헬라어 문장 검색 - Ηιπποξ́Οευϝρεσ́06́60́0́

(히포크라테스, Oeuvres Completes D'Hippocrate., ΠΕΡΙ ΑΡΘΡΩΝ, 60.)

Ὁκόσοισι μὲν οὖν ἂν ἤδη ἠνδρωμένοισι τοῦτο τὸ ἄρθρον ἐκπεσὸν μὴ ἐμπέσῃ, οὗτοι, ὁκόταν αὐτοῖσιν ἡ ὀδύνη παύσηται καὶ τὸ ἄρθρον ἐθισθῇ ἐν τῷ χωρίῳ τούτῳ στροφᾶσθαι, ἵνα ἐξέπεσεν, οὗτοι δύνανται σχεδὸν εὐθὺσ ὀρθοὶ ὁδοιπορέειν ἄνευ ξύλου, καὶ πάνυ μέντοι εὐθέεσ, ἐπὶ δὲ τὸ σιναρὸν, ἅτε οὔτε κατὰ τὸν βουβῶνα εὔκαμπτοι ἐόντεσ, οὔτε κατὰ τὴν ἰγνύην‧ διὰ οὖν τοῦ βουβῶνοσ τὴν ἀκαμπίην εὐθυτέρῳ ὅλῳ τῷ σκέλεϊ ἐν τῇ ὁδοιπορίῃ χρέονται, ᾒ ὅτε ὑγίαινον. Καὶ σύρουσι δὲ ἐνίοτε πρὸσ τὴν γῆν τὸν πόδα, ἅτε οὐ Ῥηϊδίωσ ξυγκάμπτοντεσ τὰ ἄνω ἄρθρα, καὶ ἅτε παντὶ βαίνοντεσ τῷ ποδί οὐδὲν γὰρ ἧσσον τῇ πτέρνῃ οὗτοι βαίνουσιν, ἢ τῷ ἔμπροσθεν‧ εἰ δέ γε ἠδύναντο μέγα προβαίνειν, κἂν πάνυ πτερνοβάται ἦσαν‧ καὶ γὰρ οἱ ὑγιαίνοντεσ ὅσῳ ἂν μέζον προβαίνοντεσ ὁδοιπορέωσι, τοσούτῳ μᾶλλον πτερνοβάται εἰσὶ, τιθέντεσ τὸν πόδα, αἴροντεσ δὲ τὸν ἐναντίον. Ὁκόσοισι δὲ δὴ οὕτωσ ἐκπέπτωκε, καὶ ἔτι μᾶλλον τῇ πτέρνῃ προσεγχρίπτουσιν, ἢ τῷ ἔμπροσθεν‧ τὸ γὰρ ἔμπροσθεν τοῦ ποδὸσ, ὅταν ἐκτεταμένον ἐῄ τὸ ἄλλο σκέλοσ, οὐχ ὁμοίωσ δύναται ἐσ τὸ πρόσω καμπύλλεσθαι, ὥσπερ ὅταν ξυγκεκαμμένον ἐῄ τὸ σκέλοσ‧ οὔτ’ αὖ σιμοῦσθαι δύναται ὁ ποὺσ, ξυγκεκαμμένου τοῦ σκέλεοσ, ὡσ ὅταν ἐκτεταμένον ἐῄ τὸ σκέλοσ. Ὑγιαίνουσά τε οὖν ἡ φύσισ οὕτω πέφυκεν, ὥσπερ εἴρηται‧ ὅταν δὲ ἐκπεσὸν μὴ ἐμπέσῃ τὸ ἄρθρον, οὕτωσ ὁδοιπορέουσιν, ὡσ εἴρηται, διὰ τὰσ προφάσιασ ταύτασ τὰσ εἰρημένασ‧ ἀσαρκότερον μέντοι τὸ σκέλοσ τοῦ ἑτέρου γίνεται, κατά τε τὸ πυγαῖον, κατά τε τὴν γαστροκνημίην, καὶ κατὰ τὴν ὄπισθεν ἴξιν. Οἷσι δ’ ἂν νηπίοισιν ἔτι ἐοῦσι τὸ ἄρθρον οὕτωσ ὀλισθάνον μὴ ἐμπέσῃ, ἢ καὶ ἐκ γενεῆσ οὕτω γένηται, καὶ τούτοισι τὸ τοῦ μηροῦ ὀστέον μᾶλλόν τι μινύθει, ἢ τὰ τῆσ κνήμησ καὶ τὰ τοῦ ποδόσ‧ ἥκιστα μὴν ἐν τούτῳ τῷ τρόπῳ τοῦ ὀλισθήματοσ ὁ μηρὸσ μειοῦται. Μινύθουσι μέντοι αἱ σάρκεσ πάντη, μάλιστα δὲ κατὰ τὴν ὄπισθεν ἴξιν, ὥσπερ ἤδη καὶ πρόσθεν εἴρηται. Ὅσοι μὲν οὖν ἂν τιθηνηθῶσιν ὀρθῶσ, οὗτοι μὲν δύνανται προσχρέεσθαι τῷ σκέλεϊ αὐξανόμενοι, βραχυτέρῳ μέν τινι τοῦ ἑτέρου ἐόντι, ὅμωσ δὲ ἐρειδόμενοι ξύλῳ ἐπὶ ταῦτα, ᾗ τὸ σιναρὸν σκέλοσ‧ οὐ γὰρ κάρτα δύνανται ἄνευ τῆσ πτέρνησ τῷ στήθεϊ τοῦ ποδὸσ χρέεσθαι, ἐπικαθιέντεσ ὥσπερ ἐν ἑτέροισι χωλεύμασιν ἔνιοι δύνανται‧ αἴτιον δὲ τοῦ μὴ δύνασθαι τὸ ὀλίγῳ πρόσθεν εἰρημένον‧ διὰ οὖν τοῦτο προσδέονται ξύλου. Ὅσοι δ’ ἂν καταμεληθέωσι καὶ μηδὲν χρέωνται ἐπὶ τὴν γῆν τῷ σκέλεϊ, ἀλλὰ μετέωρον ἔχωσι, τούτοισι μινύθει μὲν τὰ ὀστέα ἐσ αὔξησιν μᾶλλον, ἢ τοῖσι χρεομένοισιν‧ μινύθουσι δὲ καὶ αἱ σάρκεσ πολὺ μᾶλλον, ἢ τοῖσι χρεομένοισιν‧ κατὰ δὲ τὰ ἄρθρα ἐσ τὸ εὐθὺ πηροῦται τούτοισι τὸ σκέλοσ μᾶλλόν τι, ἢ οἷσιν ἂν ἄλλωσ ἐκπεπτώκῃ.

MENU NAVIGATION

호흡부호 보기

강세부호 보기

장단부호 보기

작은 Iota 보기

모든 부호 보기

헬라어 텍스트

Hippocrates, Oeuvres Completes D'Hippocrate., ΠΕΡΙ ΑΡΘΡΩΝ, 60.

(히포크라테스, Oeuvres Completes D'Hippocrate., ΠΕΡΙ ΑΡΘΡΩΝ, 60.)

상위

목록

SEARCH

MENU NAVIGATION