Plutarch, Publicola, chapter 21 1:

τῷ δ’ ἑξῆσ ἔτει πάλιν ὑπάτευε Ποπλικόλασ τὸ τέταρτον· ἦν δὲ προσδοκία πολέμου Σαβίνων καί Λατίνων συνισταμένων. καί τισ ἅμα δεισιδαιμονία τῆσ πόλεωσ ἥψατο· πᾶσαι γὰρ αἱ κυοῦσαι τότε γυναῖκεσ ἐξέβαλλον ἀνάπηρα, καί τέλοσ οὐδεμία γένεσισ ἔσχεν. ὅθεν ἐκ τῶν Σιβυλλείων ὁ Ποπλικόλασ ἱλασάμενοσ τῷ Αἵδῃ καί τινασ ἀγῶνασ πυθοχρήστουσ ἀναλαβὼν καί ταῖσ ἐλπίσι πρὸσ τὸ θεῖον ἡδίονα καταστήσασ τὴν πόλιν, ἤδη τοῖσ ἀπ’ ἀνθρώπων φοβεροῖσ προσεῖχε. μεγάλη γὰρ ἐφαίνετο κατασκευὴ τῶν πολεμίων καί σύστασισ.