Euripides, Hecuba, episode 3:

λαοὶ δ’ ἐπερρόθησαν, Ἀγαμέμνων τ’ ἄναξ εἶπεν μεθεῖναι παρθένον νεανίαισ. οἳ δ’, ὡσ τάχιστ’ ἤκουσαν ὑστάτην ὄπα, μεθῆκαν, οὗπερ καὶ μέγιστον ἦν κράτοσ. κἀπεὶ τόδ’ εἰσήκουσε δεσποτῶν ἔποσ, λαβοῦσα πέπλουσ ἐξ ἄκρασ ἐπωμίδοσ ἔρρηξε λαγόνασ ἐσ μέσασ παρ’ ὀμφαλόν, μαστούσ τ’ ἔδειξε στέρνα θ’ ὡσ ἀγάλματοσ κάλλιστα, καὶ καθεῖσα πρὸσ γαῖαν γόνυ ἔλεξε πάντων τλημονέστατον λόγον· Ἰδού, τόδ’, εἰ μὲν στέρνον, ὦ νεανία, παίειν προθυμῇ, παῖσον, εἰ δ’ ὑπ’ αὐχένα χρῄζεισ, πάρεστι λαιμὸσ εὐτρεπὴσ ὅδε.