Hippocrates, Oeuvres Completes D'Hippocrate., ΠΕΡΙ ΑΡΘΡΩΝ, 3.

(히포크라테스, Oeuvres Completes D'Hippocrate., ΠΕΡΙ ΑΡΘΡΩΝ, 3.)

Οἱ δὲ τῇ πτέρνῃ πειρώμενοι ἐμβάλλειν, ἐγγύσ τι τοῦ κατὰ φύσιν ἀναγκάζουσιν‧ χρὴ δὲ τὸν μὲν ἄνθρωπον χαμαὶ κατακλῖναι ὕπτιον, τὸν δὲ ἐμβάλλοντα χαμαὶ ἵζεσθαι ἐφ’ ὁκότερα ἂν τὸ ἄρθρον ἐκπεπτώκῃ‧ ἔπειτα λαβόμενον τῇσι χερσὶ τῇσιν ἑωυτέου τῆσ χειρὸσ τῆσ σιναρῆσ, κατατείνειν αὐτὴν, τὴν δὲ πτέρνην ἐσ τὴν μασχάλην ἐμβάλλοντα ἀντωθέειν, τῇ μὲν δεξιῇ ἐσ τὴν δεξιὴν, τῇ δὲ ἀριστερῇ ἐσ τὴν ἀριστερήν. Δεῖ δὲ ἐσ τὸ κοῖλον τῆσ μασχάλησ ἐνθεῖναι στρογγύλον τι ἐναρμόσσον‧ ἐπιτηδειόταται δὲ αἱ πάνυ σμικραὶ σφαῖραι καὶ σκληραὶ, οἱαῖ ἐκ τῶν πολλῶν σκυτέων Ῥάπτονται‧ ἢν γὰρ μή τι τοιοῦτον ἐγκέηται, οὐ δύναται ἡ πτέρνη ἐξικνέεσθαι πρὸσ τὴν κεφαλὴν τοῦ βραχίονοσ‧ κατατεινομένησ γὰρ τῆσ χειρὸσ, κοιλαίνεται ἡ μασχάλη‧ οἱ γὰρ τένοντεσ οἱ ἔνθεν καὶ ἔνθεν τῆσ μασχάλησ, ἀντισφίγγοντεσ, ἐναντίοι εἰσίν. Χρὴ δέ τινα ἐπὶ θάτερα τοῦ κατατεινομένου καθήμενον κατέχειν κατὰ τὸν ὑγιέα ὦμον, ὡσ μὴ περιέλκηται τὸ σῶμα, τῆσ χειρὸσ τῆσ σιναρῆσ ἐπὶ θάτερα τεινομένησ‧ ἔπειτα ἱμάντοσ μαλθακοῦ πλάτοσ ἔχοντοσ ἱκανὸν, ὅταν ἡ σφαίρη ἐντεθῇ ἐσ τὴν μασχάλην, περὶ τὴν σφαίρην περιβεβλημένου τοῦ ἱμάντοσ, καὶ κατέχοντοσ, λαβόμενον ἀμφοτερέων τῶν ἀρχέων τοῦ ἱμάντοσ, ἀντικατατείνειν τινὰ, ὑπὲρ κεφαλῆσ τοῦ κατατεινομένου καθήμενον, τῷ ποδὶ προσβάντα πρὸσ τοῦ ἀκρωμίου τὸ ὀστέον. Ἡ δὲ σφαίρη ὡσ ἐσωτάτω καὶ ὡσ μάλιστα πρὸσ τῶν πλευρέων κείσθω, καὶ μὴ ἐπὶ τῇ κεφαλῇ τοῦ βραχίονοσ.

일치하는 문장이 없습니다.

SEARCH

MENU NAVIGATION