Arrian, Indica, chapter 27

(아리아노스, Indica, chapter 27)

ἐνθένδε κατηγεμὼν τοῦ πλόου λέγει Νέαρχοσ ὅτι συνέπλωσεν αὐτοῖσιν Ὑδράκησ οὔνομα, Γαδρώσιοσ· ὑπέστη δὲ Ὑδράκησ καταστήσειν αὐτοὺσ μέχρι Καρμανίησ. τὰ δὲ ἀπὸ τοῦδε οὐκέτι χαλεπὰ ἦν, ἀλλὰ μᾶλλόν τι εὐόρμα, ἔστε ἐπὶ τὸν κόλπον τὸν Περσικόν. ἐκ δὲ Μοσαρνῶν νυκτὸσ ἄραντεσ πλώουσι σταδίουσ ἑπτακοσίουσ καὶ πεντήκοντα ἐσ Βάλωμον αἰγιαλόν·

ἐνθένθε ἐσ Βάρνα κώμην σταδίουσ τετρακοσίουσ, ἵνα φοίνικέσ τε πολλοὶ ἐνῆσαν καὶ κῆποσ, καὶ ἐν τῷ κήπῳ μύρσιναι ἐπεφύκεσαν καὶ ἄλλα ἄνθεα, ἀπ̓ ὅτων στεφανώματα τοῖσι κωμήτῃσιν ἐπλέκετο· ἐνθένδε ἐσ διηκοσίουσ σταδίουσ περιπλώσαντεσ καταίρουσιν ἐσ Δενδρόβοσα, καὶ αἱ νέεσ ἐπ̓ ἀγκυρέων ἐσάλευσαν.

ἐνθένδε ἀμφὶ μέσασ νύκτασ ἄραντεσ ἐσ Κώφαντα λιμένα ἀπίκοντο, τετρακοσίουσ μάλιστα σταδίουσ διεκπλώσαντεσ·

ἐνθαῦτα ἁλιέεσ τε ᾤκεον, καὶ πλοῖα αὐτοῖσιν ἦν σμικρὰ καὶ πονηρά·

καὶ τῇσι κώπῃσιν οὐ κατὰ σκαλμὸν ἤρεσσον ὡσ ὁ Ἑλλήνων νόμοσ, ἀλλὰ τὸ ὕδωρ ἀναβάλλοντεσ ἔνθεν καὶ ἔνθεν, κατάπερ οἱ σκάπτοντεσ τὴν γῆν. ὕδωρ δὲ πολλόν τε ἦν ἐν τῷ λιμένι καὶ καθαρόν. περὶ δὲ πρώτην φυλακὴν ἄραντεσ καταίρουσιν ἐσ Κύιζα, ἐσ ὀκτακοσίουσ σταδίουσ δίεκπλώσαντεσ, ἵνα αἰγιαλόσ τε ἔρημοσ ἦν καὶ ῥηχίη.

αὐτόθι ὦν ἐπ̓ ἀγκυρέων ὡρ́μεον, κατὰ νέασ τε ἐδειπνοποιέοντο. ἐνθένδε διεκπλώσαντεσ σταδίουσ πεντακοσίουσ ἀπίκοντο ἔσ τινα πόλιν σμικρήν, οἰκεομένην ἐπὶ γηλόφου οὐ πόρρω τοῦ αἰγιαλοῦ.

καὶ Νέαρχοσ ἐπιφρασθεὶσ ὅτι σπείρεσθαι τὴν χώρην οἰκόσ, λέγει πρὸσ Ἀρχίην ‐ συνέπλωε δὲ Νεάρχῳ, τῶν ἐν αἴνῃ ἐὼν Μακεδόνων ‐ πρὸσ τοῦτον λέγει ὅτι καταληπτέον σφίσιν εἰή τὸ χωρίον·

ἑκόντασ τε γὰρ οὐκ ἂν οἰέσθαι δοῦναι τῇ στρατιῇ σιτία, βίῃ τε οὐκ οἱο͂́ν τε εἶναι ἐξαιρέειν, πολιορκίησ δὲ καὶ τριβῆσ δεήσειν, σφᾶσ δὲ ἐπιλελοιπέναι τὰ σιτία.

ὅτι δὲ ἡ γῆ σιτοφόροσ, τῇ καλάμῃ τεκμηριοῦσθαι, ἥντινα οὐ πόρρω τοῦ αἰγιαλοῦ ἀπεώρων βαθέαν. ταῦτα ἐπεί σφισιν ἐδόκεε, τὰσ μὲν ἄλλασ νέασ κελεύει παραρτέεσθαι ὡσ ἐσ πλόον, καὶ Ἀρχίησ αὐτῷ ἐξήρτυε τὰ ἐσ τὸν πλόον· αὐτὸσ δὲ ὑπολειφθεὶσ μετὰ μιῆσ νεὸσ ἐπὶ θέαν δῆθεν τῆσ πόλιοσ ᾔει.

SEARCH

MENU NAVIGATION