Demosthenes, Speeches 11-20, Περὶ τοῦ Στεφάνου 402:

ὡσ δ’ ἀπηγγέλθη τάχισθ’ ἡ μάχη, οὐδὲν τούτων φροντίσασ εὐθέωσ ὡμολόγεισ καὶ προσεποιοῦ φιλίαν καὶ ξενίαν εἶναί σοι πρὸσ αὐτόν, τῇ μισθαρνίᾳ ταῦτα μετατιθέμενοσ τὰ ὀνόματα· ἐκ ποίασ γὰρ ἴσησ ἢ δικαίασ προφάσεωσ Αἰσχίνῃ τῷ Γλαυκοθέασ τῆσ τυμπανιστρίασ ξένοσ ἢ φίλοσ ἢ γνώριμοσ ἦν Φίλιπποσ; ἐγὼ μὲν οὐχ ὁρῶ, ἀλλ’ ἐμισθώθησ ἐπὶ τῷ τὰ τουτωνὶ συμφέροντα διαφθείρειν. ἀλλ’ ὅμωσ, οὕτω φανερῶσ αὐτὸσ εἰλημμένοσ προδότησ καὶ κατὰ σαυτοῦ μηνυτὴσ ἐπὶ τοῖσ συμβᾶσιν γεγονώσ, ἐμοὶ λοιδορεῖ καὶ ὀνειδίζεισ ταῦτα, ὧν πάντασ μᾶλλον αἰτίουσ εὑρήσεισ.