερρονήσου καὶ Περίνθου Θρᾳξίν.

ἐπεὶ δὲ μεταγνόντεσ πωσ οἱ ἔφοροι ἤδη ἔξω ὄντοσ ἀποστρέφειν αὐτὸν ἐπειρῶντο ἐξ Ἰσθμοῦ, ἐνταῦθα οὐκέτι πείθεται, ἀλλ’ ᾤχετο πλέων εἰσ Ἑλλήσποντον.

ἐκ τούτου καὶ ἐθανατώθη ὑπὸ τῶν ἐν Σπάρτῃ τελῶν ὡσ ἀπειθῶν.

ἤδη δὲ φυγὰσ ὢν ἔρχεται πρὸσ Κῦρον, καὶ ὁποίοισ μὲν λόγοισ ἔπεισε Κῦρον ἄλλῃ γέγραπται, δίδωσι δὲ αὐτῷ Κῦροσ μυρίουσ δαρεικούσ· ὁ δὲ λαβὼν οὐκ ἐπὶ ῥᾳθυμίαν ἐτράπετο, ἀλλ’ ἀπὸ τούτων τῶν χρημάτων συλλέξασ στράτευμα ἐπολέμει τοῖσ Θρᾳξί, καὶ μάχῃ τε ἐνίκησε καὶ ἀπὸ τούτου δὴ ἔφερε καὶ ἦγε τούτουσ καὶ πολεμῶν διεγένετο μέχρι Κῦροσ ἐδεήθη τοῦ στρατεύματοσ·

τότε δὲ ἀπῆλθεν ὡσ ξὺν ἐκείνῳ αὖ πολεμήσων. ταῦτα οὖν φιλοπολέμου μοι δοκεῖ ἀνδρὸσ ἔργα εἶναι, ὅστισ ἐξὸν μὲν εἰρήνην ἄγειν ἄνευ αἰσχύνησ καὶ βλάβησ αἱρεῖται πολεμεῖν, ἐξὸν δὲ ῥᾳθυμεῖν βούλεται πονεῖν ὥστε πολεμεῖν, ἐξὸν δὲ χρήματα ἔχειν ἀκινδύνωσ αἱρεῖται πολεμῶν μείονα ταῦτα ποιεῖν·

ἐκεῖνοσ δὲ ὥσπερ εἰσ παιδικὰ ἢ εἰσ ἄλλην τινὰ ἡδονὴν ἤθελε δαπανᾶν εἰσ πόλεμον. οὕτω μὲν φιλοπόλεμοσ ἦν·

πολεμικὸσ δὲ αὖ ταύτῃ ἐδόκει εἶναι ὅτι φιλοκίνδυνόσ τε ἦν καὶ ἡμέρασ καὶ νυκτὸσ ἄγων ἐπὶ τοὺσ πολεμίουσ καὶ ἐν τοῖσ δεινοῖσ φρόνιμοσ, ὡσ οἱ παρόντεσ πανταχοῦ πάντεσ ὡμολόγουν. καὶ ἀρχικὸσ δ’ ἐλέγετο εἶναι ὡσ δυνατὸν ἐκ τοῦ τοιούτου τρόπου οἱο͂ν κἀκεῖνοσ εἶχεν.

ἱκανὸσ μὲν γὰρ ὥσ τισ καὶ ἄλλοσ φροντίζειν ἦν ὅπωσ ἔχοι ἡ στρατιὰ αὐτῷ τὰ ἐπιτήδεια καὶ παρασκευάζειν ταῦτα, ἱκανὸσ δὲ καὶ ἐμποιῆσαι τοῖσ παροῦσιν ὡσ πειστέον εἰή Κλεάρχῳ. τοῦτο δ’ ἐποίει ἐκ τοῦ χαλεπὸσ εἶναι·

καὶ γὰρ ὁρᾶν στυγνὸσ ἦν καὶ τῇ φωνῇ τραχύσ, ἐκόλαζέ τε ἰσχυρῶσ, καὶ ὀργῇ ἐνίοτε, ὡσ καὶ αὐτῷ μεταμέλειν ἔσθ’ ὅτε. καὶ γνώμῃ δ’ ἐκόλαζεν·

ἀκολάστου γὰρ στρατεύματοσ οὐδὲν ἡγεῖτο ὄφελοσ εἶναι, ἀλλὰ καὶ λέγειν αὐτὸν ἔφασαν ὡσ δέοι τὸν στρατιώτην φοβεῖσθαι μᾶλλον τὸν ἄρχοντα ἢ τοὺσ πολεμίουσ, εἰ μέλλοι ἢ φυλακὰσ φυλάξειν ἢ φίλων ἀφέξεσθαι ἢ ἀπροφασίστωσ ἰέναι πρὸσ τοὺσ πολεμίουσ. ἐν μὲν οὖν τοῖσ δεινοῖσ ἤθελον αὐτοῦ ἀκούειν σφόδρα καὶ οὐκ ἄλλον ᾑροῦντο οἱ στρατιῶται·

καὶ γὰρ τὸ στυγνὸν τότε φαιδρὸν αὐτοῦ ἐν τοῖσ ἄλλοισ προσώποισ ἔφασαν φαίνεσθαι καὶ τὸ χαλεπὸν ἐρρωμένον πρὸσ τοὺσ πολεμίουσ ἐδόκει εἶναι, ὥστε σωτήριον, οὐκέτι χαλεπὸν ἐφαίνετο· ὅτε δ’ ἔξω τοῦ δεινοῦ γένοιντο καὶ ἐξείη πρὸσ ἄλλον ἀρξομένουσ ἀπιέναι, πολλοὶ αὐτὸν ἀπέλειπον·

τὸ γὰρ ἐπίχαρι οὐκ εἶχεν, ἀλλ’ ἀεὶ χαλεπὸσ ἦν καὶ ὠμόσ· ὥστε διέκειντο πρὸσ αὐτὸν οἱ στρατιῶται ὥσπερ παῖδεσ πρὸσ διδάσκαλον. καὶ γὰρ οὖν φιλίᾳ μὲν καὶ εὐνοίᾳ ἑπομένουσ οὐδέποτε εἶχεν·

οἵτινεσ δὲ ἢ ὑπὸ πόλεωσ τεταγμένοι ἢ ὑπὸ τοῦ δεῖσθαι ἢ ἄλλῃ τινὶ ἀνάγκῃ κατεχόμενοι παρείησαν αὐτῷ, σφόδρα πειθομένοισ ἐχρῆτο. ἐπεὶ δὲ ἄρξαιντο νικᾶν ξὺν αὐτῷ τοὺσ πολεμίουσ, ἤδη μεγάλα ἦν τὰ χρησίμουσ ποιοῦντα εἶναι τοὺσ ξὺν αὐτῷ στρατιώτασ·

τό τε γὰρ πρὸσ τοὺσ πολεμίουσ θαρραλέωσ ἔχειν παρῆν καὶ τὸ τὴν παρ’ ἐκείνου τιμωρίαν φοβεῖσθαι εὐτάκτουσ ἐποίει. τοιοῦτοσ μὲν δὴ ἄρχων ἦν·

ἄρχεσθαι δὲ ὑπὸ ἄλλων οὐ μάλα ἐθέλειν ἐλέγετο. ἦν δὲ ὅτε ἐτελεύτα ἀμφὶ τὰ πεντήκοντα ἔτη. Πρόξενοσ δὲ ὁ Βοιώτιοσ εὐθὺσ μὲν μειράκιον ὢν ἐπεθύμει γενέσθαι ἀνὴρ τὰ μεγάλα πράττειν ἱκανόσ·

καὶ διὰ ταύτην τὴν ἐπιθυμίαν ἔδωκε Γοργίᾳ ἀργύριον τῷ Λεοντίνῳ. ἐπεὶ δὲ συνεγένετο ἐκείνῳ, ἱκανὸσ νομίσασ ἤδη εἶναι καὶ ἄρχειν καὶ φίλοσ ὢν τοῖσ πρώτοισ μὴ ἡττᾶσθαι εὐεργετῶν, ἦλθεν εἰσ ταύτασ τὰσ σὺν Κύρῳ πράξεισ·

καὶ ᾤετο κτήσεσθαι ἐκ τούτων ὄνομα μέγα καὶ δύναμιν μεγάλην καὶ χρήματα πολλά· τοσούτων δ’ ἐπιθυμῶν σφόδρα ἔνδηλον αὖ καὶ τοῦτο εἶχεν, ὅτι τούτων οὐδὲν ἂν θέλοι κτᾶσθαι μετὰ ἀδικίασ, ἀλλὰ σὺν τῷ δικαίῳ καὶ καλῷ ᾤετο δεῖν τούτων τυγχάνειν, ἄνευ δὲ τούτων μή.

ἄρχειν δὲ καλῶν μὲν καὶ ἀγαθῶν δυνατὸσ ἦν·

οὐ μέντοι οὔτ’ αἰδῶ τοῖσ στρατιώταισ ἑαυτοῦ οὔτε φόβον ἱκανὸσ ἐμποιῆσαι, ἀλλὰ καὶ ᾐσχύνετο μᾶλλον τοὺσ στρατιώτασ ἢ οἱ ἀρχόμενοι ἐκεῖνον· καὶ φοβούμενοσ μᾶλλον ἦν φανερὸσ τὸ ἀπεχθάνεσθαι τοῖσ στρατιώταισ ἢ οἱ στρατιῶται τὸ ἀπιστεῖν ἐκείνῳ. ᾤετο δὲ ἀρκεῖν πρὸσ τὸ ἀρχικὸν εἶναι καὶ δοκεῖν τὸν μὲν καλῶσ ποιοῦντα ἐπαινεῖν, τὸν δὲ ἀδικοῦντα μὴ ἐπαινεῖν.

τοιγαροῦν αὐτῷ οἱ μὲν καλοί τε καὶ ἀγαθοὶ τῶν συνόντων εὖνοι ἦσαν, οἱ δὲ ἄδικοι ἐπεβούλευον ὡσ εὐμεταχειρίστῳ ὄντι. ὅτε δὲ ἀπέθνῃσκεν ἦν ἐτῶν ὡσ τριάκοντα. Μένων δὲ ὁ Θετταλὸσ δῆλοσ ἦν ἐπιθυμῶν μὲν πλουτεῖν ἰσχυρῶσ, ἐπιθυμῶν δὲ ἄρχειν, ὅπωσ πλείω λαμβάνοι, ἐπιθυμῶν δὲ τιμᾶσθαι, ἵνα πλείω κερδαίνοι·

φίλοσ τε ἐβούλετο εἶναι τοῖσ μέγιστα δυναμένοισ, ἵνα ἀδικῶν μὴ διδοίη δίκην. ἐπὶ δὲ τὸ κατεργάζεσθαι ὧν ἐπιθυμοίη συντομωτάτην ᾤετο ὁδὸν εἶναι διὰ τοῦ ἐπιορκεῖν τε καὶ ψεύδεσθαι καὶ ἐξαπατᾶν, τὸ δ’ ἁπλοῦν καὶ ἀληθὲσ τὸ αὐτὸ τῷ ἠλιθίῳ εἶναι.

στέργων δὲ φανερὸσ μὲν ἦν οὐδένα, ὅτῳ δὲ φαίη φίλοσ εἶναι, τούτῳ ἔνδηλοσ ἐγίγνετο ἐπιβουλεύων.

καὶ πολεμίου μὲν οὐδενὸσ κατεγέλα, τῶν δὲ συνόντων πάντων ὡσ καταγελῶν ἀεὶ διελέγετο. καὶ τοῖσ μὲν τῶν πολεμίων κτήμασιν οὐκ ἐπεβούλευε·

χαλεπὸν γὰρ ᾤετο εἶναι τὰ τῶν φυλαττομένων λαμβάνειν· τὰ δὲ τῶν φίλων μόνοσ ᾤετο εἰδέναι ῥᾷστον ὂν ἀφύλακτα λαμβάνειν. καὶ ὅσουσ μὲν αἰσθάνοιτο ἐπιόρκουσ καὶ ἀδίκουσ ὡσ εὖ ὡπλισμένουσ ἐφοβεῖτο, τοῖσ δὲ ὁσίοισ καὶ ἀλήθειαν ἀσκοῦσιν ὡσ ἀνάνδροισ ἐπειρᾶτο χρῆσθαι.

ὥσπερ δέ τισ ἀγάλλεται ἐπὶ θεοσεβείᾳ καὶ ἀληθείᾳ καὶ δικαιότητι, οὕτω Μένων ἠγάλλετο τῷ ἐξαπατᾶν δύνασθαι, τῷ πλάσασθαι ψεύδη, τῷ φίλουσ διαγελᾶν·

τὸν δὲ μὴ πανοῦργον τῶν ἀπαιδεύτων ἀεὶ ἐνόμιζεν εἶναι. καὶ παρ’ οἷσ μὲν ἐπεχείρει πρωτεύειν φιλίᾳ, διαβάλλων τοὺσ πρώτουσ τοῦτο ᾤετο δεῖν κτήσασθαι. τὸ δὲ πειθομένουσ τοὺσ στρατιώτασ παρέχεσθαι ἐκ τοῦ συναδικεῖν αὐτοῖσ ἐμηχανᾶτο.

τιμᾶσθαι δὲ καὶ θεραπεύεσθαι ἠξίου ἐπιδεικνύμενοσ ὅτι πλεῖστα δύναιτο καὶ ἐθέλοι ἂν ἀδικεῖν. εὐεργεσίαν δὲ κατέλεγεν, ὁπότε τισ αὐτοῦ ἀφίσταιτο, ὅτι χρώμενοσ αὐτῷ οὐκ ἀπώλεσεν αὐτόν. καὶ τὰ μὲν δὴ ἀφανῆ ἔξεστι περὶ αὐτοῦ ψεύδεσθαι, ἃ δὲ πάντεσ ἴσασι τάδ’ ἐστί.

παρὰ Ἀριστίππου μὲν ἔτι ὡραῖοσ ὢν στρατηγεῖν διεπράξατο τῶν ξένων, Ἀριαίῳ δὲ βαρβάρῳ ὄντι, ὅτι μειρακίοισ καλοῖσ ἥδετο, οἰκειότατοσ ἔτι ὡραῖοσ ὢν ἐγένετο, αὐτὸσ δὲ παιδικὰ εἶχε Θαρύπαν ἀγένειοσ ὢν γενειῶντα. ἀποθνῃσκόντων δὲ τῶν συστρατήγων ὅτι ἐστράτευσαν ἐπὶ βασιλέα ξὺν Κύρῳ, ταὐτὰ πεποιηκὼσ οὐκ ἀπέθανε, μετὰ δὲ τὸν τῶν ἄλλων θάνατον στρατηγῶν τιμωρηθεὶσ ὑπὸ βασιλέωσ ἀπέθανεν, οὐχ ὥσπερ Κλέαρχοσ καὶ οἱ ἄλλοι στρατηγοὶ ἀποτμηθέντεσ τὰσ κεφαλάσ, ὅσπερ τάχιστοσ θάνατοσ δοκεῖ εἶναι, ἀλλὰ ζῶν αἰκισθεὶσ ἐνιαυτὸν ὡσ πονηρὸσ λέγεται τῆσ τελευτῆσ τυχεῖν.

Ἀγίασ δὲ ὁ Ἀρκὰσ καὶ Σωκράτησ ὁ Ἀχαιὸσ καὶ τούτω ἀπεθανέτην.

τούτων δὲ οὔθ’ ὡσ ἐν πολέμῳ κακῶν οὐδεὶσ κατεγέλα οὔτ’ εἰσ φιλίαν αὐτοὺσ ἐμέμφετο. ἤστην δὲ ἄμφω ἀμφὶ τὰ πέντε καὶ τριάκοντα ἔτη ἀπὸ γενεᾶσ.

MENU NAVIGATION

호흡부호 보기

강세부호 보기

장단부호 보기

작은 Iota 보기

모든 부호 보기

헬라어 텍스트

Xenophon, Anabasis, Κύρου Ἀναβάσεωσ Β, chapter 6

(크세노폰, Anabasis, Κύρου Ἀναβάσεωσ Β, chapter 6)

상위

목록

SEARCH

MENU NAVIGATION