헬라어 문장 검색 - Αρριαν́Αναβασί7́04́

(아리아노스, Anabasis, book 7, chapter 4)

Ἐν τούτῳ δὲ Ἀλέξανδροσ Ἀτροπάτην μὲν ἐπὶ τὴν αὐτοῦ σατραπείαν ἐκπέμπει παρελθὼν ἐσ Σοῦσα, Ἀβουλίτην δὲ καὶ τὸν τούτου παῖδα Ὀξάθρην, ὅτι κακῶσ ἐπεμελεῖτο τῶν Σουσίων, συλλαβὼν ἀπέκτεινε. πολλὰ μὲν δὴ ἐπεπλημμέλητο ἐκ τῶν κατεχόντων τὰσ χώρασ ὅσαι δορίκτητοι πρὸσ Ἀλεξάνδρου ἐγένοντο ἔσ τε τὰ ἱερὰ καὶ τάφουσ καὶ αὐτοὺσ τοὺσ ὑπηκόουσ, ὅτι χρόνιοσ ὁ εἰσ Ἰνδοὺσ στόλοσ ἐγεγένητο τῷ βασιλεῖ καὶ οὐ πιστὸν ἐφαίνετο ἀπονοστήσειν αὐτὸν ἐκ τοσῶνδε ἐθνῶν καὶ τοσῶνδε ἐλεφάντων, ὑπὲρ τὸν Ἰνδόν τε καὶ Ὑδάσπην καὶ τὸν Ἀκεσίνην καὶ Ὕφασιν φθειρόμενον.

καὶ αἱ ἐν Γαδρωσίοισ δὲ αὐτῷ ξυμφοραὶ ξυνενεχθεῖσαι ἔτι μᾶλλον ἐπῆραν τοὺσ [ἐν] ταύτῃ σατραπεύοντασ καταφρονῆσαι αὐτοῦ τῆσ οἴκοι ἀπονοστήσεωσ.

οὐ μὴν ἀλλὰ καὶ αὐτὸσ Ἀλέξανδροσ ὀξύτεροσ λέγεται γενέσθαι ἐν τῷ τότε ἐσ τὸ πιστεῦσαί τε τοῖσ ἐπικαλουμένοισ ὡσ πιθανοῖσ δὴ ἐν παντὶ οὖσι, καὶ ἐπὶ τὸ τιμωρήσασθαι μεγάλωσ τοὺσ καὶ ἐπὶ μικροῖσ ἐξελεγχθέντασ, ὅτι καὶ τὰ μεγάλα ἂν ἐδόκουν αὐτῷ τῇ αὐτῇ γνώμῃ ἐξεργάσασθαι. Ὁ δὲ καὶ γάμουσ ἐποίησεν ἐν Σούσοισ αὑτοῦ τε καὶ τῶν ἑταίρων·

αὐτὸσ μὲν τῶν Δαρείου θυγατέρων τὴν πρεσβυτάτην Βαρσίνην ἠγάγετο, ὡσ δὲ λέγει Ἀριστόβουλοσ, καὶ ἄλλην πρὸσ ταύτῃ, τῶν Ὤχου θυγατέρων τὴν νεωτάτην Παρύσατιν. ἤδη δὲ ἦν αὐτῷ ἠγμένη καὶ ἡ Ὀξυάρτου τοῦ Βακτρίου παῖσ Ῥωξάνη. Δρύπετιν δὲ Ἡφαιστίωνι δίδωσι, Δαρείου παῖδα καὶ ταύτην, ἀδελφὴν τῆσ αὑτοῦ γυναικόσ·

ἐθέλειν γάρ οἱ ἀνεψιοὺσ τῶν παίδων γενέσθαι τοὺσ Ἡφαιστίωνοσ παῖδασ· Κρατερῷ δὲ Ἀμαστρίνην τὴν Ὀξυάτρου τοῦ Δαρείου ἀδελφοῦ παῖδα· Περδίκκᾳ δὲ τὴν Ἀτροπάτου τοῦ Μηδίασ σατράπου παῖδα ἔδωκεν· Πτολεμαίῳ δὲ τῷ σωματοφύλακι καὶ Εὐμενεῖ τῷ γραμματεῖ τῷ βασιλικῷ τὰσ Ἀρταβάζου παῖδασ τῷ μὲν Ἀρτακάμαν, τῷ δὲ Ἄρτωνιν·

Νεάρχῳ δὲ τὴν Βαρσίνησ τε καὶ Μέντοροσ παῖδα· Σελεύκῳ δὲ τὴν Σπιταμένουσ τοῦ Βακτρίου παῖδα· ὡσαύτωσ δὲ καὶ τοῖσ ἄλλοισ ἑταίροισ τὰσ δοκιμωτάτασ Περσῶν τε καὶ Μήδων παῖδασ ἐσ ὀγδοήκοντα. οἱ γάμοι δὲ ἐποιήθησαν νόμῳ τῷ Περσικῷ· θρόνοι ἐτέθησαν τοῖσ νυμφίοισ ἐφεξῆσ καὶ μετὰ τὸν πότον ἧκον αἱ γαμούμεναι καὶ παρεκαθέζοντο ἑκάστη τῷ ἑαυτῆσ·

οἱ δὲ ἐδεξιώσαντό τε αὐτὰσ καὶ ἐφίλησαν· πρῶτοσ δὲ ὁ βασιλεὺσ ἦρξεν· ἐν τῷ αὐτῷ γὰρ πάντων ἐγίγνοντο οἱ γάμοι. καὶ τοῦτο, εἴπερ τι ἄλλο, ἔδοξε δημοτικόν τε καὶ φιλέταιρον πρᾶξαι Ἀλέξανδρον. οἱ δὲ παραλαβόντεσ ἀπῆγον τὴν αὐτοῦ ἕκαστοσ·

προῖκασ δὲ ξυμπάσαισ ἐπέδωκεν Ἀλέξανδροσ. καὶ ὅσοι δὲ ἄλλοι ἠγμένοι ἦσαν Μακεδόνεσ τῶν Ἀσιανῶν τινασ γυναικῶν, ἀπογραφῆναι ἐκέλευσε καὶ τούτων τὰ ὀνόματα, καὶ ἐγένοντο ὑπὲρ τοὺσ μυρίουσ, καὶ τούτοισ δωρεαὶ Ἀλεξάνδρου ἐδόθησαν ἐπὶ τοῖσ γάμοισ.

MENU NAVIGATION

호흡부호 보기

강세부호 보기

장단부호 보기

작은 Iota 보기

모든 부호 보기

헬라어 텍스트

Arrian, Anabasis, book 7, chapter 4

(아리아노스, Anabasis, book 7, chapter 4)

상위

목록

SEARCH

MENU NAVIGATION