Demosthenes, Speeches, Περὶ τῶν ἐν Χερρονήσῳ 40:

νῦν δὲ δημαγωγοῦντεσ ὑμᾶσ καὶ χαριζόμενοι καθ’ ὑπερβολὴν οὕτω διατεθήκασιν, ὥστ’ ἐν μὲν ταῖσ ἐκκλησίαισ τρυφᾶν καὶ κολακεύεσθαι πάντα πρὸσ ἡδονὴν ἀκούοντασ, ἐν δὲ τοῖσ πράγμασι καὶ τοῖσ γιγνομένοισ περὶ τῶν ἐσχάτων ἤδη κινδυνεύειν. φέρε γὰρ πρὸσ Διόσ, εἰ λόγον ὑμᾶσ ἀπαιτήσειαν οἱ Ἕλληνεσ ὧν νυνὶ παρείκατε καιρῶν διὰ ῥᾳθυμίαν, καὶ ἔροινθ’ ὑμᾶσ, ἄνδρεσ Ἀθηναῖοι, πέμπεθ’ ὡσ ἡμᾶσ ἑκάστοτε πρέσβεισ, καὶ λέγεθ’ ὡσ ἐπιβουλεύει Φίλιπποσ ἡμῖν καὶ πᾶσι τοῖσ Ἕλλησι, καὶ ὡσ φυλάττεσθαι δεῖ τὸν ἄνθρωπον, καὶ πάντα τὰ τοιαυτί;