Demosthenes, Speeches 41-50, Κατὰ Στεφάνου Ψευδομαρτυριῶν Β 7:

βούλομαι τοίνυν καὶ τὴν μαρτυρίαν ἐξελέγξαι, ὅτι οὐ πρόκλησίσ ἐστιν, καὶ ὡσ ἔδει μαρτυρεῖν αὐτούσ, εἴπερ ἐγίγνετο ἡ πρόκλησισ, ὡσ οὐκ ἐγίγνετο. μαρτυροῦσι παρεῖναι πρὸσ τῷ διαιτητῇ Τεισίᾳ, ὅτε προὐκαλεῖτο Φορμίων Ἀπολλόδωρον ἀνοίγειν τὸ γραμματεῖον, ὃ παρεῖχεν Ἀμφίασ ὁ Κηφισοφῶντοσ κηδεστήσ, Ἀπολλόδωρον δ’ οὐκ ἐθέλειν ἀνοίγειν. οὕτω μὲν ἂν μαρτυροῦντεσ ἐδόκουν ἀληθῆ μαρτυρεῖν· ἀντίγραφα δὲ τῶν διαθηκῶν τῶν Πασίωνοσ μαρτυρεῖν εἶναι τὰ ἐν τῷ γραμματείῳ ὃ παρείχετο Φορμίων, μήτε παραγενομένουσ ἐκείνῳ διατιθεμένῳ μήτ’ εἰδότασ εἰ διέθετο, πῶσ οὐ περιφανῶσ ἀναισχυντία δοκεῖ ὑμῖν εἶναι;