Plutarch, Mulierum virtutes, Σαματίδες

(플루타르코스, Mulierum virtutes, Σαματίδες)

Ἀννίβα δὲ τοῦ Βάρκα, πρὶν ἐπὶ Ῥωμαίουσ στρατεύειν, ἐν Ἰβηρίᾳ πόλει μεγάλῃ Σαλματικῇ προσμαχομένου, πρῶτον μὲν ἔδεισαν οἱ πολιορκούμενοι καὶ συνέθεντο ποιήσειν τὸ προσταττόμενον, Ἀννίβᾳ τριακόσια δόντεσ ἀργυρίου τάλαντα καὶ τριακοσίουσ ὁμήρουσ. ἀνέντοσ δὲ τὴν πολιορκίαν ἐκείνου, μεταγνόντεσ οὐδὲν ἔπραττον ὧν ὡμολόγησαν.

ἐπιστρέψαντοσ αὐτοῦ καὶ τοὺσ στρατιώτασ ἐπὶ διαρπαγῇ χρημάτων κελεύσαντοσ ἐπιχειρεῖν τῇ πόλει, παντάπασι καταπλαγέντεσ οἱ βάρβαροι συνεχώρησαν ἐξελθεῖν ἐν ἱματίῳ τοὺσ ἐλευθέρουσ, ὅπλα καὶ χρήματα καὶ ἀνδράποδα καὶ τὴν πόλιν καταλιπόντασ.

αἱ δὲ γυναῖκεσ οἰόμεναι τῶν μὲν ἀνδρῶν φωράσειν ἕκαστον ἐξιόντα τοὺσ πολεμίουσ, αὐτῶν δ’ οὐκ ἂν ἅψασθαι, ξίφη λαβοῦσαι καὶ ἀποκρύψασαι συνεξέπιπτον τοῖσ ἀνδράσιν.

ἐξελθόντων δὲ πάντων ὁ Ἀννίβασ φρουρὰν Μασαισυλίων ἐπιστήσασ ἐν τῷ προαστείῳ συνεῖχεν αὐτούσ, οἱ δ’ ἄλλοι τὴν πόλιν ἀτάκτωσ ἐμπεσόντεσ διήρπαζον. πολλῶν δ’ ἀγομένων, οἱ Μασαισύλιοι καρτερεῖν οὐκ ἐδύναντο βλέποντεσ οὐδὲ τῇ φυλακῇ τὸν νοῦν προσεῖχον, ἀλλ’ ἠγανάκτουν καὶ ἀπεχώρουν ὡσ μεθέξοντεσ τῆσ ὠφελείασ.

ἐν τούτῳ δ’ αἱ γυναῖκεσ ἐμβοήσασαι τοῖσ ἀνδράσι τὰ ξίφη παρέδοσαν, ἔνιαι δὲ καὶ δι’ ἑαυτῶν ἐπετίθεντο τοῖσ φρουροῦσι·

μία δὲ καὶ λόγχην ἐξαρπάσασα Βάνωνοσ τοῦ ἑρμηνέωσ αὐτὸν ἐκεῖνον ἔπαισεν·

ἔτυχε δὲ τεθωρακισμένοσ τῶν δ’ ἄλλων τοὺσ μὲν καταβαλόντεσ, τοὺσ δὲ τρεψάμενοι, διεξέπεσον ἀθρόοι μετὰ τῶν γυναικῶν. πυθόμενοσ δ’ ὁ Ἀννίβασ καὶ διώξασ τοὺσ μὲν καταλειφθέντασ ἀνεῖλεν· ὀρῶν ἐπιλαβόμενοι παραχρῆμα μὲν διέφυγον, ὕστερον δὲ πέμψαντεσ ἱκετηρίαν εἰσ τὴν πόλιν ὑπ’ αὐτοῦ κατήχθησαν, ἀδείασ καὶ φιλανθρωπίασ τυχόντεσ.

SEARCH

MENU NAVIGATION