Xenophon, Hellenica, Ἑλληνικῶν Α, chapter 2

(크세노폰, Hellenica, Ἑλληνικῶν Α, chapter 2)

τῷ δὲ ἄλλῳ ἔτει ᾧ ἦν Ὀλυμπιὰσ τρίτη καὶ ἐνενηκοστή, ᾗ προστεθεῖσα ξυνωρὶσ ἐνίκα Εὐαγόρου Ἠλείου, τὸ δὲ στάδιον Εὐβώτασ Κυρηναῖοσ, ἐπὶ ἐφόρου μὲν ὄντοσ ἐν Σπάρτῃ Εὐαρχίππου, ἄρχοντοσ δ’ ἐν Ἀθήναισ Εὐκτήμονοσ, Ἀθηναῖοι μὲν Θορικὸν ἐτείχισαν, Θράσυλλοσ δὲ τά τε ψηφισθέντα πλοῖα λαβὼν καὶ πεντακισχιλίουσ τῶν ναυτῶν πελταστὰσ ποιησάμενοσ, ὡσ ἅμα καὶ πελτασταῖσ ἐσομένοισ, ἐξέπλευσεν ἀρχομένου τοῦ θέρουσ εἰσ Σάμον. ἐκεῖ δὲ μείνασ τρεῖσ ἡμέρασ ἔπλευσεν εἰσ Πύγελα·

καὶ ἐνταῦθα τήν τε χώραν ἐδῄου καὶ προσέβαλλε τῷ τείχει. ἐκ δὲ τῆσ Μιλήτου βοηθήσαντέσ τινεσ τοῖσ Πυγελεῦσι διεσπαρμένουσ τῶν Ἀθηναίων ὄντασ τοὺσ ψιλοὺσ ἐδίωκον. οἱ δὲ πελτασταὶ καὶ τῶν ὁπλιτῶν δύο λόχοι βοηθήσαντεσ πρὸσ τοὺσ αὑτῶν ψιλοὺσ ἀπέκτειναν ἅπαντασ τοὺσ ἐκ Μιλήτου ἐκτὸσ ὀλίγων, καὶ ἀσπίδασ ἔλαβον ὡσ διακοσίασ, καὶ τροπαῖον ἔστησαν.

τῇ δὲ ὑστεραίᾳ ἔπλευσαν εἰσ Νότιον, καὶ ἐντεῦθεν παρασκευασάμενοι ἐπορεύοντο εἰσ Κολοφῶνα.

Κολοφώνιοι δὲ προσεχώρησαν. καὶ τῆσ ἐπιούσησ νυκτὸσ ἐνέβαλον εἰσ τὴν Λυδίαν ἀκμάζοντοσ τοῦ σίτου, καὶ κώμασ τε πολλὰσ ἐνέπρησαν καὶ χρήματα ἔλαβον καὶ ἀνδράποδα καὶ ἄλλην λείαν πολλήν. Στάγησ δὲ ὁ Πέρσησ περὶ ταῦτα τὰ χωρία ὤν, ἐπεὶ οἱ Ἀθηναῖοι ἐκ τοῦ στρατοπέδου διεσκεδασμένοι ἦσαν κατὰ τὰσ ἰδίασ λείασ, βοηθησάντων τῶν ἱππέων ἕνα μὲν ζωὸν ἔλαβεν, ἑπτὰ δὲ ἀπέκτεινε.

Θράσυλλοσ δὲ μετὰ ταῦτα ἀπήγαγεν ἐπὶ θάλατταν τὴν στρατιάν, ὡσ εἰσ Ἔφεσον πλευσούμενοσ.

Τισσαφέρνησ δὲ αἰσθόμενοσ τοῦτο τὸ ἐπιχείρημα, στρατιάν τε συνέλεγε πολλὴν καὶ ἱππέασ ἀπέστελλε παραγγέλλων πᾶσιν εἰσ Ἔφεσον βοηθεῖν τῇ Ἀρτέμιδι. Θράσυλλοσ δὲ ἑβδόμῃ καὶ δεκάτῃ ἡμέρᾳ μετὰ τὴν εἰσβολὴν εἰσ Ἔφεσον ἀπέπλευσε, καὶ τοὺσ μὲν ὁπλίτασ πρὸσ τὸν Κορησσὸν ἀποβιβάσασ, τοὺσ δὲ ἱππέασ καὶ πελταστὰσ καὶ ἐπιβάτασ καὶ τοὺσ ἄλλουσ πάντασ πρὸσ τὸ ἕλοσ ἐπὶ τὰ ἕτερα τῆσ πόλεωσ, ἅμα τῇ ἡμέρᾳ προσῆγε δύο στρατόπεδα.

οἱ δ’ ἐκ τῆσ πόλεωσ ἐβοήθησαν σφίσιν οἵ τε σύμμαχοι οὓσ Τισσαφέρνησ ἤγαγε, καὶ Συρακόσιοι οἵ τ’ ἀπὸ τῶν προτέρων εἴκοσι νεῶν καὶ ἀπὸ ἑτέρων πέντε, αἳ ἔτυχον τότε παραγενόμεναι, νεωστὶ ἥκουσαι μετὰ Εὐκλέουσ τε τοῦ Ἵππωνοσ καὶ Ἡρακλείδου τοῦ Ἀριστογένουσ στρατηγῶν, καὶ Σελινούσιαι δύο.

οὗτοι δὲ πάντεσ πρῶτον μὲν πρὸσ τοὺσ ὁπλίτασ τοὺσ ἐν Κορησσῷ ἐβοήθησαν·

τούτουσ δὲ τρεψάμενοι καὶ ἀποκτείναντεσ ἐξ αὐτῶν ὡσεὶ ἑκατὸν καὶ εἰσ τὴν θάλατταν καταδιώξαντεσ πρὸσ τοὺσ παρὰ τὸ ἕλοσ ἐτράποντο. ἔφυγον δὲ κἀκεῖ οἱ Ἀθηναῖοι, καὶ ἀπώλοντο αὐτῶν ὡσ τριακόσιοι. οἱ δὲ Ἐφέσιοι τροπαῖον ἐνταῦθα ἔστησαν καὶ ἕτερον πρὸσ τῷ Κορησσῷ.

τοῖσ δὲ Συρακοσίοισ καὶ Σελινουσίοισ κρατίστοισ γενομένοισ ἀριστεῖα ἔδωκαν καὶ κοινῇ καὶ ἰδίᾳ πολλοῖσ, καὶ οἰκεῖν ἀτέλειαν ἔδοσαν τῷ βουλομένῳ ἀεί· Σελινουσίοισ δέ, ἐπεὶ ἡ πόλισ ἀπωλώλει, καὶ πολιτείαν ἔδοσαν. οἱ δ’ Ἀθηναῖοι τοὺσ νεκροὺσ ὑποσπόνδουσ ἀπολαβόντεσ ἀπέπλευσαν εἰσ Νότιον, κἀκεῖ θάψαντεσ αὐτοὺσ ἔπλεον εὐθὺ Λέσβου καὶ Ἑλλησπόντου.

ὁρμοῦντεσ δὲ ἐν Μηθύμνῃ τῆσ Λέσβου εἶδον παραπλεούσασ ἐξ Ἐφέσου τὰσ Συρακοσίασ ναῦσ πέντε καὶ εἴκοσι·

καὶ ἐπ’ αὐτὰσ ἀναχθέντεσ τέτταρασ μὲν ἔλαβον αὐτοῖσ ἀνδράσι, τὰσ δ’ ἄλλασ κατεδίωξαν εἰσ Ἔφεσον. καὶ τοὺσ μὲν ἄλλουσ αἰχμαλώτουσ Θράσυλλοσ εἰσ Ἀθήνασ ἀπέπεμψε πάντασ, Ἀλκιβιάδην δὲ Ἀθηναῖον, Ἀλκιβιάδου ὄντα ἀνεψιὸν καὶ συμφυγάδα, κατέλευσεν.

ἐντεῦθεν δὲ ἔπλευσεν εἰσ τὴν Σηστὸν πρὸσ τὸ ἄλλο στράτευμα. ἐκεῖθεν δὲ ἅπασα ἡ στρατιὰ διέβη εἰσ Λάμψακον.

καὶ χειμὼν ἐπῄει, ἐν ᾧ οἱ αἰχμάλωτοι Συρακόσιοι, εἰργμένοι τοῦ Πειραιῶσ ἐν λιθοτομίαισ, διορύξαντεσ τὴν πέτραν, ἀποδράντεσ νυκτὸσ ᾤχοντο εἰσ Δεκέλειαν, οἱ δ’ εἰσ Μέγαρα. ἐν δὲ τῇ Λαμψάκῳ συντάττοντοσ Ἀλκιβιάδου τὸ στράτευμα πᾶν οἱ πρότεροι στρατιῶται οὐκ ἐβούλοντο τοῖσ μετὰ Θρασύλλου συντάττεσθαι, ὡσ αὐτοὶ μὲν ὄντεσ ἀήττητοι, ἐκεῖνοι δὲ ἡττημένοι ἥκοιεν.

ἐνταῦθα δὴ ἐχείμαζον ἅπαντεσ Λάμψακον τειχίζοντεσ. καὶ ἐστράτευσαν πρὸσ Ἄβυδον·

Φαρνάβαζοσ δ’ ἐβοήθησεν ἵπποισ πολλοῖσ, καὶ μάχῃ ἡττηθεὶσ ἔφυγεν. Ἀλκιβιάδησ δὲ ἐδίωκεν ἔχων τούσ τε ἱππέασ καὶ τῶν ὁπλιτῶν εἴκοσι καὶ ἑκατόν, ὧν ἦρχε Μένανδροσ, μέχρι σκότοσ ἀφείλετο. ἐκ δὲ τῆσ μάχησ ταύτησ συνέβησαν οἱ στρατιῶται αὐτοὶ αὑτοῖσ καὶ ἠσπάζοντο τοὺσ μετὰ Θρασύλλου.

ἐξῆλθον δέ τινασ καὶ ἄλλασ ἐξόδουσ τοῦ χειμῶνοσ εἰσ τὴν ἤπειρον καὶ ἐπόρθουν τὴν βασιλέωσ χώραν. τῷ δ’ αὐτῷ χρόνῳ καὶ Λακεδαιμόνιοι τοὺσ εἰσ τὸ Κορυφάσιον τῶν Εἱλώτων ἀφεστῶτασ ἐκ Μαλέασ ὑποσπόνδουσ ἀφῆκαν.

κατὰ δὲ τὸν αὐτὸν καιρὸν καὶ ἐν Ἡρακλείᾳ τῇ Τραχινίᾳ Ἀχαιοὶ τοὺσ ἐποίκουσ, ἀντιτεταγμένων πάντων πρὸσ Οἰταίουσ πολεμίουσ ὄντασ, προέδοσαν, ὥστε ἀπολέσθαι αὐτῶν πρὸσ ἑπτακοσίουσ σὺν τῷ ἐκ Λακεδαίμονοσ ἁρμοστῇ Λαβώτῃ. καὶ ὁ ἐνιαυτὸσ ἔληγεν οὗτοσ, ἐν ᾧ καὶ Μῆδοι ἀπὸ Δαρείου τοῦ Περσῶν βασιλέωσ ἀποστάντεσ πάλιν προσεχώρησαν αὐτῷ.

일치하는 문장이 없습니다.

SEARCH

MENU NAVIGATION