Xenophon, Anabasis, Κύρου Ἀναβάσεωσ Α, chapter 6

(크세노폰, Anabasis, Κύρου Ἀναβάσεωσ Α, chapter 6)

ἐντεῦθεν προϊόντων ἐφαίνετο ἴχνια ἵππων καὶ κόπροσ· εἰκάζετο δ’ εἶναι ὁ στίβοσ ὡσ δισχιλίων ἵππων. οὗτοι προϊόντεσ ἔκαιον καὶ χιλὸν καὶ εἴ τι ἄλλο χρήσιμον ἦν. Ὀρόντασ δέ, Πέρσησ ἀνήρ, γένει τε προσήκων βασιλεῖ καὶ τὰ πολέμια λεγόμενοσ ἐν τοῖσ ἀρίστοισ Περσῶν ἐπιβουλεύει Κύρῳ καὶ πρόσθεν πολεμήσασ, καταλλαγεὶσ δέ. οὗτοσ Κύρῳ εἶπεν, εἰ αὐτῷ δοίη ἱππέασ χιλίουσ, ὅτι τοὺσ προκατακαίοντασ ἱππέασ ἢ κατακαίνοι ἂν ἐνεδρεύσασ ἢ ζῶντασ πολλοὺσ αὐτῶν ἂν ἕλοι καὶ κωλύσειε τοῦ καίειν ἐπιόντασ, καὶ ποιήσειεν ὥστε μήποτε δύνασθαι αὐτοὺσ ἰδόντασ τὸ Κύρου στράτευμα βασιλεῖ διαγγεῖλαι.

τῷ δὲ Κύρῳ ἀκούσαντι ταῦτα ἐδόκει ὠφέλιμα εἶναι, καὶ ἐκέλευεν αὐτὸν λαμβάνειν μέροσ παρ’ ἑκάστου τῶν ἡγεμόνων. ὁ δ’ Ὀρόντασ νομίσασ ἑτοίμουσ εἶναι αὑτῷ τοὺσ ἱππέασ γράφει ἐπιστολὴν παρὰ βασιλέα ὅτι ἥξοι ἔχων ἱππέασ ὡσ ἂν δύνηται πλείστουσ·

ἀλλὰ φράσαι τοῖσ αὑτοῦ ἱππεῦσιν ἐκέλευεν ὡσ φίλιον αὐτὸν ὑποδέχεσθαι. ἐνῆν δὲ ἐν τῇ ἐπιστολῇ καὶ τῆσ πρόσθεν φιλίασ ὑπομνήματα καὶ πίστεωσ. ταύτην τὴν ἐπιστολὴν δίδωσι πιστῷ ἀνδρί, ὡσ ᾤετο· ὁ δὲ λαβὼν Κύρῳ δίδωσιν. ἀναγνοὺσ δὲ αὐτὴν ὁ Κῦροσ συλλαμβάνει Ὀρόνταν, καὶ συγκαλεῖ εἰσ τὴν ἑαυτοῦ σκηνὴν Πέρσασ τοὺσ ἀρίστουσ τῶν περὶ αὐτὸν ἑπτά, καὶ τοὺσ τῶν Ἑλλήνων στρατηγοὺσ ἐκέλευσεν ὁπλίτασ ἀγαγεῖν, τούτουσ δὲ θέσθαι τὰ ὅπλα περὶ τὴν αὑτοῦ σκηνήν.

οἱ δὲ ταῦτα ἐποίησαν, ἀγαγόντεσ ὡσ τρισχιλίουσ ὁπλίτασ. Κλέαρχον δὲ καὶ εἴσω παρεκάλεσε σύμβουλον, ὅσ γε καὶ αὐτῷ καὶ τοῖσ ἄλλοισ ἐδόκει προτιμηθῆναι μάλιστα τῶν Ἑλλήνων.

ἐπεὶ δ’ ἐξῆλθεν, ἀπήγγειλε τοῖσ φίλοισ τὴν κρίσιν τοῦ Ὀρόντα ὡσ ἐγένετο· οὐ γὰρ ἀπόρρητον ἦν. ἔφη δὲ Κῦρον ἄρχειν τοῦ λόγου ὧδε.

παρεκάλεσα ὑμᾶσ, ἄνδρεσ φίλοι, ὅπωσ σὺν ὑμῖν βουλευόμενοσ ὅ τι δίκαιόν ἐστι καὶ πρὸσ θεῶν καὶ πρὸσ ἀνθρώπων, τοῦτο πράξω περὶ Ὀρόντα τουτουί. τοῦτον γὰρ πρῶτον μὲν ὁ ἐμὸσ πατὴρ ἔδωκεν ὑπήκοον εἶναι ἐμοί· ἐπεὶ δὲ ταχθείσ, ὡσ ἔφη αὐτόσ, ὑπὸ τοῦ ἐμοῦ ἀδελφοῦ οὗτοσ ἐπολέμησεν ἐμοὶ ἔχων τὴν ἐν Σάρδεσιν ἀκρόπολιν, καὶ ἐγὼ αὐτὸν προσπολεμῶν ἐποίησα ὥστε δόξαι τούτῳ τοῦ πρὸσ ἐμὲ πολέμου παύσασθαι, καὶ δεξιὰν ἔλαβον καὶ ἔδωκα, μετὰ ταῦτα, ἔφη, Ὀρόντα, ἔστιν ὅ τι σε ἠδίκησα; ἀπεκρίνατο ὅτι οὔ.

πάλιν δὲ ὁ Κῦροσ ἠρώτα· οὐκοῦν ὕστερον, ὡσ αὐτὸσ σὺ ὁμολογεῖσ, οὐδὲν ὑπ’ ἐμοῦ ἀδικούμενοσ ἀποστὰσ εἰσ Μυσοὺσ κακῶσ ἐποίεισ τὴν ἐμὴν χώραν ὅ τι ἐδύνω; ἔφη Ὀρόντασ. οὐκοῦν, ἔφη ὁ Κῦροσ, ὁπότ’ αὖ ἔγνωσ τὴν σαυτοῦ δύναμιν, ἐλθὼν ἐπὶ τὸν τῆσ Ἀρτέμιδοσ βωμὸν μεταμέλειν τέ σοι ἔφησθα καὶ πείσασ ἐμὲ πιστὰ πάλιν ἔδωκάσ μοι καὶ ἔλαβεσ παρ’ ἐμοῦ; καὶ ταῦθ’ ὡμολόγει Ὀρόντασ. τί οὖν, ἔφη ὁ Κῦροσ, ἀδικηθεὶσ ὑπ’ ἐμοῦ νῦν τὸ τρίτον ἐπιβουλεύων μοι φανερὸσ γέγονασ;

εἰπόντοσ δὲ τοῦ Ὀρόντα ὅτι οὐδὲν ἀδικηθείσ, ἠρώτησεν ὁ Κῦροσ αὐτόν· ὁμολογεῖσ οὖν περὶ ἐμὲ ἄδικοσ γεγενῆσθαι; ἦ γὰρ ἀνάγκη, ἔφη Ὀρόντασ. ἐκ τούτου πάλιν ἠρώτησεν ὁ Κῦροσ· ἔτι οὖν ἂν γένοιο τῷ ἐμῷ ἀδελφῷ πολέμιοσ, ἐμοὶ δὲ φίλοσ καὶ πιστόσ; ὁ δὲ ἀπεκρίνατο ὅτι οὐδ’ εἰ γενοίμην, ὦ Κῦρε, σοί γ’ ἄν ποτε ἔτι δόξαιμι. πρὸσ ταῦτα Κῦροσ εἶπε τοῖσ παροῦσιν·

ὁ μὲν ἀνὴρ τοιαῦτα μὲν πεποίηκε, τοιαῦτα δὲ λέγει· ὑμῶν δὲ σὺ πρῶτοσ, ὦ Κλέαρχε, ἀπόφηναι γνώμην ὅ τι σοι δοκεῖ. Κλέαρχοσ δὲ εἶπε τάδε. συμβουλεύω ἐγὼ τὸν ἄνδρα τοῦτον ἐκποδὼν ποιεῖσθαι ὡσ τάχιστα, ὡσ μηκέτι δέῃ τοῦτον φυλάττεσθαι, ἀλλὰ σχολὴ ᾖ ἡμῖν, τὸ κατὰ τοῦτον εἶναι, τοὺσ ἐθελοντὰσ τούτουσ εὖ ποιεῖν. ταύτῃ δὲ τῇ γνώμῃ ἔφη καὶ τοὺσ ἄλλουσ προσθέσθαι.

μετὰ ταῦτα, ἔφη, κελεύοντοσ Κύρου ἔλαβον τῆσ ζώνησ τὸν Ὀρόνταν ἐπὶ θανάτῳ ἅπαντεσ ἀναστάντεσ καὶ οἱ συγγενεῖσ· εἶτα δ’ ἐξῆγον αὐτὸν οἷσ προσετάχθη. ἐπεὶ δὲ εἶδον αὐτὸν οἵπερ πρόσθεν προσεκύνουν, καὶ τότε προσεκύνησαν, καίπερ εἰδότεσ ὅτι ἐπὶ θάνατον ἄγοιτο. ἐπεὶ δὲ εἰσ τὴν Ἀρταπάτου σκηνὴν εἰσήχθη, τοῦ πιστοτάτου τῶν Κύρου σκηπτούχων, μετὰ ταῦτα οὔτε ζῶντα Ὀρόνταν οὔτε τεθνηκότα οὐδεὶσ εἶδε πώποτε, οὐδὲ ὅπωσ ἀπέθανεν οὐδεὶσ εἰδὼσ ἔλεγεν·

εἴκαζον δὲ ἄλλοι ἄλλωσ· τάφοσ δὲ οὐδεὶσ πώποτε αὐτοῦ ἐφάνη.

일치하는 문장이 없습니다.

SEARCH

MENU NAVIGATION